Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca Saul mate mulih Daud i bas perang naluken Amalek nari. Kenca bage tading ia i Siklak dua wari dekahna.
2 I bas wari si peteluken reh sekalak anak perana i bas perkemahen Saul nari ndahi Daud. Tandana ceda atena irigatkenna uisna dingen itamana abu i babo takalna, janah erjimpuh ia i lebe-lebe Daud.
3 "I ja nari kam?" nina Daud nungkunsa. "Aku nggo pulah i bas tentera Israel nari," nina ngaloi.
4 "Turiken man bangku kai si nggo jadi," nina Daud. "Tentera kami kiam nadingken peperangen," nina anak perana ndai, "janah nterem kal i bas kami nggo ibunuh. Saul ras anakna Jonatan pe terbunuh."
5 "Uga pemetehndu maka Saul ras Jonatan nggo mate?" nina Daud nungkun anak perana e.
6 Nina anak perana e, "Paksa si e rembang aku i datas Deleng Gilboa, jenari kuidah iciken-cikenken Saul lembingna. Gereta musuh ras kalak si ngersak kuda reh ndeheri ia.
7 Kenca bage itulihkenna ku pudi, idahna aku, emaka ilebuhna. Ningku njabapsa, 'Kai Tuan!'
8 Isungkunna ise aku, emaka kukataken man bana maka aku sekalak bangsa Amalek.
9 Kenca bage nina, 'Mari ku jenda, bunuh aku! Nggo luka aku mekelek, emaka nandangi mate me aku.'
10 Emaka kudeheri ia kenca bage kubunuh, erkiteken kueteh maka la banci la mate me ia kenca ia guling. Emaka kubuat mahkota i bas takalna ras gelang i bas tanna nari janah enda kubaba man bandu, Tuan."
11 Megi si e irigatken Daud uisna janah kalak si ras ia pe ngikutken perbahanenna.
12 Ceda ate kalak enda kerina, ngandung ia janah erpuasa ngayak ben, erkiteken Saul, Jonatan ras Israel, bangsa TUHAN e, sabap lanai tanggung teremna kalak si mate i bas peperangen.
13 Isungkun Daud anak perana si mbaba berita e nina, "Ja nari kam?" Nina anak perana ndai, "Aku kalak Amalek tapi ringan i negerindu."
14 Isungkun Daud ia nina, "Ngkai maka pang kam munuh raja si ipilih TUHAN?"
15 Jenari ilebuh Daud sekalak anak buahna, janah nina, "Bunuh anak enda!" Igudamna anak perana e, ibunuhna.
16 Janah sanga e nina Daud man bangsa Amalek e, "Pengelegindu nge ukumen si reh man bandu e. Perbahan ngaku kam munuh raja pilihen TUHAN."
17 Itangisken Daud ende-enden ate ceda enda erkiteken kematen Saul ras anakna Jonatan,
18 janah isuruhna maka iajarken ende-enden e man rayat Juda. (Ende-enden enda tersurat i bas Kitap Jasar.)
19 "I uruk-uruk Israel nggo mate peminpin-peminpinta! Tenteranta si mbisana kal nggo ampar!
20 Ula momoken e i Gat ntah i pasar-pasar kota Askelon. Sabap adi bage meriah iakap diberu-diberu bangsa Pilisti. Ula erkiteken si emaka meriah ukur singuda-nguda si la nandai Dibata.
21 Ula lit udan ras embun ndabuh ku babo uruk-uruk Gilboa; pelepas tetap jadi taneh tenggiring juma-jumana. Sabap i jah me ampang-ampang si mbisa ampar keliamen, ampang-ampang Saul si lanai iminaki salu minak.
22 Panah Jonatan tuhu erbisa, pedang Saul la meteh perkuah ate, janah musuh si megegehna kal pe ibunuhna.
23 Saul ras Jonatan eme si ikelengi ras mehuli, mate ras mate, nggeluh ras nggeluh ia. Pedasen ia asang rajawali kabang, gegehen asangken singa.
24 O kam diberu-diberu Israel ngandungilah Saul! Iuisina kam salu uis gara si meherga, janah ihiasina kam salu emas ras permata.
25 Tentera si mbisa nggo guling, mate terbunuh i bas perang. Jonatan mate ampar i das uruk-uruk.
26 Ceda ateku erkiteken kam, o seninangku Jonatan; seh kal kelengna ateku kam. Lanai tanggung keleng atendu man bangku, lebihen asang keleng ate sekalak diberu pe.
27 Nggo amparen tentera si mbisa, senjatana ampar lanai lit gunana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA