Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E bakto Daud buru lebat dhari konco’na gumo’, o-tao badha oreng nyander ka salerana. Oreng jareya nyamana Ziba, dunorra Mefiboset, ngeba hemar sapasang. Hemar jareya emowadi roti dhu ratos meggi’, anggur kerreng saratos gundhung, wa’-buwa’an se gi’ cengngar saratos gintel ban aeng anggur sakanthong.

² Rato Daud mareksane ka oreng jareya, "Egabaya apa jareya kabbi bi’ ba’na?" Saodda Ziba, "Hemar se sapasang ka’dhinto badhi teteyannepon junandalem sareng kalowargaepon junandalem, roti sareng wa’-buwa’an ka’dhinto badhi teddha’annepon para pangerengngepon junandalem, aeng anggurrepon badhi tambana pelka’ manabi reng-oreng gapaneka lesso neng e ra-ara."

³ Rato pas mareksane ka oreng jareya, "Badha e dhimma Mefiboset, kompoyya lorana ba’na Saul rowa sateya?" "Gi’ paggun badha e Yerusalim," saodda Ziba, "sabab Mefiboset arassa yakin ja’ karaja’annepon Saul agungnga, samangken tanto epabali ka saleraepon sareng oreng Isra’il."

⁴ Dhabuna Daud ka Ziba, "Molae sateya dhi’-andhi’na Mefiboset daddi andhi’na ba’na kabbi." "Mator sakalangkong, guste," saodda Ziba. "Moga-moga abdidalem kengenga terros masenneng panggaliyannepon junandalem!"

⁵ E bakto Daud napa’ ka Bahurim, pas badha oreng kasorang se anyama Simei, ana’na Gera, gi’ sabala’an ban Saul. Oreng jareya nyander ka seddi’anna rombonganna rato sambi abasto Daud.

⁶ Simei agarujuk Daud ban ba-ponggabana, sanajjan Daud egaribbunge para pangerengnga ban para parwirana.

⁷ Simei abasto Daud sambi ngoca’ kantha reya, "Ondur! Ondur tokang mate’e oreng! Oreng daraka!

⁸ Ba’na arampas karaja’anna Saul! Sateya ba’na eokom bi’ PANGERAN polana mate’e la-balana Saul ce’ bannya’na. Karaja’anna ba’na bi’ PANGERAN la ebagi ka Absalom, ana’na ba’na. Sateya bangka ba’na, oreng daraka se dujan mate’e oreng!"

⁹ Abisai, ale’na Yowab, ana’na Zeruya, mator ka rato, "Aponapa pangaco ka’dhinto sareng junandalem me’ epanneng abasto junandalem kadi ka’dhissa’? Ngereng abdidalem nyo’ona edi sareng abdidalem etatta’a le’erra!"

¹⁰ Tape rato adhabu ka Abisai ban ka Yowab kaka’na, "La dina, ra, sengko’ ebasto ta’ arapa. Mon oreng jareya epakon bi’ PANGERAN, sapa se kobasa atanya arapa oreng jareya me’ ngalakone cara jareya?"

¹¹ Daud pas adhabu pole ka Abisai ban ka sakabbinna ponggabana, "Tang ana’ dibi’ aehteyar mateyana sengko’; arapa ba’na me’ heran nangale’e tengkana oreng Benyamin reya? PANGERAN dibi’ se makon oreng jareya abasto sengko’; daddi la dina panneng, ja’ pama-baramma oreng jareya, panneng tekka’a abasto.

¹² Pola PANGERAN me’ agateyagi tang kasossa’an reya sarta pas aberkadi sengko’ menangka gantena babaston jareya."

¹³ Daud ban pangerengnga pas nerrossagi parjalananna. Dineng Simei terros ajalan dhing-ngendhing e erengnga gumo’ noro’agi rombongan jareya sambi terros agarujuk bi’ bato ban tana.

¹⁴ Rato ban sakabbinna pangerengnga ce’ lessona e bakto napa’ ka Songay Yordan, daddi pas padha aistirahat e jadhiya.

¹⁵ Sabatara jareya Absalom ban sakabbinna oreng Isra’il se ngerengngagi padha maso’ ka kottha Yerusalim; Ahitofel noro’ keya.

¹⁶ E bakto Husai kancana Daud se esto rowa atemmo bi’ Absalom, Husai pas aera’, "Hidup rato! Hidup rato!"

¹⁷ Tape Absalom mareksane ka oreng jareya, "Baramma ba’na reya? Kemma kaestowanna ba’na ka sahabadda, Daud? Arapa ba’na me’ ta’ noro’ Daud?"

¹⁸ Saodda Husai, "Kadi ponapa abdidalem se ngerenga Daud? Abdidalem ka’dhinto ngerenga oreng peleyannepon PANGERAN, peleyannepon ra’yat sareng peleyannepon sadajana oreng Isra’il. Oreng gapaneka se badhi eereng sareng abdidalem.

¹⁹ Salaen dhari ka’dhinto, dhu pasera pole se badhi eabdi sareng abdidalem manabi ta’ pottraepon lora abdidalem? Abdidalem ampon ngabdi ka ramaepon junandalem, daddi samangken abdidalem badhi ngabdiya ka junandalem."

²⁰ Saellana jareya Absalom adhabu ka Ahitofel, "Baramma noro’ panemmona ba’na?"

²¹ Saodda Ahitofel, "Junandalem kodu manggi’i ler-sellerra ramaepon junandalem se epatogu karaton, junandalem pas apolong asaren sareng ler-seller gapaneka. Oreng Isra’il sadaja tanto oneng ja’ kalaban ngalakone lalakon se kadi ka’dhinto, junandalem eanggep moso sareng ramaepon. Daddi sadajana pangerengnga junandalem tanto sajan atamba bangal."

²² Daddi Absalom ebadhiyagi kemah e attassa ata’na karaton se rata. Kalaban esakseyagi sakabbinna oreng Absalom maso’ pas apolong asare ban ler-sellerra ramana.

²³ E bakto jareya sabarang babala’anna Ahitofel etoro’ akantha se eanggep dhabuna Allah dibi’; Daud ban Absalom padha atoro’ ka babala’anna Ahitofel jareya.

2 Samuel

Video 2 Samuel 16

Ikuti Kami:

KONTAK | PARTISIPASI | DONASI