Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi tuadkonsi otik si Daud hun pakpak ni dolog ai, tonggor ma, roh ma si Siba, juakjuak ni si Mepiboset, manjumpahkonsi rap pakon saparangguan halode na marpalana, na mamboan dua ratus ruti, saratus turdun anggur na pinahorah, saratus kamata buah-buahan pakon anggur sada gusi hulingkuling.
2 Nini raja ai ma dompak si Siba, “Bahen ahamu do in?” Jadi nini si Siba ma, “Halode in bahen ajakan ni nasipuang, ruti in pakon buah-buahan in sipanganon ni parana-parana in, anjaha anggur in bahen inumon ni na latih i halimisan.”
3 Dob ai nini raja ai ma, “Ija do anak ni tuanmu?” Jadi nini si Siba, “Tonggor ma, tading do ia i Jerusalem, ai nini uhurni do, ʻSadari on ma paulakon ni halak Israel bangku harajaon ni ompungku.ʼ”
4 Dob ai nini raja ai ma dompak si Siba, “Tonggor ma, ho ma simada haganup na bani si Mepiboset ai.” Dob ai nini si Siba ma, “Manombah ma ahu bamu, sai dapotan idop ni uhur ma ahu i lobeimu, alo rajanami!”
5 Dob das raja ai hu Bahurim, tonggor ma, luar ma hunjai sada halak hun bani pangku ni si Saul, na margoran si Simei, anak ni si Gere; sanggah na roh ia hundohor inunut ma mamurai.
6 Igijigi ma si Daud bani batu, sonai homa ganup juakjuak ni si Daud, age pe ganup halak simbuei ai pakon ganup halak, pauanglima-puanglima mardalan i siamun pakon i sambilou ni raja ai.
7 Nini si Simei do bani bura-burani ai, “Laho, laho ma ho, alo dalahi sisibur daroh, ho dalahi na so margagan!
8 Domma ibalaskon Jahowa bam ganup daroh ni ginompar ni si Saul, na sinolukmu manrajai; anjaha domma ibere Jahowa harajaon in hu tangan ni si Absalom anakmai. Tongor ma, domma manginsonoh bam pambahenanmu, ai dalahi sisibur daroh do ho.”
9 Dob ai nini si Abisai, anak ni si Seruya ma dompak raja ai, “Mase ma buraan ni baliang na mateian tuannami? Palopas ham ma ahu mandipar, ase hutampulhon uluni ai.”
10 Tapi nini raja ai ma, “Ai aha partalianku bani nasiam, alo anak ni si Seruya? Ase mamurai pe ia, halani na hinatahon ni Jahowa do hu bani, ʻBurai ma si Daud!ʼ Halani ai, ise ma na pag mangkatahon, ʻMase ma bahenonmu sonai?ʼ”
11 Ambahni ai nini si Daud ma dompak si Abisai pakon dompak juakjuakni, “Tonggor ma, gari anakku, na hupupus sandiri mantahihon hosahku, samintolah anak ni halak Benjamin on ma lang? Paturut ma ia mamurai! Na hinatahon ni Jahowa do ia ai.
12 Andohar marpangulaki uhur ni Jahowa mangidah salahku, anjaha ibalaskon bangku na madear gantih ni papani on sadari on.”
13 Jadi inunut si Daud pakon hasomanni ai ma dalanni, anjaha si Simei ai inunut ma homa mardalan bani raboyon na padipar-dipar pakonsi anjaha lang maronti ia mamurai, manggijigi bani batu pakon manampakkon orbuk hu bani.
14 Dob ai das ma raja ai hu Bah Jordan rap pakon ganup simbuei ai na rap pakonsi, latih tumang. Ijai marsaran ma ia, pahosahkon.
15 Ia si Absalom pakon ganup halak simbuei ai, halak Israel, das ma hu Jerusalem anjaha si Ahitopel rap pakon sidea.
16 Anjaha dob das si Husai, halak Arki, huan-huan ni si Daud ai, hu bani si Absalom, nini si Husai ma hu bani, “Sai horas ma raja in! Sai horas ma raja in!”
17 Nini si Absalom ma dompak si Husai, “Sonin do parholong ni ateimu hu bani huan-huanmu? Mase ma lang laho ho rap pakon hasomanmu?”
18 Nini si Husai ma mambalosi si Absalom, “Lang, in na pinilih ni Jahowa pakon halak simbuei ampa ganup halak Israel, ia do simada ahu, anjaha rapkonsi do ahu.
19 Ambahni ai hu bani ise do ahu patut pambalosi? Ai lang hu bani anak ni raja in? Songon pambalosingku bani bapamu, sonai do pambalosingku bamu.”
20 Dob ai nini si Absalom ma dompak si Ahitopel, “Patugah pingkiranmu, aha do sibahenonta?”
21 Nini si Ahitopel ma dompak si Absalom, “Parayak ma parinangon ni bapamu, na tinadingkon ni bapamu, manramotkon rumah in; jadi bogeion ni ganup halak Israel ma, na dob butak ham bani bapamu, gabe lambin gogohni ma uhur ni halak na rap pakon ham.”
22 Dob ai ipajongjong sidea ma sada lampo-lampo bani si Absalom i atas ni tayub ai; jadi iparayak si Absalom ma parinangon ni bapani ai, ipaidah-idah ganup halak Israel.
23 Ia aturan, na niaturhon ni si Ahitopel bani panorang ai, usih do ai, songon na dob sinungkunkon hu bani Jahowa; sonai do ganup aturan ni si Ahitopel bani pangahap ni si Daud, ampa si Absalom.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA