Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tiang mẽlẽ adẽq side pade sabar lẽq kebodoan tiang saq sekediq nike. Mule side pade sampun nyatayang kesabarande lẽq tiang.

² Tiang kangen lẽq side, maraq Allah mẽsaq ẽndah kangen lẽq side. Side pade maraq sopoq dedare genten saq sampun tiang janjiqang jari tetikah kance sopoq dengan mame, nike Almasih.

³ Laguq tiang kuatir pikirande gen tegode jari ndẽq setie malik lẽq Almasih, pade maraq Hawa laẽq ẽndah tegode siq kelicikan ulah.

⁴ Sẽngaq ruene side pade seneng doang nerimaq dengan saq dateng ojok side dait ngajahang mengenai Deside Isa saq lain -- ndẽqne Deside Isa saq tiang pade kenalang lẽq side. Dait side pade mẽlẽ ẽndah nyambut roh dait "kabar solah" saq tetu-tetu bẽde kance Roh Allah dait Kabar Solah saq sampun side pade terimaq lẽman tiang pade.

⁵ Tiang tetu-tetu ndẽq merase bawaqan lẽman "rasul-rasul" saq luar biase nike!

⁶ Sang tiang kurang ceket ngeraos, laguq mengenai penenaoq, tiang ndẽqne dengan saq bodo. Nike sampun tiang pade buktiang lẽq side dalem selapuq hal.

⁷ Lẽq waktu tiang beriteang Kabar Solah lẽman Allah tipaq side, tiang ndẽq tunas biaye napi-napi lẽq side pade; dait siq care nike tiang miaq diriq tiang jari bawaqan. Hal nike tiang laksaneang adẽq side saq teatasang. Napi nike sopoq kesalaqan tiang lẽq side?

⁸ Waktu tiang ngelayanin side pade, tiang tebiayaq siq jemaah-jemaah lain. Bau teparan tiang ngerugiang jemaah-jemaah nike adẽq tiang bau nulung side pade.

⁹ Lamun lẽq waktu nike tiang kekurangan, tiang ndẽq uwah nyusahang sopoq juaq lẽman side pade. Selapuq saq tiang perluang tesedieang siq semeton-semeton saq dateng lẽman Makedonia. Tiang jagaq bagus-bagus adẽq tiang ndẽq nyusahang side pade lẽq hal napi juaq, dait tiang gen tetep gawẽq maraq nike.

¹⁰ Saq tiang banggeang niki ndẽqne bau tehalangin siq sai-sai lẽq selapuq negeri Akaya, lantaran pengajahan Almasih saq kenaq araq lẽq tiang.

¹¹ Kembẽq tiang sampẽang maraq nike? Napi lantaran tiang ndẽq ngasihin side pade? Allah wikan tiang ngasihin side pade!

¹² Napi saq tiang laksaneang mangkin gen terus tiang laksaneang adẽq "rasul-rasul" saq lain nike ndẽq bedowẽ alasan jari belẽq-belẽqang diriqne dait bebase bahwe ie pade begawẽan maraq tiang pade.

¹³ Dengan-dengan maraq nike ie rasul-rasul palsu. Ie dengan-dengan saq pegawẽanne ngakalin dengan siq care nyamar jari rasul-rasul Almasih.

¹⁴ Ndaq bengaq lẽq hal nike, sẽngaq Belis ẽndah nyamar jari malaẽkat terang!

¹⁵ Jari, ndaq bengaq ẽndah lamun pelayan-pelayan Belis nyamar jari pelayan-pelayan saq kenaq lẽman Allah. Ahirne ie pade ẽndah gen nerimaq balesan saq setimpal kance selapuq perbuatan ie pade.

¹⁶ Tiang sampẽang karing sekali: Ndaq jangke araq saq nganggep tiang bodo. Laguq lamun side pade nganggep tiang maraq nike, ijinang tiang saq bodo niki bau bangge ẽndah sekediq.

¹⁷ Mangkin niki gen tiang jelasang, napi saq tiang banggeang nike, laguq ndẽqne Tuhan saq manikang tiang nyampẽang maraq nike. Lẽq dalem hal niki tiang tetu-tetu ngeraos maraq dengan bodo.

¹⁸ Mule araq luwẽq dengan saq banggeang hal-hal duniawi, jari tiang mẽlẽ ẽndah bangge maraq nike.

¹⁹ Sẽngaq siq angen saq seneng ie pade sabar lẽq dengan bodo, lantaran side pade merase diriq ceket gati!

²⁰ Side pade alurang diriqde tejariang panjak siq dengan, atao meres dait bait keuntungan lẽman side pade, atao merase diriqne atasan lẽman side pade dait bani namper side pade.

²¹ Tiang ilaq akuq bahwe tiang pade lemah gati jari piaq maraq nike. Laguq napi saq dengan lain bani banggeang, tiang ẽndah bani! (Tiang ngeraos maraq dengan bodo.)

²² Napi ie pade dengan Ibrani? Tiang ẽndah dengan Ibrani. Napi ie pade dengan Israel? Tiang ẽndah dengan Israel. Napi ie pade keturunan Ibrahim? Tiang ẽndah maraq nike!

²³ Napi ie pade pelayan-pelayan Almasih? Kedengahanne maraq tiang niki sampun telang akal, laguq tiang mule pelayan saq solahan lẽman ie pade selapuqne! Tiang luwẽqan begawẽan, tiang kerengan tetamaq ojok dalem bui, tiang luwẽqan tesiksaq dait kereng gati gen matẽ.

²⁴ Sampun lime kali tiang tesiksaq siq dengan Yahudi, tempuk telung dase siwaq kali kadu pecut.

²⁵ Telu kali tiang tepecut siq dengan-dengan Roma; sampun ẽndah tiang tepelẽwas kadu batu. Telu kali tiang ngalamin kandas kapal lẽq segare, dait sekali tiang ngompal lẽq segare empat likur jam ngonẽqne.

²⁶ Kereng gati tiang lalo ojok taoq saq luwẽq bahayene: Teancem bahaye belabur, bahaye rampok, bahaye lẽman pihak Yahudi dait lẽman pihak ndẽq Yahudi, bahaye lẽq dalem kote, dait lẽq luah kote, bahaye lẽq segare, dait bahaye lẽman dengan-dengan saq ngaku semeton padahal ndẽq.

²⁷ Tiang setenge matẽ begawẽan dait bejuang keras: Kereng ndẽq tindoq, ndẽq ngelor, ndẽq nginem, kereng gati tiang kelapahan, ketelihan sẽngaq kurang kelambi dait ndẽq bedowẽ taoq ndot.

²⁸ Selain nike, sebilang jelo tiang kuatir ẽndah lẽq keadaan selapuq jemaah.

²⁹ Lamun araq saq lemah tiang ẽndah milu merase lemah. Lamun araq saq bedose, angen tiang milu remuk.

³⁰ Jari, lamun tiang harus banggeang sopoq hal, make hal-hal saq tiang banggeang nike nyatayang kelemahan tiang.

³¹ Allah, Bapa lẽman Junjungante Saq Mulie Deside Isa, wikan bahwe tiang ndẽq beduste. Tepuji pesẽngan-Ne selaẽq-laẽqne.

³² Sewaktu tiang araq lẽq Damsyik, gubernur saq bekuase lẽq derike, lẽq bawaq pemrẽntahan Raje Aretas, mrẽntahang tenterene jagaq jebak belẽq kote nike jari bau tiang.

³³ Laguq siq sopoq keranjang tiang teturunang ojok bawaq langan sopoq loang lẽq tembok. Maraq nike entane tiang lolos lẽman kekuasean gubernur nike.

2 Korintus

Video 2 Korintus 11

Ikuti Kami:

KONTAK | PARTISIPASI | DONASI