Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Wali ane aku mangabarong korongku, gombo etu ojo gombo to bea, pei aku mamporapika resi komi mansabaraka gombongku. Apa ri tempo komi mangandonge gombongku si’i komi bara damampobuuka aku bea sangkodi. Pei ne’ewa mosa mampodongeka apa tiroowa re’e to aku damanganto’o!

² Apa aku mamporayang komi, wali see naka aku timopo mampobuuka komi bara damangaluluka songka ntau to taa singkonong pei kareba matao. Wali aku kunsani katimopongku etu singkonong pei i Pue Allah. Apa komi raporapaka ewa tau we’a to tawa re’e nepenya to langkai. Pasi aku raporapaka ewa pa’a ngkomi to roomo mamporanika komi see komi mangkasimpandeka samba’a tau to damawali rongomu. Etu semo i Kerisitu. Wali pamporaningku komi ojo i Kerisitu semo to nululu ngkomi see komi tiroo ewa tau we’a to tawa nepenya to langkai ane ratamo temponya aku mampasiwaka komi pei Ia.

³ Pei aku moru-moru rayangku mampobuuka komi apa saba tau to mampotundeka komi anu to taa monso. Aku moru mampobuuka komi bara danatipu ntau etu sewaju ewa i Hawa natipu nu ule tempo ule mangakal ia tempo owi. Apa ane komi ra’akal ewa wetu, pampobuuka ngkomi damambali see komi dua-dua rayamu mamporayang i Kerisitu.

⁴ Wali see naka aku morumoru rayangku. Maka pei komi ojo mangabiaka nempo bara kesaa to napakarebaka ntau to rata resi komi? Ane sira mampakarebaka mangkonong i Yesu pei gombo nsira yusa pei to napakarebaka mami, komi ojo mangabiaka. Pasi ane sira manganto’oka komi mangantima nosa to si’a Nosa to roomo nurata ngkomi seore, komi ojo mangabiaka. Pasi ane sira mampakarebaka resi komi kareba to si’a kareba matao to nutima ngkomi seore, komi ojo mangabiaka seja. Wali maka pei komi masanang mangantima gombo nsira etu? Wimba, komi bara mampobuuka sira to bae-bae angganya pei aku?

⁵ Pei ane ewa pampobuuka to si aku, sira to ojo mampoanika pomakau to bae angganya etu, si’a sira to bae-bae angganya pei aku.

⁶ Apa nempo aku taa pande kojo magombo ewa sira, pei aku manasa kojo mangkonong samparia to kupotundeka komi mangkonong i Pue Allah. Pasi komi seja manasa, apa kami sangkani madota mampakanasaka komi samparia mangkonong Ia. Pei si’i-si’i komi rani mangantima tau to mampotundeka anu to yusa. Wali see naka moru-moru rayangku.

⁷ Wali tempo aku mampakarebaka resi komi kareba matao mangkonong i Pue Allah seore, tempo etu aku tare mamporapi bara kesaa resi komi. Wali re’e tau to mampobuuka ane aku taa mangarata saro, batuanginya aku kodi anggangku. Pei taa mawei apa to bae batuanginya resi aku, etu semo komi rapalaes pei mawali bae angga ngkomi apa samba’a pei i Kerisitu. Wali wimba, bara dosa ane aku mangansawang komi pei taa marapi rabayar? Gete taa!

⁸ Wali re’e wo’u jaya to naika i mPue see aku mangarata anu to darapake tempo aku re’e ri oyo ngkomi seore. Etu semo, tempo etu tau i mPue to siromu nja’u lipu-lipu to yusa, sira mampokatuka aku doi apa sira rani mangansawang aku see aku yoa mampakarebaka resi komi kareba matao. Wali aku ewa mangoko yau kasugi nsira damangansawang komi.

⁹ Pasi tempo aku maroo ri oyo ngkomi seore, tempo etu ane taa gana to dakupake tare pasi samba’a komi to aku mangagagangika. Aku taa mampakasusa komi apa pua’i ngkita to rata yako nja’u Makedonia, sira semo to mampakagana anu to dakupake etu. Wali tempo etu tare bara kesaa to kuporapi mampakasusa komi. Pasi aku taa damandoo mangika ewa wetu.

¹⁰ Wali aku masanang kojo manganto’oka tau aku tare marapi sawang resi sa’e. Pasi nempo ri lipu ngkomi pasi juku ri propinsi Akhaya, tare tau to maya mangaba’a gombongku etu. Wali monso pu’u anu to kuto’o si’i, apa re’e i Kerisitu maroo ri rayangku pasi Ia sangkani manganto’o anu to monso.

¹¹ Wali kesaa batuanginya aku tare marapi sawang resi komi seore? Wimba, batuanginya aku bara taa mamporayang komi? Si’a kojo! Apa i Pue Allah mangansani monso pu’u aku mamporayang komi.

¹² Pei nempo aku mamporayang komi, aku taa marapi sawang resi komi to Korintus. Pasi aku taa damandoo mangika ewa wetu. Sabanya naka pei aku taa marapi sawang resi komi see manasa resi komi taa monso gombo ntau to ojo mampoanika pomakau i ngKerisitu. Tau etu rani tau mampobuuka sira sewaju pei kami. Sira tabaro manganto’o, “Kami sewaju pei i Paulus pasi yununya.” Ewa wetu gombo nsira mangabarong koro nsira. Pei kamonsonya tau etu taa sewaju pei kami apa sira taa kojo mamporayang komi pasi sira sangkani marapi rasawang.

¹³ Wali tau to etu kamonsonya si’a pomakau i ngKerisitu. Sira pomakau to taa monso pasi palaong to naika nsira ojo mangantipu tau. Pasi sira mangawuni lengko to si sira pei mampotumbu lengko mpomakau i ngKerisitu.

¹⁴ Pei palaong etu taa mampakaipu rayanta apa ewa wetu seja naika i ngKepala nto pantipu. Ia seja maya mangawuni lengko to si ia pei mampotumbu pomakau i mPue Allah to mareme ta’anya.

¹⁵ Wali see naka kita taa ipu rayanta ane to papolaong i ngKepala nto pantipu mampotumbu wo’u to papolaong to singkonong pei i Pue Allah. Pei ri tempo to darata, tau etu damangarata huku to singkonong pei palaong to maja’a to naika nsira etu.

¹⁶ Wali aku manganto’o wo’u gombo to aku roomo mangantulis, etu semo ne’e mampobuuka aku si’i tau bea. Pei ane ewa wetu pampobuuka ngkomi, taa mawei. Ojo ne’e mosa mampodongeka gombo ntau bea si’i, apa re’e wo’u gombo to ewa gombo ntau tabaro to aku damanganto’o.

¹⁷ Wali aku kupora-rayaka damangika gombo to mangabarong korongku. Wali gombongku etu si’a singkonong pei gombo i mPue. Pei gombongku etu singkonong pei pampobuuka ntau bea.

¹⁸ Pei aku tiroo damanganto’o, apa boros tau to tabaro mangkonong katuwu nsira ri lino si’i, wali aku databaro seja.

¹⁹ Gete, komi pande pu’u! Apa lo’a, komi masanang kojo mangansabaraka gombo ntau to bea! Wali see naka aku mampondayaka komi bara damangansabaraka seja gombongku to ewa gombo ntau to bea etu.

²⁰ Pasi gete, komi bae kojo sabara ngkomi, apa lo’a, komi ojo mangansabaraka tau to mangkuasang komi ewa naika ntau to mampowatua sa’e. Pasi komi ojo mangansabaraka seja tau to mangoko yau kasugi ngkomi, tau to mangakal komi, tau to mampobuuka koro nsira to bae-bae batuanginya pei komi. Pasi komi mangansabaraka seja nempo tau mangantopo lio ngkomi.

²¹ Wali tau etu manganto’o kami mayu’u raya mami, pasi gete, ane rapasewajuka sira to makoje mampoja’a komi etu, monso pu’u kami mayu’u! Wali ane komi rani seja mangkaengas kami apa saba kami mayu’u, taa mawei resi kami. Pei tau etu makoje mangabarong koronya ngkalio. Wali ane ewa see, aku to magombo ewa tau to bea seja si’i, aku damangkojeka rayangku see aku seja damangika ewa tabaro!

²² Apa ane re’e tau to tabaro pei manganto’o, “Basa mami basa Ibrani,”ane ewa see aku maya seja tabaro saba basa to si aku seja basa Ibrani. Pasi ane sira manganto’o, “Kami to Israel,” kamonsonya aku seja to Israel. Pasi ane nato’o nsira, “Kami wiyaa i Abraham,” kamonsonya aku seja wiyaa i Abraham.

²³ Wali monso pu’u gombongku si’i ewa gombo ntau to bea, pei aku tiroo mampakapolas gombongku to tabaro si’i. Apa ane tau etu manganto’o, “Kami to papolaong i ngKerisitu,” kamonsonya aku semo to manganangi sira mangika palaong i ngKerisitu. Apa aku semo to roso-roso mapalaong, pasi aku semo to mapari kojo naika ntau mangawotu-wotu, pasi aku semo to malagi ngkani ratarungku, pasi to malagi ngkani mosu rapopate yau.

²⁴ Pasi lima ngkani aku nasesai nto Yahudi. Pei ri rayanya lima ngkani rasesai etu, ponto ngkani rasesai etu aku togo mpuyu pei sio ngkani rasamparika kiyoro.

²⁵ Pasi togo ngkani aku rawotu-wotuka kaju. Pasi sangkani aku ratasoka watu. Pasi togo ngkani tondu yau bangka to iponengku. Ri rayanya togo ngkani etu aku sangkani sambengi pei seo mangkongkongkongko beso ngkaju pei kabangkabangka ri wawo ntasi.

²⁶ Wali boros kojo palinjangku, pasi ri raya mpalinjangku etu aku malagi ngkani mangarata palaong to mampakameka raya ntau. Ewamo mangawote ue mowo, mangarata tau maja’a to mangoko yau ngaya-ngaya nsa’e, mangarata kaja’a ndaya nu yunungku to Yahudi, pasi mangarata seja kaja’a ndaya ntau to si’a to Yahudi. Pasi boros seja anu to mampakameka aku to iratangku ri kota-kota, pasi nja’u pada bone, pasi ri wawo ntasi. Pasi re’e seja tau to mawuti to mampoanika pua’i ngkita to samba’a pangaya, sira seja rani mampakaja’a aku.

²⁷ Pasi ri raya ngkatuwungku aku mayu’u wukungku pasi mandasai kuepe naika mpalaong to mabeu, pasi boros ngkani aku manaa ri raya mburi. Aku re’e mangepe moro pasi mara ngangangku pasi malagi ngkani aku mangorop apa tare pangkoni. Aku re’e seja mangepe loto pasi taa gana pakengku.

²⁸ Pei si’a ojo palaong to etu to mawali resi aku. Pasi ponto eo aku re’e mangarata kasusa apa morumoru rayangku mampobuuka tau i mPue to siromu nja’u ponto-ponto lipu.

²⁹ Apa ane re’e sira to mayu’u rayanya, aku seja mangepe mayu’u rayangku. Pasi ane re’e sira to na’akal nsa’e see naka damangika dosa, aku mapoi rayangku mampobuuka tau to mangakal sira etu. Wali boros kojo kasesa to aku mangarata.

³⁰ Wali yako kasesa to aku mangarata etu, see naka manasa pu’u aku mayu’u rayangku. Wali kamonsonya aku taa rani tabaro, pei ane rapanya aku tabaro, ane ewa see aku databaro ojo mangkonong palaong to mampakanasa kayu’u ndayangku etu. Apa ane ewa see, manasa resi komi aku taa seja gana karoso ndayangku ane taa nasawang i mPue.

³¹ Wali i Pue Allah, Allah pasi Pa’a i Yesu Kerisitu, Pue ngkita, Ia masipato darabarong rataka ri singkasaenya. Pasi Ia mangansani aku taa mangawutis komi. Monso pu’u aku taa gana karoso ndayangku ane taa nasawang i mPue.

³² Rapanya palaong to mawali resi aku seore tempo aku nja’u kota Damsyik. Apa tempo etu gubernur to naokotaka i Makole Aretas, ia manganto’oka tentaranya mangajagang samparia wombo ndindi mbatu to mangantikul kota etu. Naka pei ia mangika palaong to etu apa ia rani mangansoko aku.

³³ Pei taa mawali apa yunungku manganto’oka aku matunda la’u raya ngkaranji to bae panewa sira manganguyu aku yako ri jendela lo’u sambali ndindi ngkota etu. Wali see naka aku maya mampiyaika yau gubernur etu. Ewa wetu naika i mPue Allah mangansawang aku ri raya nkayu’u ndayangku. Wali palaong to ewa wetu to aku rani mangabarong.

2 Korintus

Video 2 Korintus 11

Ikuti Kami:

KONTAK | PARTISIPASI | DONASI