Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakioki Karaeng Yosia sikontu pamimpinna tu Yehuda siagang Yerusalem.
2 Nampa a’lampa siagang ke’nanga mange ri Balla’Na Batara, nipinawang ri sikamma imanga, sikamma na’bia siagang sikontu ra’yaka, baji’ tu kasi-asia kammayatompa tukalumanynyanga. Ri dallekanna ngaseng ke’nanga, ri ampi’na benteng untu’ karaenga, ammentemmi karaenga nampa nabacakang ke’nanga siagang sa’ra lompo sikontu bonena anjo kitta’ parjanjiang beru nigappaya lalang ri Balla’Na Batara. Nampa appare’ karaenga parjanjiang siagang Batara untu’ lamannuruki mae ri Ia, siagang lanagaukangi sikontu parentaNa siagang hukkung-hukkunNa, attojeng-tojengi anggaukangi ri pa’mai’na siagang nyawana. A’janji tongi karaenga lanarupai apa Napattantua Batara lalang ri parjanjianNa siagang Umma’Na sangkamma niaka tattulisi’ lalang ri anjo kittaka. Sikontu ra’yaka amminawang turu’ tommi a’janji untu’ lanaturuki anjo parjanjianga.
3 (23:2)
4 Le’baki anjo naparentakammi karaenga mae ri Imang Lompo Hilkia, sikamma imang pambantua siagang sikamma pangawala’ tugasaka ri pakke’bu’ Balla’Na Batara, sollanna napasulu’ battu ri anjo Ballaka sikontu pakkakasa’ le’baka nipake untu’ anynyomba ri Baal, Dewi Asyera, siagang bintoeng-bintoenga. Sikontu anjo barang kammaya natunui Karaeng Yosia ri pantaranna kotaya ri ampi’na Ka’bung Lappara’ Kidron, nampa nierang auna mange ri Betel.
5 Napasuluki sikamma imang le’baka niangka’ ri karaeng-karaeng Yehuda untu’ anjamaya ri tampa’ panynyombanga mae ri rewata-rewataya ri kota-kota Yehuda siagang ri tammulilina Yerusalem; kammayatompa imang assarea koro’bang mae ri Baal, mataalloa, bulanga, kammayatompa bintoeng-bintoenga na maraengannaya.
6 Patunna Dewi Asyera napasuluki battu ri Balla’Na Batara, nampa naerang assulu’ ri pantaranna kotaya, mange ri Ka’bung Lappara’ Kidron. Anjoreng nitunumi anjo patunga, nampa nidengka sa’genna alusu’ cumi’na, siagang nipakioro’ auna irate ri pa’jerakkang tujaia.
7 Sikontu kamaraka lalang ri Balla’Na Batara le’baka napake baine pasundala’na balla’-balla’ panynyombanga untu’ anggaukangi gau’ salana salaku panynyomba mae ri rewataya, niputta kabusuki. (Lalang ri anjo kamaraka napakei tubai’-bainea attannung kaeng untu’ nipake anynyomba mae ri Dewi Asyera.)
8 Sikontu imang-imang niaka ammantang ri kota-kotana Yehuda nisuro kabusuki ri Yosia battu ri Yerusalem. Nampa kemae-kemae ri sikontu pa’rasangang Yehuda, iamintu ri tampa’-tampa’ le’baka napammantangngi imang-imanga assare koro’bang, napanraki kabusuki Yosia tampa’-tampa’ pakkoro’bangnganga mae ri rewataya. Anjo imang-imanga tenamo nanipa’biangi ammimping sambayang lalang ri Balla’Na Batara. Mingka akkulleji ke’nanga angnganre roti tenaya nammake pa’gambang iamintu nipasadia untu’ aganna ke’nanga maraenga. Sikamma tampa’ pakkoro’bangngang untu’ panynyombang mae ri rewataya iamintu niaka ri ampi’na Pakke’bu’ Lompo Yosua, walikotana anjo pa’rasanganga, niruntung kabusuki. Anjo pakke’bu’ lompoa niaki ri sa’ri kairinna Pakke’bu’ Lompo Uru-urua ri oloang antamaka ri kotaya.
9 (23:8)
10 Tofet, iamintu tampa’ panynyombanga mae ri rewataya ri Ka’bung Lappara’ Hinom, napanraki tongi. Lanri kammana anjo tenamo tau akkulle ampassareangi ana’na untu’ a’jari koro’bang mae ri Rewata Molokh.
11 Sikontu jarang nisa’laka untu’ karaeng-karaeng Yehuda untu’ nipanynyombang mae ri mataalloa, nipela’ kabusuki, siagang sikontu kareta-kareta le’baka nipake lalang ri anjo panynyombanga nitunu kabusuki. (Anjo kareta-karetaya niaki lalang ri parang lakkenna Balla’Na Batara, ri ampi’na pakke’bu’ lompoa, tena nabella battu ri kamara’-kamara’ pammantanganna Natan Melekh, iamintu sitau pagawe tinggi.)
12 Sikamma tampa’ pakkoro’bangngang nibangunga ri Karaeng-karaeng Yehuda ri pattongko’ rateanna kamara’-kamara’na Karaeng Ahas, naputta tongi. Kammayatompa tampa’-tampa’ pakkoro’bangngang nibangunga ri karaeng Manasye ri ruaya paranglakkenna Balla’Na Batara, naputta kabusu’ tongi Yosia, nampa napela’ antama ri Ka’bung Lappara’ Kidron.
13 Kammayatompa sikamma tampa’-tampa’ pakkoro’bangngang niaka ri bageang rayana Yerusalem, ri bageang timboro’na Bonto Kaja’dallanga, niputta kabusu’ tongi. Anjo tampa’-tampa’ pakkoro’bangnganga nabangungi Salomo untu’ anynyomba ri rewata-rewata appakaringi’-ringika, iamintu Asytoret, dewina bansa Sidon, Kamos rewatana bansa Moab siagang Milkom rewatana bansa Amon.
14 Tembo’-tembo’ rewata siagang patung Dewi Asyera niruntungi, nampa anjo butta le’ba’ pammantanganna nibangung anjo tembo’-temboka siagang patung-patunga natambungi Yosia siagang buku-buku tau.
15 Napanraki tongi tampa’ panynyombanga ri Betel nabangunga Karaeng Yerobeam ana’na Nebat, karaeng angngerangai tu Israel mae ri gau’ dosaya. Nampa nareppe’ Yosia tampa’ pakkoro’bangngang niaka ri anjo tampa’ panynyombanga, siagang natunu siagang patunna Dewi Asyera niaka anjoreng.
16 Nampa assaile Yosia, nania’ nacini’ siapa are jera’ irate ri monconga. Jari nasuromi taua ambongkaraki anjo jeraka, siagang napasulu’ buku-bukunna nampa natunu ri tampa’ pakkoro’bangngang sitabanga nitunu anjo wattua. Kammami anjo batena ampanraki anjo tampa’ pakkoro’bangnganga. Jari a’rupami apa le’baka natappu na’biNa Batara, ri wattunna sitabang ammenteng Karaeng Yerobeam ri ampi’na anjo tampa’ pakkoro’bangnganga ri se’reang allo lompo. Le’baki anjo nia’ nacini’ Karaeng Yosia se’re jera’ maraengang.
17 Akkuta’nammi angkana, "Inai pata jera’ anjo?" Appialimi tu Betel angkana, "Anjo jera’na sitau na’biNa Batara le’baka battu mae anrinni battu ri Yehuda, siagang antappuai sikamma kajariang silalonnaya le’ba’ kigaukang mae ri anne tampa’-tampa’ pakkoro’bangnganga."
18 Naparentakammi karaenga angkana, "Teako apa-apai anjo jeraka. Boli’mi kamma ammantang anjoreng buku-bukunna, teako paletteki!" Jari tenamo naniapa-apai buku-bukunna anjo na’bi battua ri Yehuda, kammayatompa buku-bukunna na’bi battua ri Samaria niaka nitarawang anjoreng.
19 Ri tunggala’ kotaya ri Israel, naruntung kabusuki Yosia sikontu tampa’ panynyombanga mae ri rewataya, iamintu nabangunga karaeng-karaeng Israel, ampakalarroai Batara. Anjo apa nagaukanga Yosia ri Betel, sangkamma tommi anjo nagaukang mae ri sikontu tampa’-tampa’ pakkoro’bangngang niaka ri sikontu Israel.
20 Sikontu imang-imang tugasaka ri tampa’-tampa’ panynyombanga ri rewataya nibuno kabusuki irate ri tampa’-tampa’ pakkoro’bangngang tampa’ napanjamaia ke’nanga. Siagang ri sikontu anjo tampa’ pakkoro’bangnganga attunui Yosia buku-buku tau. Le’baki anjo ammotere’mi mange ri Yerusalem.
21 Nampa naparentakang Karaeng Yosia mae ri ra’yaka untu’ ampakalompoi Allo Paskaya sangkamma niaka tattulisi’ lalang ri kitta’"Parjanjiang Siagang Batara." Lalang kammana anjo napakalompomi Batara, Allata’alana ke’nanga.
22 Battu ri jammang niparentana tu Israel ri sikamma pahlawanga, tale’bakapi nia’ karaeng Israel yareka karaeng Yehuda ampakalompoi Allo Paskaya kamma anjo.
23 Ri taung makasampulo assagantuju bawang ri wattu ammarentana anjo Yosia nampami nipakalompo pole Allo Paskaya ri Yerusalem untu’ ampakalompoi Batara.
24 Sollanna nakkulle nigaukang hukkung-hukkung niaka tattulisi’ lalang ri anjo kitta’ nagappaya Imang Lompo Hilkia lalang ri Balla’Na Batara, nabongka kabusu’mi Karaeng Yosia sikamma pakio’ rohna tumatea siagang pacinika battu ri Yerusalem siagang battu ri sikontu Yehuda, nampa napela’ kabusu’ rewata ruma tanggaya, barhalaya, siagang barang-barang nipakea untu’ anynyomba ri rewata-rewataya.
25 Tena le’bakai nia’ karaeng sangkamma Yosia, attojeng-tojenga ri pa’mai’na anynyomba mae ri Batara, siagang napa’nyatami anjo lalang ri carana attallasa’ siagang appanggaukang, situru’ sikontu hukkung niaka tattulisi’ lalang ri kitta’na Musa. Manna ri tenanamo Yosia, tena tommo karaeng sangkammanna.
26 Mingka panggaukanna Karaeng Manasye ampanaiki larroNa Batara mae ri tu Yehuda; nampa anjo larroNa tenapa nanaung.
27 Nakana Batara, "Apa le’baka Kugaukang mae ri tu Israel, laKugaukang tongi mae ri tu Yehuda. LaKupelaki tu Yehuda battu ri pa’rasangang le’baka Kupassareang mae ri ke’nanga. LaKutollaki Yerusalem, iamintu kotaKu le’baka Kupilei, kammayatompa anne BallakKu, le’baka Kupau angkanaya la’jari tampa’ panynyombangi mae ri KalengKu."
28 Karaeng Yosia matei lalang pa’bundukang ri Megido wattunna a’lampa mange ambunduki Nekho, karaeng Mesir, sitabanga maju siagang pasukanna untu’ ambantui karaeng Asyur ri birinna Binanga Efrat. Niallei maya’na Yosia ri sikamma pagawena nampa nierang ammotere’ siagang kareta mange ri Yerusalem. Anjoreng nitarawangi ri pa’jerakkanna sikamma karaenga. Nampa napile siagang naangka’ ra’ya’ Yehuda iamintu Yoahas ana’ bura’nena Yosia untu’ ansambeangi a’jari karaeng. Pau-pau maraengannaya ri passala’na Karaeng Yosia niaki nicata’ lalang ri kitta’"Riwaya’na sikamma karaeng Yehuda."
29 (23:28)
30 (23:28)
31 Ri wattunna a’jari Karaeng Yoahas ri Yehuda, 23 taung umuru’na, siagang ammarentai ri Yerusalem 3 bulang sallona. Amma’na niarengi Hamutal ana’na Yeremia battu ri kota Libna.
32 Dorakai Yoahas mae ri Batara sangkamma todong boe-boena.
33 Kala’busangi Yoahas ammarenta ri wattunna nijakkala’ ri Nekho karaeng Mesir ri Ribla daera Hamat, siagang nipassai tu Yehuda a’bayara’ 3.400 kilo pera’ siagang 34 kilo bulaeng.
34 Nampa naangka’ Karaeng Nekho ana’ bura’nena Yosia niarenga Elyakim a’jari Karaeng Yehuda, siagang napinrai arenna Elyakim a’jari Yoyakim. Naerangi Yoahas mange ri Mesir siagang anjoreng tommi Yoahas mate.
35 Sollanna akkulle nabayara’ pa’bayara’ natuntuka Karaeng Mesir, nasuromi Karaeng Yoyakim ra’yaka a’bayara’ sima situru’ massing pakkullena ra’yaka.
36 Wattunna a’jari Karaeng Yoyakim ri Yehuda, 25 taung umuru’na, siagang ammarentai ri Yerusalem 11 taung sallona. Amma’na niarengi Zebuda, ana’na Pedaya battu ri kota Ruma.
37 Dorakai Yoyakim ri Batara sangkamma todong boe-boena.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA