Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Najagai Batara anjo Karaeng Daud battu ri karicuanna musunna, sa’genna akkulle ammantang tuli lalang ri balla’ kakaraenganna.
2 Jari nakanamo karaenga ri Na’bi Natan, "Ciniki, anne inakke ammantanga’ lalang ri balla’ kakaraengang nipareka battu ri kayu camara Libanon, nampa Patti Parjanjianna Allata’ala poro niboliki bawang lalang ri kemaya!"
3 Appialimi Natan angkana, "Gaukammi sikamma apa kikaerokia, nasaba’ Natulungki’ Batara."
4 Mingka ri anjo bangngia Nakana Batara ri Natan,
5 "A’lampako siagang pabattui mae ri atangKu Daud anne pasangKu angkanaya, ‘Angngapa naikau ambangung balla’ untu’ iNakke.
6 Baku’na Kulappassang bansa Israel battu ri Mesir sa’genna kamma-kamma anne, tena le’baKa’ ammantang lalang ri se’reang balla’, passangalinna a’la’bangA’ tuli a’lampa siagang lalangA’ ri kemaya ammantang.
7 Lalang a’la’bangKu a’lampa siagang bansa Israel, tale’baKa’ akkuta’nang mae ri pamimping-pamimping le’baka Kupile, angkana apa saba’na natena nabangungangA’ ke’nanga balla’ battu ri kayu camara Libanon.’
8 Lanri kammana anjo Natan, pauangi atangKu Daud, angkanaya iNakke Batara Kaminang Koasaya, angkana ri ia, ‘Le’ba’ mako Kualle battu ri jama-jamannu akkalawakia gimbala’ ri paranga siagang Kuangkakko a’jari karaeng mae ri ummakKu Israel.
9 Le’ba’ mako Kururungang manna pole kemae lampanu, siagang sikontu musunnu le’ba’mi Kutumpasa’ ri wattunnu a’bundu’. LaKupa’jariko masahoro’ sangkamma pamimping-pamimping kaminang lompoa ri lino.
10 Nampa pole, untu’ ummakKu Israel le’ba’mi Kupasadiang tampa’ siagang Kusuroi ke’nanga ammantang tuli anjoreng, sollanna akkulle sannang tallasa’na ke’nanga, tenamo naniricui pole. Baku’ battuna ke’nanga mae anrinni ri buttaya riolo, na Kuangka’ pamimping-pamimpinga untu’ ke’nanga, nibunduki ke’nanga ri sikamma tau mangngaia ri gau’ katerassang, mingka anjo passala’ kammaya tenamo nalakajariang poleang. A’janjiA’ angkanaya laamangko battu ri sikontu musua, siagang laKusareko jari-jari.
11 (7:10)
12 Sallang, punna narapi’ a’jala’nu, na nunitarawang ri jera’na boe-boenu, nia’ sitau battu ri ana’ bura’nenu laKuangka’ a’jari karaeng. Iami lambangungA’ balla’. LaKupakajarreki kakaraenganna siagang nia’ sitau jari-jarina lammarenta satunggu-tungguna salaku karaeng.
13 (7:12)
14 INakke la’jari Manggena, siagang ia la’jari ana’ bura’neKu. Punna nia’ apa sala nagaukang, laKuhukkungi sangkamma se’rea mangge anghukkungi ana’na.
15 Mingka tuli laKugaukangi apa bajika mae ri ia situru’ janjingKu. Tuli laKuta’gala’ jarreki janjingKu mae ri ia, tena nasangkamma apa le’baka Kugaukang mae ri Saul Kupalessoka battu ri empoanna sollannu akkulle a’jari karaeng.
16 Tuli lania’na jari-jarinu, siagang laKupa’jari kakaraengannu attahang sa’genna satunggu-tungguna. Nia’ sitau jari-jarinu lammarenta salaku karaeng sa’genna satunggu-tungguna.’"
17 Nampa napau Na’bi Natan mae ri Daud sikontu apa le’baka Napa’nyata Allata’ala mae ri ia.
18 Nampa antama’ Karaeng Daud ri KemaNa Batara. Ammempoi nampa appala’ doang angkana, "O, Batara Kaminang Tinggia, inakke siagang kaluargaku tena kusiratang antarimai sikontu kabajikang Kipappicinikanga mae ri nakke anne siapaya sallona.
19 Ba’lalo la’biangngang naanjo Kigaukanga, o Batara Kaminang Tinggia; le’bakKi’ appare’ janji ri passala’na jari-jariku untu’ wattu labattua. Siagang Kipappicinikangi anjo passalaka mae ri nakke, manna nainakke anne poro tau biasaja’ bawang, o Batara Kaminang Tinggia.
20 Apapi pole akkulle kupau mae ri Katte? Kiassengi sikontu-kontuna ri passala’na anne atanTa.
21 Lanri janjinTa siagang lanri ero’ kalenTa naKigaukang anjo panggaukang-panggaukang malompoa untu’ angngajaraki anne atanTa.
22 IKatte ma’nassa teai sipato’ malompoTa tojeng, o Karaeng Allata’ala! IKatteji bawang Allata’ala, tena sikali sangkammanTa. Naassengi ikambe anjo passalaka lanri baku’ riolo iji nanipauammo ikambe.
23 Ri sikontu linoa tena nia’ bansa sangkamma Israel. Tena ruanna bansa Israel le’ba’ Kilappassang battu ri tunipare’ ataya untu’ Kipa’jari umma’ kalenTa. Sikontu gau’ malompoa siagang appakalannasaka Kigaukanga mae ri ke’nanga, ampa’jari masahoroki arenTa ri sikontu linoa. Bansa-bansa maraenga siagang rewata-rewatana le’ba’mi Kibongka ri wattunna maju ummatTa a’bundu’.
24 Le’ba’mi bansa Israel Kipa’jari ummatTa sa’genna satunggu-tungguna, siagang iKatte o Batara, a’jari Allata’alana ke’nanga.
25 Na kamma-kamma anne, o Karaeng Allata’ala, poro mangngellaiKi’ ampakajarreki janjinTa le’baka Kipau untu’ satunggu-tungguna ri passala’na kalengku siagang jari-jariku. Poro mangngellaiKi’ naKipa’rupa anjo apa le’baka Kipa’janjiang.
26 Ri kere-keremae tuli lanapakalompoi taua arenTa siagang angkana, ‘Batara Kaminang Koasaya, Iami Allata’ala mae ri tu Israel.’ Na nia’ sitau battu ri jari-jarina lammarenta salaku karaeng mae ri anne bansaya sa’genna satunggu-tungguna.
27 O, Batara Kaminang Koasaya! Kupa’baraniangi kalengku ampanaiki anne pappala’ doangku mae ri Katte, lanri iKatte KalenTa le’ba’ ampauanga’ angkanaya ana’ cucungku situlusu’na laKipa’jari karaeng mae ri anne bansaya.
28 O, Batara Kaminang Tinggia, iKattemi Allata’ala; Sikontu janjinTa Kirupai, na anjo apa bajika le’ba’mi Kipa’janjiang mae ri nakke.
29 Lanri kammana anjo, kupalaki, poro mangngellaiKi’ naKibarakkaki jari-jariku, sollanna tulusu’ nakasia’na ke’nanga pangngamaseanTa sa’genna satunggu-tungguna. O, Batara Kaminang Tinggia, yangasenna anjo le’ba’mi Kipa’janjiang, jari tuli laKibarakkaki jari-jariku sa’genna satunggu-tungguna."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA