Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kenca sitik denga ibentasi Daud tampuk uruk e, rempet ia ijumpai Siba suruh-suruhen Mepiboset. Iteguna dua kelede mbaba 200 roti, 100 tandan anggur si nggo kerah, 100 iket buah pangan si mbaru denga iputikken, sada kantongen dem lau anggur.

² Nungkun Raja Daud man Siba, "Man kadendu enda kerina?" Erjabap Siba, "Kelede enda man ersaken keluarga Raja, roti ras buah pangan enda man pangan anak buahndu, anggur enda man inemenna i taneh si mesawang adi latih iakapna."

³ "I ja Mepiboset kempu tuanndu Saul?" nina raja nungkunsa. "Ia tading i Jerusalem," nina Siba. "Sabap iakapna maka genduari iulihken me man bana kerajan nini bulangna Saul."

⁴ Nina raja man Siba, "Kerina sikerajangen Mepiboset genduari jadi sikerajangenndu." "Kai nindu kuikutken," nina Siba. "Ngenalah atendu tetap nandangi aku, o Raja!"

⁵ Kenca Raja Daud seh i Bahurim, sekalak keluarga Saul, Simei anak Gera reh njumpai Daud. Kenca ia seh isumpahina Daud la erngadi-ngadi.

⁶ Jenari ibenteri Simei Raja Daud ras pegawaina, aminna pe Daud i keleweti tentera ras pengawal peribadina.

⁷ Isumpahi Simei Raja Daud nina, "To lawes kam! Ndarat! Pemunuh! Penjahat!

⁸ Ibuatndu kerajan Saul, emaka genduari TUHAN ngukum kam, sabap ibunuhndu nterem keluarga Saul. Nggo ibereken TUHAN kerajan e man anakndu Absalom, emaka nggo kam bene, o pemunuh!"

⁹ Abisai si nandena Seruya ngerana man raja, "O Raja, ngkai maka iberendu biang e numpahi kam? Pelepas kudahi ia maka kutampul kerahungna!"

¹⁰ "Labo urusenndu e," nina raja man Abisai ras man seninana Joap. "Adi isumpahina aku sabap TUHAN si nuruhsa, ise kin lit hakna nungkunsa, ngkai maka ilakokenna e?"

¹¹ Jenari nina Daud man Abisai ras pegawaina kerina, "Anakku jine pe ibunuhna atena aku. Ngkai maka mamang atendu ngidah perbahanen kalak Benyamin enda? TUHAN si nuruh ia numpahi, emaka ula iganggundu ia, pelepas ia sumpah-sumpah.

¹² Ntah mawen iperdiateken TUHAN kiniseranku jenari IberekenNa bangku pasu-pasu gancih sumpahna e."

¹³ Jenari iterusken Daud perdalanenna ras kerina pengikutna. Simei pe lalap ngikut-ngikut erdalan i awak uruk e. Janahna erdalan sumpah-sumpah ia, ibenterina rombongen Daud alu batu, ras taneh.

¹⁴ Latih iakap Daud ras rombongenna kenca seh i Jordan, emaka ngadi ia.

¹⁵ Absalom ras kerina bangsa Israel bage pe Ahitopel ikut bengket ku Jerusalem.

¹⁶ Sanga Usai teman si iteki Daud jumpa ras Absalom, ersurak Usai nina, "Mejuah-juahlah Raja! Mejuah-juahlah Raja!"

¹⁷ "Ngkai maka kam la setia man temanndu Daud?" nungkun Absalom kempaksa. "Ngkai maka la kam ras lawes?"

¹⁸ Nina Usai njabapsa, "Ja nge aku nggit! Aku tetap erpihak ras kalak si ipilih TUHAN, si ipilih kalak enda, si ipilih kerina bangsa Israel. Aku tading ras kam.

¹⁹ I babo si e kerina jadi suruh-suruhen ise kin aku arusna, adi la jadi suruh-suruhen anak tuanku? Mbarenda aku suruh-suruhen bapandu, dage genduari aku ka jadi suruh-suruhenndu."

²⁰ Kenca bage nungkun Absalom man Ahitopel nina, "Genduari kita nggo seh i jenda, kai iakapndu si man bahanenta?"

²¹ Njabap Ahitopel, "To pedemi gundik bapandu si tading njaga istana. Alu bage kerina kalak Israel meteh kam nggo rimbang ras bapandu, emaka kerina pengikutndu reh tetapna ukurna."

²² Kenca bage ipajekken kalak enda kemah man Absalom i datas tarum istana, jenari bengket Absalom, ipedemina gundik bapana janah ngidah kalak kerina.

²³ Kerina pedah-pedah Ahitopel tupung e ialoken tempa-tempa bali ras kata Dibata. Daud ras Absalom pe ngikutkenca.

2 Samuel

Video 2 Samuel 16

Ikuti Kami:

KONTAK | PARTISIPASI | DONASI