Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca nggo dung Saul ras Daud ngerana jadi me maka ngena kal ate Jonatan man Daud, janah ikelengi Jonatan ia bagi ikelengina dirina jine. Jonatan anak Saul si dilaki.
2 Mulai i bas wari e ialoken Saul si Daud, janah la iberena mulih ku rumahna.
3 Ibahan Jonatan perpadanen alu ersumpah maka ia tetap erteman ras Daud seh rasa lalap erkite-kiteken bage atena ngenana man bana.
4 Itangtangina baju jubah si sangana ipakena, iberekenna man Daud radu ras baju perangna bage pe pedangna, panahna, ras genditna.
5 Kujapa pe isuruh Saul ia erperang Daud tetap menang, janah erkite-kiteken si e iangkat Saul ia jadi puanglima tenterana. Si enda ngena ate bangsa e kerina bage pe pegawai-pegawai Saul.
6 Tupung Daud mulih kenca munuh Goliat, janah tentera e mulih ku rumah ndarat me diberu-diberu i bas tiap kuta i Israel ngalo-ngalo Raja Saul. Kerina ia ngendeken ende-enden si meriah, janahna landek-landek ras ergendang bage pe ngkuit kulcapi.
7 Sanga ia erbahan pesta si meriah e rende me diberu-diberu e erbalas-balasen nina, "Ibunuh Saul meribu-ribu tapi ibunuh Daud erpuluh-puluh ribu."
8 Si enda la ngena ate Saul emaka merawa ia. Nina, "Ikatakenna sikerajangen Daud erpuluh-puluh ribu tapi man bangku meribu-ribu ngenca. Kenca bage irajakenna me ia kari dungna!"
9 Jadi erkite-kiteken si e mulai i bas wari e, lalap ia hiri ras curiga man Daud.
10 Pepagina sada kesah sijahat si rehna i bas Dibata nari rempet ngkuasai Saul; luam cakapna i bas rumahna bagi kalak mehado. Daud sangana ngkuit kulcapi bagi semalna tep-tep wari, janah Saul sangana njemak lembing.
11 Nina Saul i bas ukurna, "Kupantemlah ia ku dingding e." Jenari pulahkenna lembing e ku Daud dua kali, tapi dua kalina isilahken Daud.
12 Mbiar Saul man Daud sabap TUHAN ras Daud tapi Saul nggo itadingken TUHAN.
13 Emaka isuruh Saul ia lawes, janah ijadikenna ia jadi komendan 1.000 kalak tentera. Ipinpin Daud tenterana e i bas pertempuren,
14 janah ia tetap menang erkite-kiteken TUHAN ras ia.
15 Iperdiateken Saul kemenangen-kemenangen Daud janah ngidah si e reh biarna pe ia jadina.
16 Tapi kerina kalak Israel ras Juda erkeleng ate man Daud sabap ia sekalak peminpin si mehuli.
17 Kenca si e nina Saul man Daud, "Enda anakku sintua, si Merap. Kuserehken ateku ia man bandu, tapi la banci la kam erdahin man bangku jadi tentera si mbisa ras setia, janah nehken perang TUHAN." (Tapi situhuna rukur Saul maka alu bagenda ibunuh kalak Pilisti pagi Daud, jadi la perlu ia jine ngelakokenca.)
18 Ngaloi Daud nina, "Ise kin aku, janah kai kin keluargangku maka banci aku jadi kela raja?"
19 Tapi kenca seh paksana Merap iserehken man Daud, labo ia iserehken man bana, tapi man sekalak dilaki i Mehola nari, Aderial gelarna.
20 Tapi anak Saul, Mihal erngena ate man Daud, janah kenca ibegi Saul kerna si e, meriah ukurna.
21 Nina i bas ukurna, "Kuberekenlah Mihal man Daud: kupakelah anakku e namaken ia ku bas perangkap, gelah ia ibunuh kalak Pilisti." Emaka ikataken Saul man Daud pedua kaliken nina, "Kubahan kam jadi kelangku."
22 Isuruhna pegawaina ngerana man Daud alu pedempak janah ikatakenna man bana, "Ngena kal ate raja man bandu janah kerina pegawai pe meriah ukurna ras kam, emaka genduari me paksa si payo man bandu ngempoi anakna."
23 Emaka ituriken kalak ndai me si enda kerina man Daud, jenari nina erjabap, "Melukah kin iakapndu jadi kela raja? Sabap aku kalak musil ras kalak si la meherga."
24 Ituriken pegawai ndai man Saul kai si nggo ikataken Daud.
25 Jenari isuruh Saul ia ngataken man Daud, "La lit si deban si ipindo raja unjuken anakna e seakatan seratus jukut sunaten kalak Pilisti, gelah seh ate raja erbalas man musuh-musuhna." (Bagenda me rencana Saul gelah Daud ibunuh kalak Pilisti.)
26 Jenari iberitaken pegawai raja man Daud kai si nggo ikataken Saul, janah meriah kal akap Daud ngukurisa adi jadi kela raja. Ope denga seh wari kerja erdemu bayu e,
27 lawes Daud ras tenterana ibunuhna 200 kalak Pilisti. Iberekenna jukut sunaten kalak Pilisti e man raja alu dem beliganna, gelah banci ia jadi kela raja. Emaka la banci la iserehken Saul anakna Mihal man Daud.
28 Alu tangkas teridah man Saul maka TUHAN ras Daud janah maka Mihal pe kelengkal atena man bana.
29 Jadi erbiarna ia man Daud, janah jadi musuhna ia kidekah geluhna.
30 Reh pe rusur tentera bangsa Pilisti erperang, tapi i bas tiap pertempuren, sangapen rusur Daud asa kerina pegawai Saul si debanna. Erkite-kiteken si e Daud jadi terberita tuhu-tuhu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA