Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Timotius, ngona matero ka 'ai ngowaka ma dutu tonisiboso-bosono! Ngoi 'o Paulus tolefo 'o surati ne'ena ngonaka. Toga'asoko la 'o barakati, 'o simara'ai de 'o singina ma sanangi nanga Dea ma Jo'oungu ma Dutuno de nanga Jou ma Kristus Yesusino naga de de ngona. De ma Jo'oungu ma Dutu 'awi mau, ngoi 'igoraka todadi ma Kristus Yesus 'awi su-suloko, de 'isuloko tosihabari 'o 'ahu gee ma Jo'oungu ma Dutu wosijajiokau. 'O 'ahu ge'ena ngone pamake sababu pomarimoi de ma Kristus Yesus.

² (1:1)

³ Ngoi to'amalaha ma Jo'oungu ma Dutuka gee towile-leleani de 'ai singina 'iti-tiai de 'itebi-tebini, 'isoka gee ma sira 'ai edete de 'ai dotumu. Ngoi tininganonino ma noimi kaitaurika to'amalaha ma Jo'oungu ma Dutuka 'ai lahidoaka 'o wange de 'o obiri.

⁴ Ngoi tonganonino 'ani singina 'isusa nosigari-gari. Ge'enau so ngoi tomau pomakamakeli de de ngona la tomorene ma gou-goungu.

⁵ Ngoi tonganonie 'ani ngo-ngaku gee nosigou-gounguku ma Kristusika, 'isoka 'ani edete ngo Lois de ni 'esa ngo Eunike manga ngo-ngaku. De ngoi tamaoku ngona mita nongaku koge'enali.

⁶ Sababu ge'ena ngoi tonisinganono ma ngale 'isikuata la 'iwango 'o co-catu gee ma Jo'oungu ma Dutu wonikulaka ma 'orasi 'ai giama tonidetedene.

⁷ Sababu 'o Ngomasa gee ma Jo'oungu ma Dutu wonakulano, ge'ena bukangi la 'inadiai ngone 'inamodo-modongo, ma 'ena 'inasikuata, 'ina'omanga de 'o dora, de 'idadi poma'aturu.

⁸ Sababu ge'ena 'uwa nimaeke niosikademo 'o nyawaka ma ngale nanga Jou, de 'uwa nimaeke mita ma ngale ngoi, gee 'ibui sababu 'una. Ma 'ena salingou ngona de 'o guata ma Jo'oungu ma Dutuno nosangisara mita ma ngale 'o Habari ma Owa ge'ena.

⁹ Ma Jo'oungu ma Dutu wonasilaha de wonairikokau podadi to 'una ma sirete 'awi kawasa. Ge'ena 'uwa pongose 'ato sababu to ngone nanga di-diai. Ma 'ena ka to 'una ma sirete 'awi mau de 'awi singina ma sure. 'Una wokula 'awi singina ma 'ofi ma ngekomo ma Kristus Yesus ka 'o dunia ne'ena ma koisidadikuwasi.

¹⁰ Ma ne'ena 'awi singina ma 'ofi ge'ena wosiwaiti de nanga Ro-riwo Wonasilaha-laha gu'una woboa 'o duniano, ge'ena la ma Kristus Yesus. 'O Yesus wadiai 'o songene ma pareta koimado-do'oawau, de wo'asa 'o 'ahu kaisi'ado-'adonika, ma ngekomo 'o Habari ma Owa.

¹¹ Ma ngale 'isitotara 'o Habari ma Owa ge'ena, ma Jo'oungu ma Dutu woigoraka todadi 'o su-suloko de todoto-dotoko.

¹² Ge'enau so ngoi todingidaa. Ma ngoi tatapu tongaku, sababu ngoi tanako ma gou-goungu, nagu'una gee ngoi towingaku-ngaku. Ngoi tanako 'okia naga gee woisito-togumokau ngoino. De ngoi tongaku 'iti-tiai 'una wa'akunu mita wajaga sigado 'o 'orasi ma do-dogumu.

¹³ Namoteke nosigou-goungu 'o do-dotoko 'iti-tiai gee tonikulakau ngonaka. De salingou nomasiga-gao 'o ngo-ngakuka de 'o doraka gee 'imadadi to ngoneu nanga rongamoi sababu pomarimoi de ma Kristus Yesus.

¹⁴ 'O Ngomasa 'Itebi-tebini naga ngonaka. So de to 'ena ma guata, ngona salingou napaliara nosidi-diai 'o do-dotoko 'iti-tiai gee 'iba-baraguna, gee ma Jo'oungu ma Dutu wonisito-togumokau ngonaka.

¹⁵ Ngona nanako, 'o nyawa 'o Asia ma daeraaka gee yoodumu 'imadakau ngoi, de 'o Figelus de 'o Hermogenes mita.

¹⁶ Ma 'o Onesiforus 'awi woa ma dodaku ma muruou naga 'ai singina yosikuata. Tanu ma Jo'oungu ma Dutu wosidumutu 'awi dora 'onaka. Ngaro ngoi 'o bui ma dodaka ma 'o Onesiforus kowimaekuwa woilega.

¹⁷ Gee 'o Romaka wototarika, de 'una womadononuku sigado mimakamakeka.

¹⁸ De ngona nanako 'o Efesusoka 'una ma gudai woiriwo. Tanu 'o simara'ai wamake ma Jouno gee 'o nyawa 'iodumu Wahakimi ma Wangeka.

2 Timotius

Video 2 Timotius 1

Ikuti Kami:

KONTAK | PARTISIPASI | DONASI