Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mewali halalu, kuperapi bona nipehadingi hampai lolitangku, nauri mololitana nodo tontuli.

² Mohirina lawi arahe tauna au mampeinao moalakau hangko iriko. Agayana kamohirungku ide moula peundeana Pue Ala. Lawi ikomi au nguru-nguruna moantikau mepoinalai i Kerisitu. Peundeaku, bona mepoinalai liliukau Iria. Ikamu peisa rapandiri nodo anantowawine au ina rapopotambi hai hadua tobalilo, iami Kerisitu.

³ Agayana kuperapi bona datikau rapakanawo alana barapokau mepoinalai i Kerisitu hangko i lalumi mpuu. Nodo Hewa nakelo ile hai lolitana au maalusu, ara worihe tauna au mampeinao bona moulakau paturonda au mosisala hai pepoinalaimi i Kerisitu.

⁴ Lawi aramohe guru i olomi au mopagurukau kana i Yesu, agayana paturonda bara himbela hai apa au kipaturoakau. Agayana ane nodo paturonda, moapari hai niunde mampehadingi lolitanda? Niunde pae motarima inao ntanina au mosisala hai Inao Malelaha au nitarimami? Ba niunde motarima bambari au mosisala hai Ngkora Marasa au nipoinalaimi? Halalu, inee nodo.

⁵ Guru iti doko mopakahile watanda haduduanda, agayana kuperapi bona nipeulai paturongku, lawi bara tepaiwoi tuwongku hangko irihira.

⁶ Lawi nauri bara gaga kuisa mololita, agayana kuisa ntepuu paturo au tou. Hai paturo iti nihadi hai niita mpuumi i hinangkana babehiangki i olomi.

⁷ I tempoku moanti Ngkora Marasa irikamu hangkoya, barana merapi sarongku irikamu nauri haodi pea. Mengkaiwoina, mobagona hai tayengku bona kupahawe bambari au moanti pewati irikamu. Ba masalana, halalu, ane bara kuperapi sarongku irikamu?

⁸ Tangangku mani i boeami hangkoya, to Sarani au arahe i boea ntanina mopakatuhe doi iriko. Peisa tauli: ihira au marugi, lawi doi au raweina kupake i lalu pobagongku moanti Ngkora Marasa irikamu.

⁹ I tempo iti, ara wori kamakurangku, agayana barana merapi irikamu. Lawi arahe halalunta au hawe hangko i tampo Makedonia moanti doi au mopahandai apa au kuparaluu. Kupamaroa-roa babehiangku i olomi. Bara kuperapi ba apa pea irikamu, bona datikau kupakapari. Hai apa au kubabehi hangkoya, iti au ina kubabehi liliu.

¹⁰ Tou mpuu apa au kuuli ide, lawi paturona Kerisitu au tou ara i lalungku. Matana lalungku lawi barana mamperapi sarongku irikamu ba i hema pea au maida i tampo Akaya. Kamatanana lalungku ide bara ina tebali.

¹¹ Moapa hai mololitana nodo? Ba niuli barakau kupokaahi, halalu? Pue Ala moisa kamaahina lalungku irikamu.

¹² Apa au kubabehi ide, bara ina kukabaha. Barana ina merapi sarongku irikamu. Arahe tauna au mampemahile hai au mamperapi saronda hai au motoya liliu watanda haduduanda. Agayana iko, barana mau merapi irikamu, bona dati rauli pobagongki himbela hai pobagonda.

¹³ Tauna au nodo, iami suro au mepakanawo. Mobagohe i olomi nodo surona Kerisitu, agayana modongkohe!

¹⁴ Bara tapotingkara babehianda, lawi nodo wori babehiana Datu Tokadake au mobaliki watana mewali nodo hadua malaeka au mewangka.

¹⁵ Ido hai barake tingkara ane topobagona Datu Tokadake mowuni babehianda au kadake bona raita nodo topobagona Pue Ala. Agayana kahopoana, ina molambihe hurungina au hintoto hai babehianda.

¹⁶ Mewali, nodo au kuuli inona, kuperapi bona nipehadingi mpuu lolitangku, nauri mololitana nodo tontuli. Inee nipehangu iko ide tontuli, agayana ane ara manikau au manguli iko ide tontuli, nipogiangaa peamona motoya hampai watangku haduduangku.

¹⁷ Ide-ide ina kupakahile watangku. Agayana bara Pue au motuduna mololita node. Mololitana nodo tontuli.

¹⁸ Bosa tauna motoya watanda haduduanda hai mampololita bagonda au rababehi hangko i karohonda watanda. Hai ide-ide ina kupakahile wori watangku.

¹⁹ Lawi lenggena, nipokatana mpuu paturonda tauna au ntuli, lawi niuli kaikamuna tomapande!

²⁰ Ane arahe guru au mampohawikau, nitarima peamohe. Ane arahe au mopakanawokau hai mobagiukau, nidokohe. Ane arahe au mampemahile hai mohapakau, niunde mampehadingi paturonda.

²¹ Ba niuliri hangangaa maeana lawi barangkai bai moula babehianda iti? Agayana ane baihe motoya watanda haduduanda, hangangaa mengkabai worina motoya watangku. (Nikatuinao, mololitana nodo tontuli.)

²² Rauli guru iti, kaihirana to Yahudi. Nodo wori iko! Rauli kaihirana pemuleana Isaraeli hai pemuleana Burahima. Nodo wori iko! Lawi iko ide to Yahudina, pemuleana Isaraeli hai pemuleana worina Burahima.

²³ Rauli, kaihirana topobagona Kerisitu, apa mani iko! (Mololitana nodo tauna au barapi manoto pekirina.) Meliu pobagongku hangko i pobagonda. Bosa belana ratarungguna, meliu hangko irihira! Rumihi karawombeku, meliu hangko irihira! Bosa belana kematena.

²⁴ Lima belana iko rahukuna to Yahudi; rawombena talu pulona hai hahio belana.

²⁵ Talu belana rahukuna to Roma; rawombena hai lai. Hambela wori rawatuina tauna au mampeinao mopapatena. Talu belana tekawuna i kapala tahi au kupesawii. Hambela monanto-nantona i wongko tahi hambengia hai hangaloa.

²⁶ I lalu polumaongku, bosa belana molambina rugi; narumpana owai meumbala. Molambina rugi i tayenda topanangka. Rapopeahi-ahina to Yahudi. Rapopeahi-ahina tauna au barahe to Yahudi. Molambina rugi i lalu kota. Molambina rugi i raoa kota. Molambina rugi i wongko tahi. Molambina rugi hangko i tauna au mouli kaihirana halalungku hampepepoinalai, agayana katouana bara!

²⁷ Mantimi pobagongku i Pue, mobagona i suka pebukuangku. Bosa belana barana peisa leta, marimina hai mangkadouna. Bosa belana bara ara paandeku, makulina hai bara handa hampiku.

²⁸ I raoa hangko i hinangkana iti, karao mpuu inaongku, lawi alo-alona kupekiri liliu noumba katuwonda to Sarani i boea-boeana.

²⁹ Ane arahe halalungku hampepepoinalai au masusa lalunda anti kamaledena pepoinalainda, masusa wori lalungku. Ane arahe au manawo i lalu dosa, mapari wori lalungku.

³⁰ Ane hangangaa kupakahile watangku haduduangku, mampemahilena i kakupahawena ope-ope kamaledengku.

³¹ Ope-ope au kuuli inona, tou haha, barana modongko. Pue Ala, Umana Pue Yesu, iami sabingku! Tatoyami duuna kamahae-haea!

³² I tempoku ara i kota Damsik, ara tunggaiana gubernur au i woi poparentana Datu Aretas bona mopapatena. Natudu surodadona mokampai baba bente kota bona rahakana.

³³ Agayana rangangku motulungina. Rapusana i lalu karanji hai rauluna moliu i kalolu bente, ido hai tekabahana.

2 Korintus

Video 2 Korintus 11

Ikuti Kami:

KONTAK | PARTISIPASI | DONASI