Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tanu ngini niosabari ngaro ngoi 'isoka tohaga-haga ma eta. Ma rai kaidadi niosabari koge'ena.

² Ngoi tinisi-singina, 'isoka ma Jo'oungu ma Dutuoli winisi-singina. Ngini ge'ena 'isoka 'o mosolese mimoi gee 'o nauru komanakowasi, gee tosijajiokau 'asa mongaamoko de wimoi, ge'ena la ma Kristus.

³ Ma ngoi tododato 'ania singina 'ilenge de koniotatapuwau ma Kristusoka, 'isoka ma sira ngo Hawa mita mi singina 'ilenge 'o ngia ma balifutaka.

⁴ Sababu ngini kanioduaka niakidawongo 'o nyawa gee yoboa de yosidotoko 'o habari ma ngale 'o Yesus gee 'imakaregu de gee miosidoto-dotokokau nginika. De niadawongo mita 'o ngomasa de 'o habari gee ka ma eta ma koimakadaenuwa de 'o Ngomasa 'Itebi-tebini de 'o Habari ma Owa gee miositota-totarokau nginika.

⁵ Ngoi tomamaoku ka ma eta ma kotodaduukuwa de 'o nyawa gee yomadiai 'isoka 'o su-suloko gee ngini niamaoku 'ona yodaduie!

⁶ Poilia ngoi kotocawarowa tobicara, ma nako 'o barija, ngoi ne'ena 'o nyawa koihaga-hagawa. Ge'ena ngomi miosidumutokau nginika naga 'o sagala moi-moioka.

⁷ Gee ngoi tositotara 'o Habari ma Owa ma Jo'oungu ma Dutuno nginika, ngoi ka ma eta ma kotoga'asokuwa niriwo, de ma ngekomo ge'ena, ngoi tomadiai tomadaduuku la ngini tinisidaduie. Koge'ena todiai ge'ena tosowono nginika? Ma rai ko'uwa!

⁸ Gee ngoi tinileleani ngini, 'o jamati 'iregu-regu yokula 'o ro-riwo ngoino. 'Idadi pongose 'ato ngoi takisirugi 'o jamati go'ona la 'idadi tinileleani.

⁹ Ma 'orasi ge'ena nako ngoi 'isidukuranguku, ka moi ma koma'iwa tinisisusa nginioka. Ngoi topa-paraluu 'iodumu ge'ena ka nanga 'esa moi 'o Makedoniano yoboa-boano yasadia. Ngoi tomasitiari la 'uwa tinisitubuso 'o sagala moi-moioka naga. De ngoi 'asa kaitaurika tomasitiari la ka koge'enau.

¹⁰ Sababu ngoioka de ma 'ena ma Kristus 'awi do-dotoko 'iti-tiai, so 'okia naga gee tosiie-ie ge'ena koidadiwa yaisanga kiaka naga bato 'o Akhaya ma daeraa yasuluunuku ne'ena.

¹¹ Ngoi kotoga'asokuwa niriwo, ge'ena ko ma ngalewa 'ato kotinidorawa. Ma Jo'oungu ma Dutu wanako ngoi tinidora!

¹² 'Okia naga gee ma 'orasi ne'ena tadi-diai, dua kotomaogoruwa todiai la 'o nyawa gee yomadiai 'isoka "'o su-suloko" ma amoko go'ona koidadiwau yobicara yomaie-ie de yongose 'ato 'ona yomanarama 'isoka ngomioli.

¹³ 'O nyawa koge'ena, ge'ena ka 'o su-suloko ma ngeluku. 'Ona ge'ena yomanarama ka 'o nyawa yakisibalifuta, yomadiai 'isoka ma Kristus 'awi su-suloko.

¹⁴ Koidadiwa poherangi 'ona yodiai koge'ena, sababu 'o Tokata ma Koana ma sirete mita 'imadiai 'isoka ma Jo'oungu ma Dutu wi mala'ekati.

¹⁵ So kopoheranguwa mita nako 'o Tokata ma Koana ma su-suloko 'imadiai 'isoka 'o su-suloko gee ma Jo'oungu ma Dutu wi mau yadi-diai. Ma duanguku 'ona 'asa yamake ma boiro moteke to 'ona manga manarama.

¹⁶ Tosigali ma moiosi: 'Uwa sigado naga yamaoku ngoi tohaga-haga. Ma nako ngini mita niamaoku ngoi tohaga-haga, ge'ena nisimadaka ngoi gee tohaga-haga ne'ena 'ai singina 'iamoko ma eta.

¹⁷ Ma ge'ena, ko ma Jouwa wosuloko tosidemo. Ne'ena dau ma dodaka, ma gou-goungu ngoi tobicara 'isoka 'o nyawa yohaga-haga.

¹⁸ Naga 'o nyawa manga gudai, moteke 'o dunia ma di-dibangi, yongose 'ato 'ona yodaduie, so ngoi mita tobicara koge'ena la niasahe.

¹⁹ Ngini de nia singina 'isa-sanangi niosabari 'o nyawa 'ihaga-hagaka, sababu ngini niomamaoku niobarija ma sala!

²⁰ Ngini kanimasidabika nako 'o nyawa nisiyongosi, bolo nikaforiki, bolo nisirugi bolo yomaie 'ato 'ona 'ifoloi yodaduie, de kayomoroini nipoka.

²¹ Ngini niongose ngoi salingou 'imaeke? tosidemo 'ato ngomi kaifoloi komia'akunuwa ma ngale miodiai 'isoka ge'ena? Ma 'okia naga gee 'o nyawa go'ona yomoroini yosiie-ie, ngoi mita tomoroini! (Ngoi tobicara 'isoka 'o nyawa yohaga-haga.)

²² 'Ona yongose? 'ato 'ona 'o Ibrani ma nyawa? Ngoi mita 'o Ibrani ma nyawa. 'Ona 'o Israeloka? Ngoi mita 'o Israeloka. 'Ona ge'ena 'o Abrahamuno? Ngoi mita koge'ena!

²³ 'Ona yongose 'ato 'ona ge'ena ma Kristus 'awi su-suloko? Po'isenika ngoi 'isoka 'ito-togosangou sababu tobicara kone'ena, duga ma goungu ngoi 'o su-suloko gee 'ifoloiosi yaowa de de 'ona yoodumu! Ngoi tomanarama 'ifoloi 'ikuata, ngoi 'ifoloi 'ikudai 'isingosama 'o buika, ngoi 'ifoloi 'ikudai 'isikisaa de ma gudai rekeni tosongenoka.

²⁴ Ma motoau 'o Yahudi ma nyawa 'isikisaa 'isitifo de 'o be-besana, 'ipesana ma noimi 'igilio ma nagi yasa-sa'ange de siwo.

²⁵ Ma sa'angeu 'o Roma ma nyawa 'o gota 'isipesana. Mita ma moiou 'iriteto yomau 'iso-songene. Ma sa'angeu 'o ngootoka 'o kapali 'isilutu, de ma moiou ngoi tobaorika 'o ngooto ma dekuoka 'o wange moi de 'o obiri moi.

²⁶ 'Ai do-dagi ma sigoronaka ma gudai 'o bahaya 'idutuku; 'idungu'uisi, yo'ora-'ora, naga 'o Yahudi ma nyawano, mita ko 'o Yahudiwa ma nyawano, 'o bahaya 'o kotaka de ko 'o kotakawa, 'o ngootoka, de mita 'o nyawano gee yomasielu-eluku 'ato 'ona ge'ena yongaku-ngaku, 'ena momongo ko'uwa.

²⁷ Ngoi tomariwo tomanarama sigado tosangisara ma sala; ma gudai kotoma'iduwa, 'isawini, de 'ai kibiti 'idudungu ma sala, ma gudai 'ai 'inomo koi'iwaka, to'alo sababu 'ai pakeangi 'isidukurangi de kokiakawa tomanoa.

²⁸ Ko'uwasi gee naga 'iregu-reguosi, de mita 'o wange 'isinoimi tatiba-tibangi ma ngale 'o jamati 'iodumu, so 'ai singina 'itubuso.

²⁹ Nako gee koyokua-kuatuwa, ngoi mita tamaoku koge'ena. Nako naga yootaka 'o sowonuku, to ngoi 'ai singina mita 'i'ogu.

³⁰ So nako ngoi salingou tosiie 'o kianikia, ge'ena kaisidumutu 'okia naga gee kota'akunuwa rekeni.

³¹ Ma Jo'oungu ma Dutu, ma Jou Yesus 'awi Dea, wanako 'ato ngoi kotoelukuwa. Powisiarene ma Jo'oungu ma Dutu kaisi'ado-'adonika.

³² Gee ngoi 'o Damsyikoka, ma gubernur gee wodadi balusu ge'ena ma Koana 'o Aretas wi pareta ma sigoronaka, wosuloko 'o solodado yajaga 'o kota ge'ena ma ngorana la 'itagoko.

³³ Duru 'o rata 'o ngai moi so ge'enakau de 'isisupu 'o tembok ma sukonika de 'isidisiara dakuuku 'o kota ma tembok ma dudunuku. De ge'enau ngoi 'idadi tosupu ma gubernur 'awi giama ma soatoka.

2 Korintus

Video 2 Korintus 11

Ikuti Kami:

KONTAK | PARTISIPASI | DONASI