Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Enda me petelu kaliken ateku reh ndahi kam. I bas Pustaka Si Badia lit tersurat, "Tep-tep pengadun maka banci esah arus lit dua tah telu kalak saksina."

² Lit si man katankenku man bandu, kam si nggo erbahan dosa i bas paksa si nggo lewat, bage pe man kerina kalak si deban. Sanga kerehenku si pedua kaliken nggo kukataken e man bandu, janah genduari pe tupung aku la ras kam, kupersingeti ka maka adi reh ka aku, kerina kalak si erbahan dosa i bas paksa si nggo lepas la banci pulah i bas ukumen nari.

³ Tupung si e pagi idatndu nge bukti si ipindondu e, maka Kristus ngerana kap arah aku. Adi Kristus erbahan tindaken man bandu, labo Ia la megegeh, tapi IcidahkenNa GegehNa i tengah-tengahndu.

⁴ Tuhu asum Ia ipakuken ku kayu persilang seh mate, Ia la kap ergegeh, tapi Ia nggeluh erdandanken gegeh Dibata. I bas persadan ras Ia, kami pe la kap ergegeh; tapi i bas dahin kami guna kam, kami pe nggeluh ras Kristus erdandanken kuasa Dibata.

⁵ Pereksalah man bandu: tuhu-tuhu kin kam erkiniteken? Ujilah man bandu! Ntah la kin ietehndu maka Jesus Kristus ringan i tengah-tengahndu? -- Pala la kin kam menang i bas ujian e.

⁶ Kuarap ietehndu maka kami jine labo talu i bas ujian e.

⁷ Ertoto kami man Dibata gelah ula ibahanndu si salah -- labo gelah teridah maka kami nggo menang i bas pengujin e, tapi gelah banci idalankenndu si mehuli, aminna pe tempa teridah kami talu i bas ujian e.

⁸ Sabap la kami ngasup ngelawan kebenaren, tapi ngikutkenca ngenca maka kami ngasup.

⁹ Senang nge ukur kami bicara la gia kami ergegeh, asal kam megegeh. Erkiteken si e ertoto kami man Dibata maka kam mehuli ka mulihken.

¹⁰ Perbahan si eme maka kubahan surat enda man bandu asum ndauh denga kita sirang; gelah pagi kenca aku reh, la pedah kasar perbahanenku i bas makeken kuasa si nggo ibereken Tuhan man bangku, kuasa si gunana mbangun kam, labo ngeruntuhken kam.

¹¹ Dungna, mejuah-juah man bandu o senina-senina! Pekenalah man bandu mulihi, janah tamakenlah ku bas ukurndu pemindon kami e. Ersadalah arihndu kerina janah erdamelah. Janah Dibata si dem keleng ate dingen kemalemen ate ras kam gelah.

¹² Sisalam-salamenlah kam alu dem keleng ate bagi si ersenina. Kerina anak-anak Dibata si i jenda ngataken mejuah-juah man bandu.

¹³ Lias ate Tuhan Jesus Kristus, kekelengen Dibata, kerembaken Kesah Si Badia ras kam kerina gelah.

¹⁴ (2Kor 13:13)

2 Korintus

Video 2 Korintus 13

Ikuti Kami:

KONTAK | PARTISIPASI | DONASI