Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri wattunna matemo Saul, ammotere’mi Daud battu ri pa’bundukanga ambetai tu Amalek, nampa ammantang ri Ziklag ruangallo.
2 Ammukona, nia’mo se’re tu rungka battu ri pakkemaanna Saul. Salaku pammatei angkanaya susa kamateangi, nakekke’mi pakeanna siagang naboneimi butta ulunna. A’lampai mange ri Daud nampa su’ju’ ri dallekanna.
3 Akkuta’nammi Daud ri ia angkana, "Battu kemaeko?" Appialimi angkana, "Lappasaki atanta battu ri pakkemaanna tu Israel."
4 Akkuta’nangi Daud angkana, "Caritasai apa le’baka kajariang!" Appiali anjo tu rungkaya angkana, "Lari tantarana ikambe battu ri pa’bundukanga, siagang teai sipato’ jaina mate lalang bundu’, kammayami Saul siagang Yonatan mate tongi."
5 Akkuta’nangi Daud angkana, "Antekamma nakkulle nuasseng?"
6 Appialimi angkana, "Sitabang le’baki nia’ atanta ri Moncong Gilboa, nanacini’ atanta Saul ammanjeng ri pokena, nampa a’reppese’mo kareta-karetana siagang tantara pajaranna musua ero’ angkurungi.
7 Assailei Saul mae ri boko, na nacini’ atanta, nampa nakio’ atanta. Nappialimo atanta, angkana, ‘Iye’ karaeng.’
8 Akkuta’nangi angkana inai atanta. Na napaumo atanta angkanaya anne atanta tu Amalek.
9 Nampa nakanamo ri atanta, ‘Maeko, na nubunoa’! Sarringi lokokku, siagang a’birimma’ mate.’
10 Jari a’reppese’mi atanta mae ri ia nampa nabuno, lanri naassengi atanta angkanaya punna tu’guruki lanri tanakulleami ammenteng poleang, ma’nassa tena tamatenaja. Nampa naalle atanta songko’ kakaraenganna battu ri ulunna siagang ponto niaka ri limanna, nampa naerang atanta mae anrinni ri karaengku."
11 Nalangngere’na Daud anjo kammaya, nakekke’mi pakeanna lanri si’nana. Na sikontu ana’-ana’na appakamma ngaseng tommi.
12 Angngarru’mi ke’nanga siagang susami. Kammayatompa appuasami ke’nanga sa’genna bangngi lanri Saul siagang Yonatan, siagang lanri ra’ya’ Israel, umma’Na Batara, lanri teai sipato’ jaina mate lalang anjo pa’bundukanga.
13 Nampa akkuta’nang Daud ri anjo tu rungka angngeranga kabara’ angkana, "Battu kemae assala’nu?" Appialimi angkana, "Anne atanta tu Amalek, tubattu-battu ri pa’rasanganna karaengku."
14 Akkanami Daud, "Barani sikaliko ambunoi karaeng Napilea Batara!"
15 Nampa nakio’ kalase’renna ana’-ana’na siagang naparentakang angkana, "Bunoi anjo taua!" Nacokami anjo tu rungka battua ri Amalek sa’genna mate.
16 Nakana Daud ri anjo tu rungka battua ri Amalek, "Ikau kalennu ampattantui anne hukkungang matea mae ri kalennu lanri nuakuina angkanaya ikau le’ba’ ambunoi karaeng Napilea Batara!"
17 Le’baki anjo nakelongammi Daud anne kelong karruka lanri Saul siagang Yonatan,
18 siagang naparentakangi sollanna nipangngajarrang anne kelonga mae ri suku Yehuda. (Anne kelonga niaki tattulisi’ lalang ri Kitta’ Yasar.)
19 "O Israel, ri bulu’-bulu’nu, niaka anjoreng matei pahlawanna, ana’ bura’nena pa’rasanganga, runtungi ke’nanga a’jari bunganna bansaya.
20 Dasi-dasi natanalangngera tu Gat anjo kabaraka. Dasi-dasi sepe’-sepe’ Askelon tanagappayai kabara’na anjo passalaka. Gassingka akkio’ rannui bai’-baine tu Filistin gassingka suaraki akkio’ baine kapereka.
21 He, bulu’-bulu’na Gilboa, pilangngeri pakkiokku: Gassingka nabasaiko saliuka siagang bosia! Lappassangi kalotoro’ naroso’ kokonnu siagang parannu. Nasaba’ anjorengi tassambila pa’lapa’ pa’bundukanna tu baranaia. Na taiang tommo pa’lapa’ pa’bundukanna Saul, tenamo naniminyaki pole.
22 Panana Yonatan porei, ammuno tau. Pa’danna Saul tena nangngasseng angngamaseang ammuno musu, ammanraki bali.
23 Saul siagang Yonatan, kamma sombere’na siagang nikamaseangi; tuli akkana se’re lalang tallasa’na siagang lalang matena; la’bi lintaki na jangang-jangang garuda, la’bi gassingi na singa rungkaya.
24 He, tubaine Israel, karruki Saul karaenga! Ammodeako siagang baju eja ka’jalaka, siagang ambelo-beloako bulaeng paramata ga’gaya.
25 Matemi sikamma pahlawanga, tu’guru’mi ri parang pa’bundukanga siagang ri bulu’-bulu’ sinoa ammonrangi Yonatan, ka’doro’.
26 He, Yonatan sari’battangku, paccei nyawaku, lanri lompona anggarannu mae ri kalengku. Pangngamaseannu mae ri nakke tamaka la’biri’na ba’lalo la’bi na pangngamaseanna tu bainea.
27 Matemi sikamma pahlawanna bansaya. Sia-siami sanjatana ke’nanga!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA