Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nini Jahowa ma dompak si Samuel, “Sadia dokah on marhoru ho pasal si Saul, halani Huambukkon ia, ase ulang be ia raja manggomgom halak Israel? Isi ma tandukmu bani minak, anjaha laho ma ho; sihol suruhon-Ku do ho marayak si Isai, par-Betlehem ai; ai domma Hupilih Bangku sada hun bani anakni ai gabe raja.”
2 Dob ai nini si Samuel ma, “Sonaha ma parlangkahku hujai? Anggo ibogei si Saul ai, bunuhonni ma ahu.” Dob ai nini Jahowa ma hu bani, “Buat ma anak ni lombu sada, anjaha hatahon ma, ʻNa laho manggalang bani Jahowa do ahu, ase roh.ʼ
3 Anjaha dilo ma si Isai hu panggalangan ai, dob ai patugahon-Ku bam barang aha na sihol sibahenonmu; maningon minakanmu do Bangku barang ise, na sihol patugahon-Ku bam.”
4 Dob ai ibahen si Samuel ma songon na hinatahon ni Jahowa bani, anjaha das ma ia hu Betlehem. Jadi hirjatan ma pangituai ni huta ai manjumpahkonsi, anjaha nini ma, “Damei do, na hinarohkonmu on?”
5 Jadi nini ma, “Damei do; na sihol manggalang bani Jahowa do, ase roh ahu; manguras ma nasiam, anjaha roh ma nasiam mangkasomani ahu hu panggalangan an.” Dob ai iuras ma si Isai pakon ganup anakni ai, lanjar idilo ma sidea hu panggalangan ai.
6 Sanggah na masuk ai sidea, iidah ma si Eliab, gabe nini ma ibagas uhurni, ʻTontu on ma gakni siminakan i lobei ni Jahowa.ʼ
7 Tapi nini Jahowa ma dompak si Samuel, “Ulang ma tonggor rupani barang togap ni badanni, ai seng ia sipilihon-Ku; ai seng songon pangidah ni jolma pangidah ni Jahowa; anggo jolma rupa do iidah, tapi anggo Jahowa uhur na ibagas ai do iidah.”
8 Dob ai idilo si Isai ma si Abinadab, anjaha ipabontaskon ma ia hun lobei ni si Samuel. Jadi nini ma, “Ia pe seng ipilih Jahowa.”
9 Dob ai ipabontaskon si Isai ma si Samma. Tapi nini si Samuel ma, “Ia pe seng ipilih Jahowa.”
10 Dob ai ipabontaskon si Isai ma anakni na pitu ai i lobei ni si Samuel. Tapi nini si Samuel ma dompak si Isai, “Seng dong hun bani sidea na ipilih Jahowa.”
11 Dob ai nini si Samuel ma dompak si Isai, “Pitah on do anakmu ganupan?” Jadi nini ma, “Tading ope sietekan, anjaha tonggor ma, marmahan biri-biri do ia.” Dob ai nini si Samuel ma dompak si Isai, “Suruh ma na mangalopisi; ai seng anjai mangan ope hita, anggo seng ope roh ia hujon.”
12 Jadi isuruh ma na mangalopisi. Tapi magerger do huyumni anjaha jenges do rupani pakon potongan ni angkulani. Nini Jahowa ma, “Jongjongkon ma, minaki ma ia, ai in ma ia.”
13 Dob ai ibuat si Samuel ma tanduk parminakanni ai, anjaha iminaki ma ia, i tongah-tongah ni saninani ai. Jadi sogop ma Tonduy ni Jahowa bani si Daud singgan ni na sadari ai nari. Dob ai laho ma si Samuel mulak hu Rama.
14 Tapi surut ma Tonduy ni Jahowa hun bani si Saul, anjaha marulah ma sada tonduy na jahat, na sinuruh ni Jahowa bani.
15 Dob ai nini juakjuak ni si Saul ma dompaksi, “Tonggor ma, marulah do sada tonduy na jahat, na sinuruh ni Naibata bamu.
16 Mahua parentahkon ham ma, ale rajanami, hu bani jabolonmu na i lobeimu, mangindahi sada halak na pandei marhusapi, ase anggo marulah tonduy na jahat na hun bani Naibata ai bamu, jadi igiut ma husapi ai, andohar malum iahap ham.”
17 Jadi nini si Saul ma dompak jabolonni ai, “Pindahi nasiam ma bangku sada halak na pandei manggiut husapi, anjaha boban ma ia hu bangku.”
18 Jadi nini sada halak hun bani anak parana ai ma mambalosi, “Tonggor ma, hutanda do sada halak, anak ni si Isai, par-Betlehem, na mambotoh marhusapi, sada halak na borani anjaha na garang, na pandei marsahap-sahap, anjaha ihasomani Jahowa do ia.”
19 Jadi isuruh si Saul ma suruhanni hu bani si Isai, nini ma, “Suruh ma hu bangku anakmu si Daud, siparmahan biri-biri ai.”
20 Dob ai ibuat si Isai ma sada halode na mangusung ruti, pakon sada gusi hulingkuling, na marisi anggur ampa sada hambing tunggal, anjaha itongoskon ma ai marhitei si Daud anakni ai hu bani si Saul.
21 Jadi das ma si Daud hu bani si Saul anjaha marhorja ma ia i lobeini; holong tumang do uhur ni raja ai mangidahsi, anjaha ipabangkit ma ia gabe siboan sinjata.
22 Jadi isuruh ma suruhanni hu bani si Isai mangkatahon, “Mahua lopas ham ma si Daud marhorja i lobeihu, ai holong do uhurhu mangidahsi.”
23 Jadi anggo siar ma tonduy na jahat na sinuruh ni Naibata ai bani si Saul, mintor ibuat si Daud ma husapi ai, igiut ma ai; jadi ganggang ma iahap anjaha sonang ma uhurni, anjaha laho ma tonduy na jahat ai hun bani.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA