Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jari naallemi pandudu’na Kiryat-Yearim anjo Patti ParjanjianNa Batara, nampa naerang ri balla’na ri se’reang tau niarenga Abinadab. Anjo ballaka iratei ri buluka ammantang. Nampa naminynyaki ke’nanga siagang naangka’ Eleazar ana’na Abinadab, a’jari pajaga ri anjo Patti Parjanjianga.

² Sallo tongi ammantang anjo Patti ParjanjianNa Batara ri Kiryat-Yearim, kira-kira niaki ruampulo taung. Lalang sikammaya anjo sallona, akkio’mi sikontu umma’ Israel appala’ tulung ri Batara.

³ Nakanamo Samuel ri umma’ Israel, "Punna erokko ammotere’ mae ri Batara siagang anynyomba ri Ia siagang sikontu atinnu, musti nupela’ ngasengi sikontu rewata battu-battua siagang patunna Dewi Asytoret. Passareang tabasikali kalennu mae ri Batara, siagang anynyomba mako mae ri Ia bawang, na Nalappassangko battu ri tu Filistin."

⁴ Jari napela’mi tu Israel patung-patunna Rewata Baal siagang patunna Dewi Asytoret, nampa anynyomba mae ri Batara bawang.

⁵ Le’baki anjo nakanamo Samuel, "Pa’rappungangi sikontu bansa Israel ri Mizpa, nampa lappala’ doanga’ untu’ ikau ngaseng."

⁶ A’rappungang ngasemmi ke’nanga ri Mizpa. Anynye’ro’mi ke’nanga je’ne’ nampa napatiri’ salaku passare mae ri Batara, nampa appuasa ke’nanga siallo kabusu’, anjo alloa. Nakanamo ke’nanga, "Dorakami ikambe mae ri Batara." (Anjoremmi ri anjo Mizpa napakaramulai Samuel ampakabajiki sikamma parkara passisala-pasalanga ri tu Israel.)

⁷ Nalangngere’na tu Filistin angkanaya a’rappungammi tu Israel ri Mizpa, a’lampami mange anjoreng anjo limaya karaeng ri Filistin siagang tantarana ke’nanga untu’ ambunduki tu Israel. Nalangngere’na tu Israel anjo kabaraka, malla’mi ke’nanga.

⁸ Nakanamo ke’nanga ri Samuel, "Teako ammari appala’ doang mae ri Karaeng Allata’alata, sollanna Napasalamakki’ battu ri tu Filistin."

⁹ Lanri kammana, ammolommi Samuel sikayu ana’ gimbala’ rungka, nampa nakoro’bangkang sipa’gang a’jari koro’bang nitunu untu’ Batara. Le’baki anjo appala’ doammi sollanna Natulung Batara tu Israel. Na nitarimamo pappala’ doanna.

¹⁰ Ri wattunna sitabang napassareang anjo koro’bang nitunua, appakkaramulami tu Filistin battu ambunduki tu Israel. Mingka sitabang le’baki anjo wattua a’gunturu’mi Batara battu ri langika mae ri ke’nanga. A’jari siricuimi ke’nanga nampa piti lari-lari napakamma lingu.

¹¹ Assulu’mi tantara Israel battu ri Mizpa nampa naondang anjo tu Filistin, sa’genna la’biring mange ri Bet-Kar bellana, nampa naancuru’ ke’nanga.

¹² Le’baki anjo appaentemmi Samuel se’re batu, ri pa’baeng-baenna Mizpa siagang Sen. Nakanamo, "Natulung maki’ Batara siganna’na." Nampa naareng anjo batua "Batu Pannulungang".

¹³ Kammaminjo nanibetamo tu Filistin. TaNapa’biangai Batara antama poleang ke’nanga ri daerana Israel, lalang attallasa’na ija Samuel.

¹⁴ Sikontu kota Israel le’baka nibeta ri tu Filistin, appakkaramula battu ri Ekron sa’genna Gat, nipoterangi mae ri tu Israel. Jari nagappa ngasemmi ammotere’ sikontu daerana tu Israel. Assiama’mi tu Israel siagang tu Kanaan.

¹⁵ Ammarentai Samuel lalang sikontu tallasa’na.

¹⁶ Taung-taungi a’jappa akkuliling mae ri Betel, Gilgal, siagang Mizpa. Siagang sikamma parkara-parkara passisalang niaka ri sikamma anjo tampaka, napa’le’ba’ ngasemmi napakabaji’.

¹⁷ Punna le’baki anjo tuli ammotereki mange ri balla’na ri Rama. Anjoreng a’jari hakingi ri tu Israel, siagang pole ambangung tongi pole se’re tampa’ pakkoro’bangngang untu’ Batara.

1 Samuel

Video 1 Samuel 7

Ikuti Kami:

KONTAK | PARTISIPASI | DONASI