Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi dob marianan raja ai ibagas rumahni, anjaha marhasonangan ia ibahen Jahowa hun bani sagala munsuhni inggot,
2 nini raja ai ma dompak Nabi Natan, “Tonggor ma, marianan i rumah na hun bani hayu ares do ahu, tapi Poti ni Jahowa marianan ibagas lampo-lampo do.”
3 Dob ai nini si Natan ma dompak raja ai, “Laho ma ham, mambahen sagala na ibagas uhurmu, ai Jahowa do hasomanmu.”
4 Tapi bornginni ai roh ma hata ni Jahowa hu bani si Natan,
5 “Laho ma ho, patugah ma hu bani juakjuak-Ku si Daud. Sonon do hata ni Jahowa, ʻSihol pajongjongonmu Bangku sada rumah bahen ianan-Ku?ʼ
6 Seng ongga marianan Ahu ibagas rumah singgan ni ari dob Huboan halak Israel tangkog hun Masir ronsi sadari on, tongtong do Ahu minsah-insah bani lampo-lampo siianan-Ku.
7 Sadokah Ahu mardalan rap pakon halak Israel, ongga ma Ahu mangkatahon sangkababah hata hu bani sada panguhum ni halak Israel, na Huparentahkon marmahan bangsang-Ku, halak Israel, sonon, ʻMase ma lang ipauli hanima Bangku sada rumah hun bani hayu ares?ʼ
8 On pe, sonon ma hatahon hu bani juakjuak-Ku si Daud ai. Sonon do hata ni Jahowa Zebaot, ʻAhu do na mambuat ho hun bani parmahanan, hun bani na mangirikkon biri-biri, ase ho gabe raja manggomgom bangsang-Ku halak Israel;
9 anjaha Ahu do na mangkasomani ho barang huja pe ho laho, anjaha Husiapkon do ganup munsuhmu i lobeimu; bahenon-Ku do goranmu tarambilan tumang songon goran ni halak na bolon i tanoh on.
10 Anjaha pasirsiron-Ku do sada ianan bani bangsang-Ku halak Israel, anjaha suanon-Ku do sidea hujai, ase marianan sidea ijai, anjaha seng hona geor be; anjaha seng be nunuton ni halak sibahen gogoh mangkilang sidea songon na dob in,
11 olat ni na dob Hupabangkit panguhum mamarentah bangsang-Ku halak Israel, Ahu do na mambere hasonangan bam i lobei ni sagala munsuhmu. Ambahni ai ibagahkon Jahowa do bamu, patotapon ni Jahowa do ginomparmu magira.
12 Anggo domma jumpah ajalmu, anjaha martumpu ho hu bani ompungmu, pajongjongon-Ku ma ginomparmu, anak na pinupusmu, anjaha patotapon-Ku ma harajaonni.
13 Maningon ia do na pajongjongkon sada rumah ibagas goran-Ku, anjaha pajonamon-Ku do paratas ni harajaonni ronsi sadokah ni dokahni.
14 Ahu do gabe Bapa bani, anjaha ia gabe anak Bangku. Anggo mardousa ia, lonsingon-Ku ma ia marhitei lonsing-longsing ni jolma;
15 tapi seng minsahkonon-Ku hun bani idop ni uhur-Hu songon na dob Hupaminsah hun bani si Saul, na dob Huusir ai hun lobeimu.
16 Maningon totap do ginomparmu pakon harajaonmu ronsi sadokah ni dokahni i lobei-Hu; paratasmu pe totap do ronsi sadokah ni dokahni.ʼ”
17 Romban hu bani haganup hata ai, romban hu bani haganup pangungkabon ai, ihatahon si Natan ma sonai hu bani si Daud.
18 Dob ai masuk ma Raja Daud, hundul ma ia i lobei ni Jahowa, jadi nini ma, “Ise ma ahu, Ham Tuhan Jahowa, anjaha ise ma ginomparhu, ase iboan Ham ahu das hujon?
19 Anjaha maotiktu ope ai nini uhur-Mu, Ham Tuhan Jahowa, halani ai marbagah-bagah do homa Ham hu bani ginompar ni juakjuak-Mu pasal na sihol masa magira, anjaha ipatuduhkon Ham do bangku sundut na sihol roh, Ham Tuhan Jahowa.
20 Anjaha aha ope tambahni ai boi hatahonon ni si Daud bamu? Ai itandai Ham do juakjuak-Mu on, Ham Tuhan Jahowa.
21 Halani hata-Mu, anjaha romban hu bani uhur-Mu ibahen Ham haganup habanggalon on, laho pabotohkon in hu bani juakjuak-Mu.
22 Halani ai timbul do Ham. Ham Tuhan Jahowa; ai seng dong na songon Ham, anjaha seng dong Naibata sobali Ham, romban hu bani haganup na binogei ni pinggolnami.
23 Anjaha bangsa na legan ja ma songon bangsa-Mu halak Israel adong i tanoh on, Naibata sandiri manlangkah laho manobussi bahen bangsa-Ni, laho mambahen tarambilan goran-Ni, na mambahen bani sidea habanggalon pakon hajombuton marhitei na mangusir sada bangsa pakon naibatani hun lobei ni bangsa-Ni.
24 Anjaha domma ipajonam Ham Bamu bangsa-Mu halak Israel, bahen bangsa-Mu ronsi sadokah ni dokahni, anjaha Ham, alo Jahowa gabe Naibata ni sidea.
25 Antong, Ham Naibata Jahowa, patotap Ham ma hata na dob pinarbagah-bagah-Mu pasal juakjuak-Mu pakon ginomparni ronsi sadokah ni dokahni, anjaha bahen Ham ma romban hu bani bagah-bagah-Mu;
26 ase timbul goran-Mu ronsi sadokah ni dokahni, marhitei na mangkatahon, ʻJahowa Zebaot do Naibata ni halak Isrel; anjaha ginompar ni juakjuak-Mu si Daud jonam i lobei-Mu.ʼ
27 Ham do alo Jahowa Zebaot, Naibata ni halak Israel, na patalarhon bani juakjuak-Mu: Pajongjongon-Ku do sada rumah bam; halani ai do ase pag juakjuak-Mu on manggogohkon tonggo on Bamu.
28 Halani ai, Ham Tuhan Jahowa, Ham do Naibata, anjaha sintong do hata-Mu, anjaha domma ibagahkon Ham hu bani juakjuak-Mu on hata na madear on.
29 On pe, sai pasu-pasu Ham ma ginompar ni juakjuak-Mu on, ase totap sidea i lobei-Mu ronsi sadokah ni dokahni; ai Ham do na marbagah-bagahkon ai, anjaha marhitei pasu-pasu-Mu dapotan pasu-pasu ginompar ni juakjuak-Mu on ronsi sadokah ni dokahni.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA