Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dob ai isuruh raja ai ma na patumpuhon hu lobei ni, haganup pangintuai ni Juda pakon Jerusalem.

² Dob ai tangkog ma raja ai hu Rumah ni Jahowa rap pakon ganup dalahi na hun Juda ampa pangisi ni Jerusalem pakon malim ampa nabi, haganup bangsa ai, na etek na godang, gabe ibasa ma ibogei sidea sagala hata ni buku parpadanan, na jumpah i Rumah ni Jahowa.

³ Dob ai jongjong ma raja ai i lambung tiang ai, anjaha ibahen ma padan i lobei ni Jahowa, paboa maningon irikkononni do Jahowa, anjaha ramotkononni titah-Ni, hasaksian-Ni pakon aturan-Ni, hun bani gok ni uhurni pakon gok ni tonduyni, anjaha dalankononni do hata ni padan ai, na tarsurat ibagas buku ai. Haganup do bangsa ai mangeakkon padan ai.

⁴ Dob ai iparentahkon raja ai ma si Hilkia, sintua ni malim ai pakon malim paidua pakon sijaga pintu, ase ipadarat sidea hun Rumah ni Jahowa ganup parugas, na pinauli bani baal pakon bani Ashera pakon bani ganup bala ni langit; itutung ma ai i darat ni Jerusalem bani ladang Kidron, anjaha iboan ma abuanni hu Betel.

⁵ Anjaha ilopaskon raja ai ma malim-malim ni naibata na legan ai, na pinabangkit ni Raja-raja Juda, laho manutung dahupa bani panumbahan na i atas buntu-buntu, ibagas huta-huta ni Juda pakon inggot ni Jerusalem; sonai homa na manutung dahupa hu bani baal, hu bani mata ni ari, bulan bintang pakon ganup bala ni langit.

⁶ Anjaha ipadarat ma Ashera ai hun bani Rumah ni Jahowa, hu darat ni Jerusalem, hu habungan ni Bah Kidron, lanjar itutung ma ai i habungan ni Bah Kidron, anjaha isaburhon ma abuanni ai hu tanoman ni halak simbuei.

⁷ Ambahni ai iparreong do rumah, ianan ni dalahi marjolmahon dalahi, na dohor hu Rumah ni Jahowa, partonunan ni naboru, manonun hiou lampolampo bani Ashera.

⁸ Dob ai ihatahon ma roh ganup malim hun huta ni Juda, anjaha ihatahon ma butakan panumbahan na i atas buntu-buntu, panutungan ni malim bani dahupa, singgan ni Geba das hu Berseba; anjaha iparseda do panumbahan ni begu juma na i horbangan, na jongjong bani dalan masuk i horbangan Josua, kopala ni huta ai, hampit sambilou, anggo masuk halak hu horbangan ni huta ai.

⁹ Tapi anggo malim ni sisumbah-sumbahan, seng bulih sidea manggalang i atas ni anjapanjap ni Jahowa na i Jerusalem, tapi bulih do sidea mangan ruti na so niigaran i tongah-tongah ni saninani.

¹⁰ Ibutaki do homa parapuyan na i habungan Ben-Hinnom, ase ulang tarbahen barang ise be manutung anakni barang boruni bahen galangan hu bani Molooh.

¹¹ Anjaha ipadaoh do huda na pinapulig ni Raja-raja Juda laho pasangapkon mata ni ari, na i lambung labah hamasukan hu Rumah ni Jahowa, hu kamar ni Netan-Melek siparugas ai, na marianan i rumah na rapat hujai; anjaha itutung ma gareta ni mata ni ari ai bani apuy.

¹² Sonai homa anjapanjap na i atas tayub ni kamar pardatas ni si Ahas, na pinauli ni Raja-raja Juda, pakon anjapanjap, na pinauli ni si Manasse bani alaman ni Rumah ni Jahowa na dua ai, iparseda do ai anjaha iropuki, anjaha isaburhon ma abuanni ai hu Bah Kidron.

¹³ Ibutaki raja ai do panumbahan na i atas buntu-buntu na hampit hapoltakan ni Jerusalem, na hampit dangsina ni Dolog Jetun, na pinauli ni si Salomo raja ni Israel, bani Astarot, gana-gana ni halak Sidon, pakon bani Kamos gana-gana ni halak Moab, ampa bani Milkom, gana-gana ni halak Ammon, haganupan ai ibutaki raja ai do.

¹⁴ Iropuki do tiang sisombah-sombahon anjaha iroboh do sisombahon Ashera, anjaha igoki do hajongjonganni ai bani holi-holi ni na matei.

¹⁵ Sonai homa anjapanjap na i Betel, ianan panumbahan na pinauli ni si Jerobeam, anak ni si Nebat, na mambahen Israel mardousa, age anjapanjap on ampa panumbahan na i buntu-buntu ronsi batu-batuni irosaki do gabe orbuk; itutung do homa sisombahon Ashera ai.

¹⁶ Sanggah na marhusor ai si Josia, iidah ma tanoman ai i dolog ai; isuruh ma na mambuat holi-holi ai hun tanoman ai, anjaha itutung ma ai i atas ni anjapanjap ai laho pabutakkon ai, romban hu bani hata ni Jahowa, na dob pinatugah ni halak ni Naibata, na dob palumbahon pasal ai.

¹⁷ Dob ai nini raja ai ma, “Patung aha do na huidah ai ijai?” Jadi nini parhuta ai ma hu bani, “Tanoman ni halak ni Naibata do ai, na roh hun Juda, na palumbahon pasal na binahenmu on hu bani anjapanjap na i Betel.”

¹⁸ Nini raja ai ma, “Paturut ma ai; ulang ma dong na mangkahua holi-holini!” Jadi seng be ikahua sidea holi-holini ai, rap pakon holi-holi ni nabi ai, na roh hun Samaria.

¹⁹ Ambah ni ai iparreong si Josia do ganup rumah ni sisumbahon na i atas buntu-buntu na i huta Samaria, sagala pinauli ni Raja-raja Israel, laho mamuhoi ringis ni Jahowa; ibahen do hujai romban hu bani na binahenni i Betel.

²⁰ Dob ai isayati ma ganup malim ni rumah panumbahan na i atas buntu-buntu ai, na adong ijai, i atas ni anjapanjap ai, anjaha itutung ma holi-holi ni jolma i atas ni. Dob ai mulak ma ia hu Jerusalem.

²¹ Dob ai nini raja ai ma hu bani halak simbuei ai, “Marpesta paska ma nasiam bani Jahowa, Naibata nasiam, songon na tarsurat ibagas buku parpadanan on.”

²² Ai seng ongga be marpesta paska sidea sonai singgan panorang ni panguhum na manguhumi halak Israel, barang sadokah panorang ni Raja-raja Israel, barang Raja-raja Juda pe.

²³ Pasapuluhualuhtahunkon dob manrajai si Josia, ai pe ase marpesta paska sidea hu bani Jahowa i Jerusalem.

²⁴ Ipadaoh Raja Josia ma homa haganup halak na siar-siaran, partondung, terapim, gana-gana ampa haganup sihagigihononkon, na dapot idahon i tanoh Juda pakon i Jerusalem, laho pasaudkon hata ni titah ai, na tarsurat ibagas buku, na jumpah Malim Hilkia ibagas Rumah ni Jahowa.

²⁵ Anjaha seng dong songonsi age sada raja na parlobei hun bani, na paubahkon uhurni hu bani Jahowa hun bani gok ni uhurni, hun bani gok ni tonduyni pakon hun bani gok ni gogohni, romban hu bani titah ni si Musa; sonai homa seng dong be songonsi raja na bangkit i pudi ni.

²⁶ Age pe sonai seng marpangulaki uhur ni Jahowa hun bani pargajag ni ringis-Ni na banggal ai; sai gajag do ringis-Ni dompak Juda, halani haganup pambahenan ni si Manasse na mamuhoi Ringis-Ni ai.

²⁷ Dob ai nini Jahowa ma, “Age Juda padaohon-Ku do hun lobei ni bohing-Ku, songon Israel na dob Hupadaoh, anjaha ambukkonon-Ku do huta on na dob Hupilih on, ai ma Jerusalem pakon rumah na dob pala namin huhatahon pasal ai: Ijai do marianan goran-Ku!”

²⁸ Barita na legan ai ope pasal si Josia pakon ganup na hinorjahonni, ai lang tarsurat do ai ibagas buku Barita ni raja-raja ni Juda?

²⁹ Bani panorangni ai tangkog do Parao Neko, raja ni Masir, laho marporang dompak raja ni Assur das hu Bah Eufrat; laho ma Raja Josia manjumpahkonsi, tapi italuhon Parao Neko do raja ai i Megiddo, dobkonsi iidah ia.

³⁰ Dob ai iboan juakjuakni ma bangkei ni raja ai i atas gareta, hun Megiddo hu Jerusalem, anjaha itanom ma ia ibagas tanomanni. Dob ai ipabangkit bangsa parnagori in ma si Joahas, anak ni si Josia, anjaha iminaki ma ia pabangkitkonsi gabe raja, gantih ni bapani ai.

³¹ Marumur dua puluh tolu tahun do si Joahas sanggah na bangkit raja ai ia, anjaha tolu bulan do ia marrajai i Jerusalem; si Hamutal do goran ni inangni, boru ni si Jeremia, hun Libna.

³² Ihorjahon do sogam ni uhur ni Jahowa, songon na binahen ni ompungni.

³³ Dob ai ihatahon Parao Neko ma na manranteisi i Ribla, i tanoh Hamat, ase ulang be manrajai ia i Jerusalem, anjaha hona dangdang ma pangisi ni tanoh ai ibahen saratus talenta pirak pakon sada talenta omas.

³⁴ Dob ai ipabangkit Parao Neko ma si Eliakim, anak ni si Josia gabe raja gantih ni bapani ai, anjaha ipaubah ma goranni gabe si Joyakim; tapi anggo si Joahas iboan do hu tanoh Masir, lanjar matei ijai do ia.

³⁵ Ibere si Joyakim ma pirak pakon omas ai hu bani Parao; tapi pangisi ni tanoh ai do ihatahon manggugui pirak siberehononni ai, na hinatahon ni Parao ai. Ganup pangisi ni tanoh ai manggugui pirak pakon omas ai romban hu bani gogohni bei, siberehonon hu Parao Neko.

³⁶ Marumur dua puluh lima tahun do si Joyakim sanggah na bangkit raja ai ia, anjaha sapuluh sada tahun do ia manrajai i Jerusalem; goran ni inangni si Zebuda do, boru ni si Pedaya, hun Ruma.

³⁷ Ihorjahon do sogam ni uhur ni Jahowa, usih songon na binahen ni ompungni.

2 Raja-raja

Video 2 Raja-raja 23

Ikuti Kami:

KONTAK | PARTISIPASI | DONASI