Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Hun bani si Paulus, apostel ni Kristus Jesus marhitei rosuh ni Naibata, domu hubani bagah-bagah hagoluhan na ibagas Kristus Jesus.
2 Hu bani si Timoteus, anakku na hinaholongan, idop ni uhur, holong ampa damei ma bamu humbani Naibata Bapa ampa Kristus Jesus, Tuhanta in.
3 Mangkatahon tarima kasih do uhurhubani Naibata, na huidangi humbani borsih ni panggora ni uhur, songon pangidangi ni ompung-ompungta, sanggah na hudingat ham tongtong ibagas tonggongku, arian pakon borngin.
4 Anggo hudingat iluh-iluhmu, masihol do ahu mangidah ham, ase dapotan malas ni uhur na gok ahu.
5 Ai hudingat do haporsayaonmu na so sipahulahkulah in, haporsayaon, na marianan hinan homa ibagas uhur ni ompungmu naboru, si Lois, ampa inangmu, si Oinike, anjaha tenger do uhurhu, marianan homa bamu.
6 Halani ai, hupagolpa do ham, ase iparatah-ratah ham sibere-bere ni Naibata na bamu in, marhitei na hutampeihon tanganku bamu.
7 Ai seng tonduy biar ibere Naibata banta, tapi tonduy hagogohon, holong ampa panrajaion diri do.
8 Ai pe, ulang ma ham maila manaksihon Tuhanta, anjaha ulang homa maila ham pasal ahu, na tartutup halani-Si, tapi dihut ma ham tene manaron halani Ambilan Na Madear in ibagas gogoh na humbani Naibata.
9 Ai ipaluah anjaha idilo do hita marhitei pandiloon na mapansing, sedo halani pambahenanta, tapi mangihutkon sura-sura ampa idop ni uhur-Ni do, na binere-Ni banta ibagas Kristus Jesus, humbani mulani nari,
10 sonari nani, ipatidak marhitei partalar ni Sipaluah hita, Kristus Jesus, na parontihon hamatean, anjaha na paulgapkon hagoluhan ampa biak na so ra matei marhitei Ambilan Na Madear in.
11 Hujin do ahu ipabangkit gabe siparambilan, apostel ampa guru,
12 anjaha halani in do ase manaron ahu sonon, tapi seng maila ahu, ai hutanda do Ia, na huhaporsayai, anjaha tenger do uhurhu, margogoh Ia manramotkon na pinasimpankon-Ni in bangku das hubani ari simagira.
13 Marsijoloman ma ham bani hata hasintongan, na binogeimu hun bangku, ai ma tiru marhitei haporsayaon ampa holong bani Kristus Jesus.
14 Ramotkon ma arta na madear, na pinasimpankon in bam marhitei Tonduy Na Pansing, na marianan ibagas hita.
15 Ibotoh ham do, na dob itadingkon haganup halak na hun Asia do ahu, deba humbani sidea ai ma si Pegelus ampa si Hermogenes.
16 Sai maidop ma uhur ni Tuhan in bani rumah tangga ni si Onesiporus, ai gati do malas uhurhu ibahen, anjaha seng maila ia halani garingku.
17 Ai sanggah roh ia hu huta Rom, iporluhon do mangindahi ahu, ronsi jumpahsi ahu.
18 Sai ibere Tuhan in ma, ase jumpahan idop ni uhur ia humbani Tuhan in bani ari simagira. Anjaha ibotoh ham do torang, sonaha pangidangini bangku i huta Epesus.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA