Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pomayakpa makow aku'oi in tumombodok topilik. Mota'aubií degaí?
2 Aku'oi mokotanob ko'i monimu, naonda bo kototanob i Allah ko'i monimu. Mo'ikow nion naonda mongodeaga inta aim pinodandiku kon nika'an in tobatuí ḷoḷaki, ḷoḷaki tatua ing ki Kristus.
3 Ta'e molia-liaupa ing ginaku sin dika-dika bo mo'itabat in raian monimu bo diaídon motoindudui ko'i Kristus, naonda bo ki Hawa kolipod inta kino akaḷan in uḷag.
4 Sin tarukira'ankumai mo'ikow tongaíbií kibio-bioímai aka oyuíon in intau mamangoi bo mopota'au in habar soaáḷ ki Yesus, ta'e ki Yesusbií tolaeng, de'emanbií ki Yesus inta aim pinota'au muna nami ko'i monimu. Bo tarima'an doman monimu in roho bo "habar mopia" inta totu-totu'ubií kon diaí notongkai in Roho i Allah bo Habar Mopia inta aim muna sinarima monimu nongkon i nami.
5 Ta'e podudui in raianku, aku'oi na'a in diaíbií tongaí naí "rasul mita" inta mongotoyang tatua!
6 Degaí diaí basií mota'au mosingog in aku'oi, ta'e aka tongaí pororai, yo aku'oi im mota'aubií doman. Bo tua in aim bidon nodait inontong monimu.
7 Degaí diaí no'itaḷaí in aidku tana'a, aka aku'oi im mokopo'ompaí simbaí poḷantudon im mo'ikow. Sing ko wakutu nopoyaput in Habar Mopia inta nongkon i Allah ko'i monimu, yo aku'oi in diaíbií noki uboli topilikpamai ko'i monimu.
8 Sing ko wakutu in aku'oi nogaid kon sigad monimu, aku'oi in inongkosbií in jama'at mita ibanea. Daí mota'aubií singogonku kon totokbií in nokoporugimai kon jama'at mita simbaí aku'oi mota'au motuḷung ko'i monimu.
9 Bo aka kodaitan in aku'oi, yo diaíbií mokoposusahmai kon intau tobatuímai kon sigad monimu. Sin onu im moga'at ko'inakoí komintanbií ki utat mita inta namangoi nongkon Makedonia im mobogoi.
10 Lunganga ing ginaku diaíbií modai-dait kom bayongan lipu in Akhaya, sin totunduí mita inta mobanar umuran moyotakinku makow.
11 Eta nongonubií sim mosingogbií aku'oi kon natua? Degaí diaí motabi in aku'oi ko'i monimu? Kinota'auanbií i Allah in tabiku ko'i monimu!
12 Onu im pinomiaku tana'a, tantuíkubií doman aidan, simbaí diaí in dodoyonan in "rasul mita" tatua dumodia bo moguman kom mosia im mogaid naonda bo kami.
13 Sin intau mita tatua in de'emanbií totu-totu'u rasul. Mosia tua in tongaíbií mogogaid inta mo'ibo-ibog mongakaḷ kon intau bo mongaku saḷaku rasul mita i Kristus.
14 Diaíbií mokoherang in oaíid monia tua, sin ibilispa in nongaku doman saḷaku malaekat im bayag!
15 Daí diaídon mota'au herangon aka dumodudui mita in Ibilis mongaku saḷaku mogogaid mita kon oaíidan i Tuhan. Tongaí mosia tua im motarimabií kon hukuman podudui in oaíid monia tua.
16 Buikupa doman ponorop: Dona'ai modapot oyuíon in intau monganggap ko'i nakoí bodok. Ta'e aka mo'ikow bo monganggap ko'i nakoí natua, daí diaíbií doman nongonu simbaí mota'aupa in aku'oi dumodia topilik.
17 Mo'iduduimai na'a, modaitku tangoion onu inta mokoḷunganga kong ginaku, ta'e de'emanbií ki Tuhan in nomarentah nokipoguman in na'a ko'i nakoí. Mangalenya totu-totu'upabií aku'oi in nosingog naonda bo intau bodok.
18 Totu'ubií kom mobayongbií in intau inta moduií kon onu inta kon dunia na'a, tuamai dumuií doman tontanií in aku'oi.
19 Tantuí mosanangbií ing gina monimu nosabar sinumayow kon intau mita bodok. Sin inanggap monimu mopandoi im mo'ikow!
20 Tongaí pomayak makow monimu aka oyuíon intau monombudak ko'i monimu, andeka momakisa mo'igum bo mogamaí kong ka'untungan ko'i monimu, ande inta monganggap kom mosia im moḷantu-ḷantud nongkon i monimu sahingga im mobarani monokap ko'i monimu.
21 Takin porasa'an mo'oyak musti akuonku, kong kami in diaíbií mokobalií im momia natua. Ta'e aka intau ibanea bo mokobalií dumodia, yo aku'oi im mobaranibií doman! (Aku'oi mosingog naonda bo intau bodok.)
22 Degaí mopongata kom mosia tua intau in Ibrani? Kaka aku'oi intaubií doman Ibrani. Mopongata kon intau in Israel? Ka aku'oi doman intau Israel. Mopongata kon katurunan i Abraham? Ka aku'oi doman turunan i Abraham!
23 Degaí mogogaid mita i Kristus im mosia? Kodongogan naonda bo diaí moratak in aku'oi ta'e totou'ubií kon aku'oibií na'a im mogogaid i Allah inta mopia-pia nongkon i monia tua. Aku'oi umuran morajing im mogaid, mokakit in aku'oi bonuon monia kom ponjara, bo mokakit doman aku'oi in roriga'an monia gogioí bo matoi.
24 Ain kolima aku'oi iroriga intau mita in Yahudi nodapot sinambok kotoḷu nopuḷuh bo siow.
25 Kotoḷu aku'oi sinambok intau mita in Rum; pernah doman aku'oi inarab monia im batu. Kotoḷu doman aku'oi in sinumaḷom kong kapaḷ kon dagat, bo komintandon doman aku'oi dongkadon no'itoḷoḷantak makow kon yuaík in dagat tosinggai bo tonggobi'i.
26 Kom bonu im bobayaíanku mobayong totok kodungkuḷanku in soaáḷ mita inta moko'ondok: oyuíon inta moko'uma kon ḷunud, moyodungkuḷ in intau mora'at, moyogintayow in romuk intau in Yahudi bo intau de'eman Yahudi, moyotayow im bahaya mita inta mobalií kong kota' bo kon ḷuai ing kota', inta bahaya mita kon dagat bo moyotayow in intau mita inta mongaku notobatuí kom pirisaya ko'i Yesus, padahaḷ bo diaíbií.
27 Mobakuat totok aku'oi im mogaid, sahingga mokakit diaídon mokoposiug, diaídon mokoponga'an, diaídon mokoponginum, bo mokakit domandon monahang in tonow sin diaídon koḷambu-ḷambung pakeíon bo diaí domandon im baḷoi pogutunan.
28 Bo pomuḷoi in singgai molia-liau doman ing ginaku kong ka'ada'an bayongan jama'at.
29 Aka aku'oi mokorasa kom molemeí, yo aku'oi im mo'itakinbií doman molemeí. Aka oyuíon im mo'ila'utdon mogaid kon inta diaí mopia, yo mo'itakinbií doman ing ginaku moyoyiga.
30 Daí aka aku'oi bo moduií kon onukadon, yo duiíonku tua ing kakurangankubií.
31 Ta'e ki Allah ki Amaí i Yesus, Tuhan naton nonota'aubií kon aku'oi in diaíbií monguboḷ. Dinayo-dayowdon in tangoi-Nya nodapot ing kopaḷutannya.
32 Wakutu in aku'oi kon Damsyik ki gubernur inta nonguasa kon tua, inta kom bonu im pomarenta'an i raja Aretas, nokiḷukad kon tontara kon ngara ing kotaí tatua sim modomok ko'inakoí.
33 Ta'e aku'oi pinoḷagui in intau pinongin bubuí in dinding kota tatua. Aku'oi pinopobonu monia kong karansi bo pinoḷuai. Tuamai diaí kinodomokan i gubernur tatua in aku'oi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA