Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Saellana Saul seda, Daud abali dhari perrang saellana makala oreng Amalek, pas alenggi e Ziklag dhu are abidda.
2 Kalagguwanna, badha oreng lalake’ dha-ngodha kasorang dhari parkemahanna Saul. Menangka tandha kasossa’anna kalambina esebbit ban cethagga epobuwi tana. Oreng jareya ngadhep ka Daud pas asojud e ajunanna.
3 Daud mareksane ka oreng jareya, "Ba’na dhari dhimma?" Sambidda oreng jareya, "Abdidalem buru dhari parkemahannepon oreng Isra’il."
4 Dhabuna Daud, "Mara careta’agi, badha kadaddiyan apa?" Sambidda oreng jareya, "Tantara Isra’il buru dhari paperrangan, bannya’ se mate, tamaso’ Saul sareng pottrana, Yonatan."
5 "Ba’na me’ tao?" ca’na Daud.
6 Sambidda, "Abdidalem kalerressan badha e Gunong Gilboa, abdidalem nengale Saul nyandar ka tombagga, ta-karetana moso sarengngan tantarana se nompa’ jaran ampon semma’ ngepponga Saul.
7 Saul atole ka budhi, ngoladi abdidalem, abdidalem pas edikane, ban abdidalem nyambit, ‘Ponapa, guste?’
8 Saul mareksane pasera abdidalem ka’dhinto, ban abdidalem ngatore oneng ja’ abdidalem ka’dhinto oreng Amalek.
9 Saul pas adhabu kadi ka’dhinto ka abdidalem, ‘Dha’ enna’, ra, mara pate’e sengko’ reya! Sengko’ loka ce’ sarana ban sengko’ para’ mateya.’
10 Daddi abdidalem nyander; sareng abdidalem Saul pas epate’e, sabab abdidalem oneng ja’ manabi Saul robbu polana ta’ kowat ngadek pole, tanto gi’ seda jugan. Abdidalem ngala’ makotha e serana sareng gellang e lengngenna, sareng abdidalem pas ebakta ka ka’dhinto."
11 E bakto meyarsa jareya Daud ce’ sossana, pas nyebbit rasoganna, reng-orengnga noro’agi kantha jareya keya.
12 Daud ban reng-orengnga molar agingging ban noduwagi kasossa’an sarta aseyam sampe’ malem kaangguy Saul ban Yonatan, ban kaangguy ra’yat Isra’il, ommadda PANGERAN, sabab ce’ bannya’na se mate e dhalem paperrangan.
13 Saellana jareya Daud mareksane ka oreng ngodha se ngeba kabar jareya, "Ba’na dhari dhimma asalla?" Sambidda oreng jareya, "Abdidalem ka’dhinto oreng Amalek, oreng manca se badha e nagaraepon junandalem."
14 Dhabuna Daud, "Ba’na me’ ce’ bangalla mate’e rato peleyanna PANGERAN!"
15 Samarena jareya Daud pas adikane oreng baba’anna epakon mate’e oreng jareya. Oreng Amalek gella’ etatta’ le’erra sampe’ mate.
16 Dhabuna Daud ka oreng Amalek gella’, "Ba’na se madhateng okoman reya ka badanna dibi’ kalaban ngakone ja’ ba’na mate’e rato peleyanna PANGERAN!"
17 Saellana jareya Daud molar sambi anyanye lagu tangesan kaangguy Saul ban Yonatan se la seda,
18 ban makon sopaja nyanyeyan jareya eajarragi ka suku Yehuda. (Nyanyeyan jareya etoles e dhalem Ketab Yasar.)
19 "Isra’il, e mo’-gumo’na ba’na bannya’ pahlawan kembangnga nagara padha seda abilla bangsana.
20 Mandar oreng Gat ta’ ngedhinga berta reya. Mandar oreng e rong-lorong Askelon ta’ taowa. Ja’ sampe’ babine’an Filistin gumbira atena, ja’ sampe’ babine’an se kaper asorak kasennengngan.
21 He, mo’-gumo’ Gilboa, edhingngagi tang caca reya: Mandar ba’na ta’ egaggarana ebbun ban ojan! Me’ olle teggal ban sabana daddi tana kajal. Sabab e jadhiya tamengnga oreng se bangalan ngalathak tadha’ ajina. Ban tamengnga Saul tattaen, ta’ tao emennya’e pole.
22 Sapa se ekenneng panana Yonatan masthe mate, ta’ kera odhi’ pole. Peddhangnga Saul ta’ andhi’ panganeser sakabbinna moso epatompes epate’e.
23 Saul ban Yonatan ce’ labana ban ekataresnae oreng; rokon e dhalem odhi’na sampe’ sedana, aceppeddan dhari ellang, akowadan dhari macan.
24 Babine’an Isra’il, mara tangese Saul, ratona ba’na! Se adandane ba’na bi’ kalambi gus-bagus abarna mera, se ngeyase ba’na bi’ emmas tor mamatan.
25 Para pahlawan padha adinggal dunnya, e medan paperrangan; e mo’-gumo’ se ce’ seppena Yonatan gerra tadha’ nyabana.
26 Adhu Yonatan, tang taretan, tang ate ancor mekkere ba’na; sabab ba’na tang buwana ate. Kataresna’anna ba’na ka sengko’ talebat socce, ngalebbi’i kataresna’anna oreng babine’.
27 Pahlawan kembangnga nagara la pada seda; sanjatana pada edina tadha’ gunana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA