Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Rato Yosiya adikane para pamimpin Yehuda ban Yerusalim.
2 Saellana jareya laju meyos ka Padalemman Socce, eerengngagi para imam, para nabbi ban sakabbinna ra’yat se mesken ban se sogi. Rato ngadek e seddi’na pelar se esadhiya’agi kaangguy rato malolo e jadhiya, e adha’na reng-oreng gella’, rato maos epakaja sakabbinna essena ketab parjanjiyan se etemmo e Padalemman Socce epakaedhing ka reng-oreng se badha e jadhiya. Saellana jareya rato mabadha parjanjiyan ban PANGERAN se anyata’agi salerana ta’ada ka PANGERAN, ban alampa’agiya sakabbinna papakon ban kom-hokomma, banne pera’ e laherra, tape terros ka dhalem atena. Rato ajanji keya alampa’agiya saradda parjanjiyanna PANGERAN ban ommadda akantha se esebbuttagi e dhalem ketab jareya. Ra’yadda kabbi padha noro’ ajanji ta’ada ka parjanjiyan jareya.
3 (23:2)
4 Saellana jareya rato makon Imam Agung Hilkiya, para imam se abanto ban para pangawal se atugas e labangnga Padalemman Socce, sopaja makalowar dhari Padalemman jareya sakabbinna pakakas se eangguy nyemba Ba’al, Dewi Asyera ban tang-bintang. Rang-barang jareya bi’ Rato Yosiya eobbar kabbi e lowar kottha e seddi’na Cora Kidron, abuna pas egiba ka Betel.
5 Para imam se eangkat to-rato Yehuda se epatugas e kennengnganna panyemba’anna diba e tha-kottha Yehuda ban e sabingkerra Yerusalim epaambu kabbi; bariya keya mam-imam se ngatorragi kurban ka Ba’al, are, bulan, planet ban tang-bintang.
6 Arcana Dewi Asyera epakalowar dhari Padalemman Socce, egiba ka lowar kottha ka Cora Kidron. E jadhiya arca jareya eobbar, arengnga etoto epaalos, abuna etabur ka attassa koburan omom.
7 Mar-kamar e Padalemman Socce se egabay kennengnganna del-sondella kowel se nyondel menangka kabakteyan ka diba, epaancor. (E mar-kamar jareya babine’an atennon kaen se eangguya e bakto nyemba’a ka Dewi Asyera.)
8 Mam-imam se badha e tha-kottha Yehuda bi’ Yosiya epakon ka Yerusalim kabbi, saellana jareya e saantero nagara Yehuda ba-mezbana diba se badha e man-dhimman se eangguy mam-imam mon ngatorragi kurban epanajjis kabbi. Mam-imam jareya ta’ eedine mabadha kabakteyan e Padalemman Socce, pera’ eedine ngakan roti se ta’ eragi’i se esadhiya’agi kaangguy ca-kancana. Ba-mezba se malolo eangguy kaparlowanna kabakteyan ka diba e seddi’na labang saketheng se epaddek Yusak, wali kotthana nagara jareya, epagujur. Labang saketheng jareya kennengnganna e kacerra Labang Saketheng Otama e jalan se elebadi oreng mon maso’a ka kottha.
9 (23:8)
10 Tofet, kennengnganna oreng nyemba ka diba e Cora Hinom, epanajjis. Daddi la tadha’ pole oreng se ngobbar ana’na menangka kurban obbaran ka Diba Molokh.
11 Ran-jaran se bi’ to-rato Yehuda eangguy malolo kaangguy nyemba ka are ebuwang, ban ta-kareta se eangguy e dhalem kabakteyan jareya eobbar. (Ta-kareta jareya esaba’ e palataranna Padalemman Socce, e seddi’na labang saketheng, ta’ jau dhari mar-kamar se egabay kennengnganna Natan Melekh, settong oreng se apangkat tenggi.)
12 Ba-mezba se ekagabay to-rato Yehuda e ata’na mar-kamarra Rato Ahas, epaancor. Bariya keya ba-mezba se ekagabay bi’ Rato Manasye e palataran se dhadhuwa’ e Padalemman Socce, bi’ Yosiya epalejjar, ban jar-lejjaranna ebuwang ka Cora Kidron.
13 Bariya keya ba-mezba e bagiyan temorra Yerusalim, e lao’na Gumo’ Kajahadan epanajjis. Ba-mezba jareya ekagabay bi’ Rato Sulaiman kaangguy kaparlowan nyemba’a ba-diba se majitjit, iya areya Asytoret diba bine’na bangsa Sidon, Kamos dibana bangsa Mo’ab, ban Milkom dibana bangsa Amon.
14 Gu-tuguna diba ban arcana Dewi Asyera epagujur, saellana jareya tana se ekennengnge pamaddegganna gu-tugu ban ca-arca jareya, bi’ Yosiya etembuk bi’ lang-tolangnga manossa.
15 Kennengnganna kabakteyan e Betel se epaddek Rato Yerobeyam pottrana Nebat, iya areya rato se daddi lantaranna oreng Isra’il dusa ka PANGERAN bi’ Yosiya eparosak keya. Saellana jareya mezba e kennengnganna kabakteyan bi’ Yosiya eta’-tatta’ pas eobbar epabareng ban arcana Dewi Asyera se badha e jadhiya.
16 Saellana jareya Yosiya atole, pas ngoladi badha pan-barampan makam e attassa gunong. Kam-makam jareya laju epakon bungkar; lang-tolang se badha e dhalemmanna eobbar e attassa mezba se teppa’na rabbang jareya. Kantha jareya carana Yosiya manajjis mezba jareya. Daddi la kalakon apa se eramallagi lamba’ bi’ nabbina PANGERAN e bakto Rato Yerobeyam teppa’na ngadek e seddi’na mezba jareya baktona badha paraya’an. Saellana jareya Rato Yosiya ngoladi badha makam laenna pole.
17 Rato jareya mareksane, "Makamma sapa rowa?" Saodda reng-oreng Betel, "Pasareyannepon nabbina Pangeran se oneng rabu ka ka’dhinto dhari Yehuda, se aramallagi sadaja se gi’ buru elampa’agi junandalem, enggi ka’dhinto arosak ba-mezba ka’dhissa’."
18 "Panneng makam jareya ja’ li-guli," dhabuna rato. "Dina lang-tolangnga e jadhiya, ja’ le-alle!" Daddi lang-tolangnga nabbi dhari Yehuda jareya ta’ eli-guli; bariya keya lang-tolangnga nabbi dhari Samaria se esareyagi e jadhiya.
19 E saneyap kottha e Isra’il, Rato Yosiya magujur sakabbinna kennengnganna panyemba’anna diba se ekagabay bi’ to-rato Isra’il, se andaddiyagi dukana PANGERAN. Apa se elampa’agi e Betel, bi’ Rato Yosiya elampa’agi keya ka ba-mezba e saantero Isra’il.
20 Sakabbinna imam se atugas e saneyap kennengnganna panyemba’anna diba epate’e e attassa ba-mezba kennengnganna reng-oreng jareya se atugas. E saneyap mezba jareya Yosiya ngobbar lang-tolangnga manossa. Saellana jareya rato jareya laju gubar ka Yerusalim.
21 Saellana jareya Rato Yosiya makon ra’yat araya’agi Paska menorot se kasebbut e dhalem ketab parjanjiyan ban Pangeran, kalaban cara se kantha jareya ra’yat buru ngormadi PANGERAN, Allahna bangsa jareya.
22 Sajjegga bangsa Isra’il eparenta wan-pahlawan ta’ tao badha rato Isra’il otaba rato Yehuda se araya’agi Paska kantha jareya.
23 Pera’ e taon se kapeng ballu bellas pamarenta’anna Yosiya Paska jareya buru eraya’agi pole e Yerusalim kaangguy ahormadi PANGERAN.
24 Kaangguy alampa’agi kom-hokom se kasebbut e dhalem ketab se etemmo Imam Agung Hilkiya e Padalemman Socce, reng-oreng tokang ngolok arwah ban tokang ramal bi’ Rato Yosiya eojuk kabbi dhari Yerusalim ban dhari saantero Yehuda, dibana ko-bengko, brahala ban rang-barang se eangguy oreng e dhalem kabakteyan ka ba-diba.
25 Sabellunna ta’ tao badha rato se padha ban Rato Yosiya se abakte ka PANGERAN kalaban gu-onggu ate, ban noduwagi baktena jareya e dhalem odhi’na ban e dhalem tengka gulina, cocok ban kom-hokom se esebbuttagi e dhalem Ketab Mosa. Bariya keya samarena Rato Yosiya ta’ tao badha rato se padha ban salerana.
26 Tape lalakonna Rato Manasye maduka PANGERAN ka Yehuda; ban dukana jareya gi’ ta’ terep.
27 Dhabuna PANGERAN, "Apa se la ejalannagi Sengko’ ka Isra’il, ejalannagiya keya ka Yehuda. Oreng Yehuda bi’ Sengko’ ebuwanga dhari nagara se eberri’i Sengko’. Sengko’ nolaga Yerusalim, kottha Tang peleyan, bariya keya Tang padalemman se bi’ Sengko’ dibi’ la ekoca’agi menangka kennengnganna oreng abakte ka Sengko’."
28 Rato Yosiya seda e dhalem paperrangan e Megido e bakto meyos merrange Nekho, rato Messer, se teppa’na maju ban pasukanna nolongana rato Asyur e penggirra Songay Efrat. Jinazana Rato Yosiya jareya ekala’ bi’ ba-ponggabana pas egiba mole ka Yerusalim epanompa’ kareta. E jadhiya esareyagi e pasareyanna to-rato. Ra’yat Yehuda laju mele Yowahas pottrana epajumenneng rato epagante salerana. Careta laenna parkara Rato Yosiya ecathet e dhalem ketab Sajarana To-rato Yehuda.
29 (23:28)
30 (23:28)
31 Yuswana Yowahas tello lekor taon e bakto jumenneng rato Yehuda ban marenta e Yerusalim tello bulan abidda. Ebuna iya areya Hamutal pottrana Yeremiya dhari kottha Libna.
32 Yowahas dusa ka PANGERAN akantha bangatowana.
33 Yowahas ta’ marenta pole e bakto etawan bi’ Rato Nekho dhari Messer neng e Ribla e dhaera Hamat, ban Yehuda epaksa majar pesse opet ka Messer aropa salaka tello ebu pa’ ratos kilo ban emmas tello polo empa’ kilo.
34 Saellana jareya Rato Nekho laju ngangkat pottrana Yosiya se anyama Elyakim epadaddi rato Yehuda, sarta ngoba nyama Elyakim epadaddi Yoyakim. Yowahas ebakta ka Messer, laju seda e dhissa’.
35 Kaangguy majar pesse opet se epondhut rato Messer, Rato Yoyakim narek pajek dhari ra’yat menorot kakowadanna bang-sebang.
36 Yuswana Yoyakim sagame’ taon e bakto jumenneng rato Yehuda ban marenta e Yerusalim sabellas taon abidda. Ebuna iya areya Zebuda pottrana Pedaya dhari kottha Ruma.
37 Yoyakim alako dusa ka PANGERAN akantha bangatowana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA