Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai roh ma par Kirjat-Jearim, mamboan Poti ni Jahowa tangkog hu rumah ni si Abinadab na i atas ni raboyon; iuras sidea ma si Eleasar, anakni ai manramotkon poti ni Jahowa.
2 Anjaha singgan ni partading ni poti ai i Kirjat-Jearim, hundokah do, adong do hira-hira dua puluh tahun, sai dompak Jahowa do uhur ni ganup halak Israel.
3 Jadi nini si Samuel ma hu bani ganup halak Israel, “Anggo mulak nasiam hu bani Jahowa hun bani gok ni uhur nasiam, padaoh nasiam ma hun tongah-tongah nasiam naibata na legan pakon Astarot, anjaha marsijoloman ma uhur nasiam bani Jahowa, anjaha pitah-Si ma balosi nasiam, ase ipaluah nasiam hun tangan ni halak Palistim.”
4 Jadi ipadaoh halak Israel ma Baal pakon Astarot, anjaha pitah Jahowa mando ibalosi sidea.
5 Dob ai nini si Samuel ma, “Patumpu ma haganup halak Israel hu Mispa, ase martonggo ahu hu bani Jahowa halani nasiam.”
6 Jadi martumpu ma sidea i Mispa, itahui sidea ma bah anjaha iuseihon sidea ma ai i lobei ni Jahowa, anjaha marpuasa ma sidea bani ari ai, anjaha nini sidea ma, “Domma mardousa hanami bani Jahowa.” Anjaha maruhum ma si Samuel bani sidea i Mispa.
7 Tapi dob ibogei halak Palistim, na dob martumpu halak Israel i Mispa, tangkog ma ganup raja ni halak Palistim dompak halak Israel. Jadi dob ibogei halak Israel ai, mabiar tumang ma sidea mangidah halak Palistim.
8 Jadi nini halak Israel ma hu bani si Samuel, “Ulang ma ham maronti dilo-dilo hu bani Jahowa Naibatanta halani hanami, ase ipaluah hanami hun bani tangan ni halak Palistim.”
9 Jadi ibuat si Samuel ma sada biri-biri na inuman anjaha igalangkon ma ai songon galangan situtungon bani Jahowa; anjaha dilo-dilo ma si Samuel hu bani Jahowa laho mangapiti halak Israel, gabe ibalosi Jahowa ma ia.
10 Sanggah na manggalangkon galangan situtungon ai si Samuel, manrongoman ma roh halak Palistim laho mamorang halak Israel; tapi marsora ma ponggei ibahen Jahowa gogoh-gogoh sadari ni ai laho mangimbang halak Palistim, gabe geor ma sidea; jadi talu ma sidea mangimbang halak Israel.
11 Jadi luar ma halak Israel hun Mispa, lanjar ipardakdak ma halak Palistim ai, anjaha italuhon ma sidea das hu kehen ni Bet-Kar.
12 Ibuat si Samuel ma sada batu, ipajongjong ma ai i holangkolang ni Mispa pakon Jesanah anjaha ibahen ma goranni: Eben-Eser, ai nini do, “Ronsi sonari iurupi Jahowa do hita.”
13 Jadi talu ma halak Palistim, anjaha seng roh be sidea hu tanoh ni halak Israel, anjaha sai iodohkon tangan ni Jahowa do halak Palistim sadokah goluh ni si Samuel.
14 Anjaha mulak ma hu bani halak Israel sagala huta, na binuat ni halak Palistim hun bani halak Israel, singgan ni Ekron das hu Gat; sonai homa tanoh ni sidea ibuat halak Israel ma hun bani tangan ni halak Palistim. Mardamei ma homa halak Israel pakon halak Amori.
15 Si Samuel do manguhum halak Israel sadokah manggoluh ia.
16 Jadi ganup tahun do ia maringgot laho hu Betel, hu Gilgal pakon hu Mispa anjaha iuhumi ma halak Israel bani ganup ianan ai.
17 Dob ai mulak ma ia hu Rama, ai ijai do rumahni; anjaha ijai pe idalankon do panguhumion bani halak Israel. Anjaha ipauli ma ijai sada anjapanjap bani Jahowa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA