Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Daddi Petthe Parjanjiyanna PANGERAN jareya bi’ reng-oreng Kiryat-Yearim ekone’e, pas egiba ka bengkona oreng se anyama Abinadab; bengko jareya badha e attassa gumo’. Saellana jareya bi’ reng-oreng Kiryat-Yearim jareya ana’na Abinadab se anyama Eleyazar pas etahbissagi, epajaga Petthe Parjanjiyan jareya.
2 Abidda Petthe Parjanjiyan se badha e Kiryat-Yearim, ra-kera dhu polo taon. Saabidda jareya ommat Isra’il aserro nyo’on tolong ka PANGERAN.
3 Samuwel pas adhabu ka ommat Isra’il, "Mon ba’na pajat abaliya ka PANGERAN ban abakteya ka Salerana kalaban gu-onggu, mara buwang sakabbinna ba-diba se asalla dhari nagara manca ban arcana dewi Asytoret. Ba’na kodu massra’agi aba’ ka PANGERAN ban abakte ka Salerana malolo, tanto ba’na pas epabebas dhari oreng Filistin."
4 Daddi oreng Isra’il pas mowang ca-arcana diba Ba’al ban arcana Dewi Asytoret, sarta pas abakte ka PANGERAN malolo.
5 Saellana jareya Samuwel adhabu, "Mara oreng Isra’il soro akompol e Mizpa kabbi, sengko’ pas nyo’onnagiya ba’na kabbi ka PANGERAN."
6 Oreng Isra’il pas padha akompol e Mizpa kabbi. Reng-oreng jareya nemba aeng, aengnga pas etotta’ menangka tor-ator ka PANGERAN, saellana jareya kabbi pas padha apowasa saare benteng e are jareya. Oca’na reng-oreng jareya, "Sengko’ reya dusa ka PANGERAN." (E Mizpa jareya Samuwel ngoros sakabbinna parkarana oreng Isra’il epasampe’ mare.)
7 E bakto oreng Filistin ngedhing ja’ oreng Isra’il akompol e Mizpa, ratona se kalema mangkat ka jadhiya ban tantarana, nyerranga oreng Isra’il. Oreng Isra’il ngedhing parkara jareya, pas arassa tako’.
8 Oca’na reng-oreng jareya ka Samuwel, "Ngereng ja’ ambu nyo’onnagi terros ka PANGERAN sopaja oreng Isra’il eparengngana salamet dhari oreng Filistin."
9 Daddi Samuwel pas nyambelli budhu’na dumba se gi’ ngodha settong, eatorragi menangka kurban obbaran ka PANGERAN. Saellana jareya pas adu’a ka PANGERAN nyo’onnagi oreng Isra’il, ban parnyo’onanna jareya ekabbuli bi’ PANGERAN.
10 E bakto Samuwel teppa’na ngatorragi kurban obbaran jareya, oreng Filistin molae nyerrang; tape e bakto jareya keya PANGERAN centharan padha ban galudhuk dhari langnge’ e attasanna reng-oreng Filistin. Reng-oreng Filistin jareya pas salbut kabingongan.
11 Tantara Isra’il kalowar dhari Mizpa, pas nyerser oreng Filistin sampe’ para’ napa’a ka Bet-Kar, reng-oreng Filistin jareya epaancor.
12 Saellana jareya Samuwel ngala’ bato settong, epamanjeng e antarana Mizpa ban Sen. Dhabuna Samuwel, "PANGERAN ta’ gung-nanggung apareng partolongan ka oreng Isra’il" — bato jareya pas enyamae "Bato Partolongan".
13 Daddi oreng Filistin epakala. Bi’ PANGERAN oreng Filistin ta’ eedine maso’ ka dhaerana Isra’il pole, saabidda Samuwel gi’ odhi’.
14 Tha-kotthana Isra’il se la ekobasae oreng Filistin, molae dhari Ekron sampe’ ka Gat, epabali kabbi ka oreng Isra’il pole. Oreng Isra’il ban oreng Kana’an taremtem odhi’na.
15 Samuwel marenta Isra’il saomorra.
16 Sabban taonna Samuwel jareya meyos ka Betel, Gilgal ban Mizpa. E sakabbinna kennengngan jareya Samuwel ngoros ra-parkara sampe’ epamare kabbi.
17 Mon la mare tanto pas gubar ka kalenggiyanna e Rama. E jadhiya Samuwel daddi hakimma oreng Isra’il sarta maddek mezba se eatorragi ka PANGERAN.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA