Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Niki saq ketelu kaline tiang dateng jangoq side pade. Dalem Kitab Suci tetulis, "Sebilang pelekare harus tebuktiang siq kesaksian due atao telu dengan saksi, baruq pelekare nike sah."

² Dengan-dengan saq laẽq saq sampun gawẽq dose dait selapuq dengan lainne, sampun tiang peringet bejulu sewaktu tiang dateng jangoq side pade saq kedue kaline. Mangkin, lẽq waktu tiang bejaoqan kance side, tiang peringet malik bahwe lamun tiang dateng malik, ndẽq araq sopoq dengan lẽman ie pade saq gen luput lẽman hukuman.

³ Make side pade gen mauq selapuq bukti saq side pade melẽtang bahwe Almasih tetu-tetu bemanik langan tiang. Lamun Almasih ngelaksaneang hal nike tipaq side pade, Ie nẽnten gen alem-alem, sebalikne Ie nyatayang kuase-Ne lẽq antare side.

⁴ Mule lẽq waktu Ie tepakuq lẽq kayuq salib Ie lemah, laguq mangkin Ie idup dalem kuase Allah. Mule tiang pade lemah lẽq dalem Almasih, laguq tiang pade gen idup bareng kance Ie siq kuase Allah.

⁵ Cobaq side pade uji diriqde mẽsaq napi side pade tetu-tetu idup lẽq dalem iman tipaq Almasih! Pasti side pade sadar bahwe Deside Isa Almasih araq lẽq dalem side pade! -- lain halne lamun mule side pade ndẽq tetu-tetu percaye.

⁶ Tiang harep side pade sadar bahwe tiang pade ndẽqne dengan saq ndẽq tahen uji.

⁷ Tiang pade bedo'e tipaq Allah semoge Ie kayun nulung side pade adẽq side pade ndẽq gawẽq jahat. Ndẽqne jari nyatayang bahwe tiang pade dengan-dengan saq berhasil, laguq adẽq side pade ngelaksaneang napi saq solah, timaq ruene tiang pade maraq dengan-dengan saq gagal.

⁸ Sẽngaq tiang pade ndẽq tao piaq napi-napi jari ngelawan kebenaran; tiang pade cume bau ngelaksaneang kebenaran.

⁹ Tiang pade seneng lamun tiang pade lemah, dait side pade kuat. Tiang pade bedo'e ẽndah adẽq side pade jari sempurne.

¹⁰ Keranaq nike tiang nulis surat niki lẽq waktu tiang ndẽqman araq lẽq tengaq-tengaq side pade. Siq care nike, lamun tiang dateng laun, tiang ndẽq gen keras tipaq side siq kekuasean saq teicanin siq Tuhan lẽq tiang. Kekuasean nike teicanin jari ngebẽng side pade semanget, ndẽqne jari ngancurang.

¹¹ Ahirne, semeton senamian, side pade harus gembire, dait berusahe jari sempurne. Terimaq selapuq nasẽhat tiang. Side pade harus sepaham dait idup dalem damẽ sejahtere. Allah sumber kasih dait damẽ sejahtere gen araq bareng kance side pade.

¹² Side pade harus besalam-salaman sopoq kance saq lain siq penoq kasih.

¹³ (13-12b) Selapuq dengan-dengan saq tehususang bagi Allah ngirim salam tipaq side.

¹⁴ (13-13) Rahmat Junjungan Saq Mulie Deside Isa Almasih dait kasih Allah dait persahabatan lẽq dalem Roh Suci araq bareng kance side pade selapuq!

2 Korintus

Video 2 Korintus 13

Ikuti Kami:

KONTAK | PARTISIPASI | DONASI