Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Emaka ilegi penduduk Kiryat Jearim Peti Perpadanen TUHAN jenari ibabana ku rumah Abinadap si ringan i das sada uruk. Itangkuhkenna anak Eleasar gelah njagai Peti e.
2 Peti Perpadanen TUHAN ndekah tading i Kiryat Jearim, lit dua puluh tahun. Kidekah e kerina bangsa Israel nderkuh mindo penampat man TUHAN.
3 Ikataken Samuel man bangsa Israel nina, "Adi atendu mulihken ku TUHAN alu bulat ukurndu, arus ipedauhndu dibata-dibata si deban ras gana-gana Dewi Astarte. Endesken dirindu alu bulat ukur man TUHAN janah Ia sajalah ngenca isembahndu, maka IkeliniNa kam i bas kuasa kalak Pilisti nari!"
4 Emaka iambekken kalak Israel kerina gana-gana Baal ras Astarte si lit i bas ia, jenari nembah ia man TUHAN saja.
5 Kenca bage itenahken Samuel kerina bangsa Israel gelah pulung i Mispa, alu ngataken, "Ateku ertoto i je man TUHAN guna kam."
6 Emaka pulung ia kerina i Mispa, itimbana lau jenari iamburkenna jadi persembahen man TUHAN janah erpuasa ia i bas sada wari e. Nina kerina, "Kita nggo erdosa man TUHAN." (I Mispa me ingan Samuel ngerunggui perkara si lit i tengah-tengah kalak Israel.)
7 Kenca ibegi bangsa Pilisti maka bangsa Israel nggo pulung i Mispa, raja kalak Pilisti si lima reh ndarat ras tenterana nerangsa. Ibegi bangsa Israel kerna si e janah mbiar ia,
8 emaka nina man Samuel, "Ertotolah kam terus man TUHAN Dibatanta guna ngkelini kita i bas kalak Pilisti nari."
9 Igeleh Samuel sada anak biri-biri nguda jenari itutungna bulat-bulat jadi persembahen man TUHAN. Kenca bage ertoto ia man TUHAN gelah IsampatiNa bangsa Israel, janah ialoi TUHAN pertotonna.
10 Asum Samuel erbahan persembahen e, bangsa Pilisti reh nerangsa, tapi pas tupung si e TUHAN erlenggur i langit nari ngelawanca. Bene kal ukurna kerina jenari lanai erturi-turin perlompatna.
11 Ndarat bangsa Israel i Mispa nari jenari iayakina bangsa Pilisti menam seh ku Bet-Kar, janah ibunuhna bangsa Pilisti e gedang-gedang dalan.
12 Jenari ibuat Samuel sada batu, itamakenna kelang-kelang Mispa ras Jesana, janah nina, "TUHAN nggo nampati kita seh ku ingan enda" janah igelarina batu e "Batu Penampat".
13 Bage me kalak Pilisti italuken, janah iambati TUHAN ia mengketi daerah Israel kidekah Samuel nggeluh.
14 Kerina kota kelang-kelang Ekron ras Gat si nggo ikuasai bangsa Pilisti iulihken man Israel, emaka nggo mulihken kerina daerah e man Israel. Janah nggo ka lit perdamen pe i bas kalak Israel ras kalak Kanaan.
15 Samuel erkuasa i Israel kidekah geluhna.
16 Tiap tahun isiarna Betel, Gilgal, ras Mispa, janah i bas ingan enda idungina perkara-perkara.
17 Kenca bage mulih ka ia ku rumahna i Rama, janah i bas ingan e pe ia erdahin jadi hakim. I Rama ipajekkenna batar-batar man TUHAN.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA