Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Saellana Saul mare se abu-dhabu ban Daud, Daud laju epadaddi ponggabana ban molae are jareya ta’ ebagi mole ka bengkona oreng towana. Yonatan pottrana Saul, meyarsa se edhabuwagi ramana ban Daud jareya. Panggaliyanna arassa lebur ka Daud, sarta neser ka kana’ jareya akantha ka salerana dibi’.
2 (18:1)
3 Daddi Yonatan asompa akanca’a salanjangnga ban Daud.
4 Yonatan mokka’ jubana, pas eparengngagi ka Daud, bariya keya pangangguyya perrangnga, peddhangnga, gandhibana ban panyengsedda.
5 Daud ajalannagi epateppa’ sabarang se etugassagi bi’ Saul; daddi bi’ Saul pas eangkat epadaddi parwirana tantarana. Daud ekaleburi bi’ sakabbinna tantarana, bariya keya bi’ para abdina Saul.
6 E bakto Daud abali dhari paperrangan saellana makala Goliyat oreng Filistin rowa, ban tantarana Saul padha abaris maso’ ka dhalem kottha, babine’an padha kalowar dhari sakabbinna kottha e Isra’il ngamba’a Rato Saul. Reng-oreng jareya anyanye gu-lagu se gumbira, atari sambi nabbu terbang ban calempong.
7 Sambi atari babine’an jareya anyanye kantha reya, "Saul mate’e moso abun-ebun, tape Daud mate’e apolowan ebu."
8 Meyarsa jareya, Saul ce’ dukana. Ca’na panggaliyanna, "Daud eanggep mate’e moso apolowan ebu, dineng sengko’ eanggep pera’ mate’e abun-ebun. Sakejja’ aggi’ tantona Daud pas epadaddi rato bi’ ra’yat reya!"
9 Sajjegga are jareya Saul ere ka Daud.
10 Kalagguwanna Saul badha e dalemma, ngastane tombagga, o-tao pas edhatengnge erroh jahat se eotos Allah, sampe’ Saul ngamok akantha oreng gila. E bakto jareya Daud teppa’na amaen calempong kantha biyasana.
11 "Bi’ sengko’ tombak reya ecocowagiya ka Daud, me’ olle Daud ban tombak reya cekka’ ka geddhung," ca’na panggaliyanna Saul; tombak jareya pas eacettagi ka Daud sampe’ dhu kale, tape lopot terros, daddi Daud salamet.
12 Saul apangrasa ja’ Daud ejaga PANGERAN, dineng salerana dibi’ la ta’ eparduli bi’ Pangeran; daddi pas tako’ ka Daud.
13 Daud laju ealle dhari karaton, epadaddi komandhanna tantara se bannya’na saebu oreng. Daddi Daud mimpin tantarana sabban badha perrang.
14 Sarrena etolonge PANGERAN, Daud ahasel terros e dhalem ajalannagi sakabbinna tugassa.
15 E bakto ngoladi ja’ Daud ahasel terros, Saul sajan tako’ ka Daud.
16 Tape oreng Isra’il ban Yehuda padha taresna ka Daud polana Daud reya bannya’ jasana e dhalem mimpin bangsana.
17 Saul amaksod sopaja Daud epate’e oreng Filistin e dhalem paperrangan sopaja ta’ osa salerana dibi’ se mate’e. Daddi e settong are Saul adhabu ka Daud, "Bi’ sengko’ ba’na epabineyana tang ana’ se anyama Merab rowa, sokor ba’na noduwagi kabangalanna e dhalem aperrang kaangguy PANGERAN."
18 Saodda Daud, "Pasera abdidalem ka’dhinto, sarengngan pole ponapa arteepon kalowargana eppa’ abdidalem e Isra’il ka’dhinto, me’ daddi abdidalem ekamantowa Rato?"
19 Tape e bakto la napa’ baktona Merab epakabina ban Daud, o-tao paraban jareya pas epakabin ban oreng laen, iya areya Adriyel dhari Mehola.
20 Pottrana Saul se laen se anyama Mikhal, lebur ka Daud. E bakto meyarsa parkara jareya, Saul ta’ nolak karebba pottrana jareya.
21 Ca’na panggaliyanna, "Dina bi’ sengko’ Mikhal epatabara ka Daud, me’ olle Daud ekenneng jebbak bi’ sengko’ ban ekenneng pate’e oreng Filistin." Daddi Saul adhabu kadhukaleyanna ka Daud, "Sateya ba’na ekamantowa bi’ sengko’."
22 Saul pas makon ba-ponggabana tek-ngetek mator kantha reya ka Daud, "Rato ce’ leburra ka junandalem, saka’dhinto jugan sadajaepon ponggabana; daddi samangken ka’dhinto bakto se paleng teppa’ monggu ka junandalem araji pottrana."
23 Tape e bakto reng-oreng jareya manapa’ panemmo jareya, Daud nyaot kantha reya, "Bi’ sampeyan esanggu gampang daddi mantona rato? Kaula paneka oreng ta’ andhi’ sareng tadha’ artena."
24 Saodda Daud jareya bi’ ba-ponggaba gella’ eatorragi ka Saul,
25 Saul laju makon reng-oreng jareya ngoca’ kantha reya ka Daud, "Se epondhut rato menangka mas kabin namong kole’na dhaina Filistin saratos meggi’, menangka babales ka mosona." (Jareya rancana se eator Saul se mateyana Daud kalaban ngangguy oreng Filistin.)
26 Pessen jareya bi’ ba-ponggabana Saul epanapa’ ka Daud, Daud narema saradda Saul jareya. Sabellunna napa’ ka batessa baktona, Daud ban tantarana mangkat ka dhaerana oreng Filistin. E jadhiya Daud mate’e dhu ratos oreng Filistin. Kole’na dhaina ekala’, pas eatorragi ka Saul kabbi. Saellana jareya bi’ Saul Daud jareya pas epakabin ban Mikhal.
27 (18:26)
28 Saul pas apangrasa ja’ Daud jareya elindhunge PANGERAN ban ekataresnae pottrana, Mikhal.
29 Daddi panggaliyanna sajan tako’ ka Daud ban saomorra baji’ terros ka Daud jareya.
30 Sabban tantara Filistin nyerrang, Daud lebbi ahasel e dhalem matompes moso jareya etembang ban para parwirana Saul se laen. Daddi asmana Daud sajan kasohor.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA