Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Raja Daud nggo ringan i bas istanana erkiteken TUHAN ngkawali ia i bas kerina musuh-musuhna nari.
2 Kenca bage ngerana raja man Nabi Natan nina, "Aku ringan i bas sada rumah si ibahan i bas kayu jati nari, tapi Peti Perpadanen Dibata isimpan i bas sada kemah!"
3 Nina Nabi Natan njabapsa, "Lakoken kai si lit i bas ukurndu sabap TUHAN kap ras kam."
4 Tapi i bas berngi e ngerana TUHAN man Natan nina,
5 "To lawes kataken man suruh-suruhenKu Daud, nindu, 'Labo kam kalakna si erbahan rumah man inganKu.
6 Mulai i bas paksa Aku mulahi bangsa Israel i Mesir nari seh genduari langa pernah aku ringan i bas sada Rumah Pertoton tapi tetap pindah-pindah dingen ringan i bas kemah.
7 Kidekah aku erdalan ras bangsa Israel, pernah kin Kusungkun peminpin Israel ngkai maka la ipajekken man bangKu sada Rumah Pertoton si ibahan i bas kayu jati nari?'
8 Emaka katakenlah man suruh-suruhenKu Daud maka Aku, TUHAN si Mada Kuasa, ngerana man bana: 'Gelgel e kam permakan biri-biri, tapi nggo Kulegi kam i mbalmbal nari jenari Kubahan jadi raja bangsangKu Israel.
9 Aku ras kam ku japa pe kam lawes, janah Kutaluken kerina musuh-musuhndu i bas perdalanenndu. Kubahan kam terberita bali ras peminpin-peminpin si mbelinna i doni enda.
10 Nggo Kupilih ingan man bangsangKu Israel, janah nggo Kutetapken ia i je, i ja ia nggeluh alu la lit ise pe si nindihsa. Kenca bangsangKu bengket ku negeri e, ope denga lit rajana nggo ia iserang bangsa si merawa, tapi e lanai banci jadi sekali nari. Aku erpadan ngkawali kam i bas kerina musuh-musuhndu nari, janah mereken kesusuren man bandu.
11 (2Sam 7:10)
12 Kenca kam mate janah ikuburken ras nini-ninindu, Aku njadikenca sekalak i bas anakndu si dilaki nari jadi raja janah Aku erbahanca kerajanna tetap paguh.
13 Ia me kalakna si majekken Rumah Pertoton man bangKu, janah Aku njagasa maka kursi kinirajanna tetap pajek seh rasa lalap.
14 Aku jadi bapana, janah ia jadi anakKu. Sanga ibahanna salah, Kuukum ia bali ras sekalak bapa ngukum anakna.
15 Tapi la Kubuat mulihi penampatKu i bas ia nari, la bali ras si Kulakoken man Saul. Saul Kupesusur gelah kam banci jadi raja.
16 Kesusurenndu la erpeltep-peltep, janah Aku erbahanca kerajanndu tetap rasa lalap. Kuasandu tetap rasa lalap.'"
17 Ituriken Natan kerina man Daud kai si ipetangkas Dibata man bana.
18 Kenca bage bengket Raja Daud ku bas Kemah Perjumpan emaka kundul ia janah ertoto, "Subuk aku bage pe keluargangku, la metunggung ngaloken kai si nggo IdalankenNdu man kami o TUHAN si Erdolat.
19 Tapi genduari tole denga AteNdu IbahanNdu man bangku o TUHAN si Erdolat. Nggo IbahanNdu iketen padan kerna kesusurenku i bas tahun-tahun si reh enda. Janah nggo IpelepasNdu aku ngidahsa aminna aku sekalak manusia saja, o TUHAN si Erdolat!
20 Kai denga banci kukataken man BaNdu! ItandaiNdu aku, suruh-SuruhenNdu.
21 Eme sura-SuraNdu ras TujunNdu ngelakoken si e. Nggo IlakokenNdu kerina e guna ngajari aku.
22 O TUHAN si Erdolat, lanai lang-lang BelinNdu! La lit sada pe si seri ras Kam; lalap ieteh kami maka Kam ngenca Dibata sitonggal.
23 La lit sada bangsa si deban i babo doni enda si seri ras Israel. Ia nggo IbebaskenNdu i bas perbudaken nari. IbahanNdu ia jadi BangsaNdu. Si mbelin ras si mbisa nggo IlakokenNdu man bana. Nggo IsalsalkenNdu GelarNdu si terberita ku belang-belang doni enda. Nggo IjembaNdu bangsa-bangsa si deban ras dibata-dibatana adi iserangna BangsaNdu, bangsa si IbebaskenNdu i Mesir nari jadi BangsaNdu jine.
24 Nggo IjadikenNdu Israel jadi BangsaNdu tetap rasa lalap janah Kam o TUHAN, nggo jadi Dibatana.
25 Emaka genduari o TUHAN Dibata, tepatilah PadanNdu kerna aku ras kesusurenku janah lakokenlah kai si nggo IkatakenNdu.
26 GelarNdu jadi mbelin janah kalak ngatakenca, 'TUHAN si Mada Kuasa eme Dibata i babo Israel.' Kam ngkawali kesusurenku tetap asa lalap.
27 TUHAN si Mada Kuasa, Dibata nu Israel! Nggo aku pang notoken pertoton enda man BaNdu, sabap kerina e nggo IcidahkenNdu man bangku suruh-SuruhNdu. Janah nggo IturikenNdu bangku maka Kam njadiken raja-raja i bas kesusurenku nari.
28 Genduari o TUHAN si Erdolat Kam me Dibata, si la nggo la nepati PadanNdu, janah nggo IpadankenNdu nehken si mehuli e man bangku.
29 Kupindo man BaNdu pasu-pasu min kesusurenku, gelah lalap inanamina KiniulinNdu. Kam TUHAN si Erdolat nggo erpadan kerna, emaka tadinglah lalap pasu-PasuNdu i babo kesusurenku."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA