Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Siapa are wattu ribokoanganna, Nakanamo Batara mae ri Samuel, "Siapapi sallonu lasi’na pa’mai’ passabakkang Saul? Sai ia tenamo naniakui salaku karaeng Israel? Kamma-kamma anne angngalleko minynya’ zaitun, siagang a’lampako mange ri Betlehem, mange ri se’reang tau niarenga Isai, nasaba’ kalase’renna ana’na Kupilei a’jari karaeng."

² Mingka akkuta’nammi Samuel angkana, "Antekamma musti kugaukanga? Punna nalangngere’ anne passalaka Saul, ma’nassa nabunoa’!" Appialimi Batara angkana, "Angngerangko sikayu sapi rungka, siagang paui mae ri ra’yaka angkanaya niakko battu mange anjoreng untu’ assare koro’bang mae ri Batara.

³ Undang tongi Isai mange ri anjo pa’gaukang koro’banga. Sallang laKupauangko apa musti nugaukang. Tau Kujo’jokangako, musti numinynyaki na nuangka’ a’jari karaeng."

⁴ Nagaukammi Samuel situru’ anjo Napaua Batara. Ri wattunna battu mange ri Betlehem, niruppaimi ri sikamma pamimpinga ri anjo kotaya. Nata’bangka ke’nanga siagang akkuta’nang angkana, "Maka kabara’ kasalamakkang anne naerang kabattuanna bapa’?"

⁵ Appialimi Samuel angkana, "Iyo kammatojengi. Battua’ mae untu’ assare koro’bang mae ri Batara. Jari tangkasi ngasengi kalennu sollannu akkulle amminawang ri anjo pa’gaukang koro’banga." Isai siagang ana’-ana’na nasuro ngaseng tommi massing antangkasi kalenna, siagang naundang mange ri anjo pa’gaukanga.

⁶ Ri wattunna a’rappungammo ke’nanga siagang nacini’mi Samuel ana’na Isai, niarenga Eliab, napikkiri’mi angkana, "Ma’nassa iaminne laNapilea Batara."

⁷ Mingka Nakana Batara ri Samuel, "Teako lanri ga’gana tanja’na siagang tinggina pakkaleanna nupacciniki. Teai anjo Kukaerokia. Tena Kusangkamma rupataua angnganggara’. Rupataua accini’ tanjaki, mingka iNakke atinna Kuciniki."

⁸ Nampa nakio’ Isai ana’na niarenga Aminadab, na nasuro mange andallekang ri Samuel. Mingka nakanamo Samuel, "Tena todong nanipilei ri Batara."

⁹ Nampa Syama nisuro maju ri Isai, mingka nakana Samuel, "Ia tena todong nanipilei ri Batara."

¹⁰ Kammaminjo nanasuromo Isai a’le’basa’ ana’na tuju andallekang ri Samuel, mingka nakana Samuel ri ia, "Tena ri ke’nanga nipile ri Batara."

¹¹ Nampa akkuta’nang Samuel ri ia angkana, "Ia ngasenji anne bawang ana’nu bura’nea?" Appialimi Isai angkana, "Nia’ ija sitaupi, iamintu bungkoa, mingka sitabangi a’lampa akkalawaki gimbala’." Nakanamo Samuel, "Suro kioki, nasaba’ tena kilangnganre punna tenapa nabattu."

¹² Nampa nasuromo Isai mae angkioki anjo anaka. Niassemmi angkanaya anjo anaka se’re turungka gammara’ siagang bajiki kalenna, siagang ga’gai matanna. Nampa Nakanamo Batara ri Samuel, "Iaminne taunna. Minynyakimi na nuangka’!"

¹³ Angngallemi linta’ Samuel minynya’ zaitun nampa naminynyaki Daud ri dallekanna sikamma daenna ngaseng. Anjo wattua nikoasai memammi Daud ri RohNa Batara. Appakkaramula anjo alloa siagang situlusu’na nirurungammi ri RohNa Batara. Nampa ammotere’mo Samuel mange ri Rama.

¹⁴ Anjo lapung Saul nibokoimi ri RohNa Batara, siagang nisessami ri roh ja’dala’ Nasuroa Batara.

¹⁵ Lanri kammana nakanamo sikamma atanna Saul ri ia, "Naassengi ikambe angkanaya roh ja’dala’ Nasuroa Batara assessaki’.

¹⁶ Punna kisitujui, eroki ikambe a’lampa ampa’boyangki’ tau cara’deka akkacapi. Punna nisessaki’ ri roh ja’dalaka, anjo taua akkullei napasa’ra kacapinna, nakkulle baji’ ammotere’ pakkasiatta."

¹⁷ Nampa naparentakammo Saul ri ke’nanga angkana, "A’boya mako tucara’de’ akkarena musi’, nampa nuerang mae anrinni."

¹⁸ Nalangngere’na anjo, nia’mo kalase’renna atanna angkana, "Isai pandudu’na Betlehem, nia’ sitau ana’na bura’ne cara’de’ akkarena musi’. Ia tubarani, siagang se’re tantara baji’. Nampa pole gammaraki nacara’de’ a’bicara, siagang tuli nitulungi ri Batara."

¹⁹ Jari assuromi Saul tau mange ri Isai, na napasang angkana, "Suroi ana’nu Daud, anjo akkalawakia gimbala’, mange andallekang ri nakke."

²⁰ Nampa appasadiamo Isai sikayu keledai, na napitekeki sikayu ana’ bembe, roti, siagang sipammoneang rassia anggoro’. Yangasenna anjo nasareammi Daud untu’ napassareang mae ri Saul.

²¹ Kammaminjo nabattumo Daud mange ri Saul nampa a’jari palayanna Saul. Sanna’ nisayanna ri Saul nampa niangka’mo a’jari paerang sanjatana.

²² Nampa akkiring Saul pasang mae ri Isai angkana, "Kungai Daud. Pa’biammi ammantang tulusu’ anrinni na’jari palayangku."

²³ Appakkaramula anjo wattua, punna nibattui Saul ri roh ja’dala’, naallemi kacapinna Daud nampa napasa’ra. Nampa sannammo siagang nyamammi ammotere’ pakkasia’na, lanri nibokoi ri anjo roh ja’dalaka.

1 Samuel

Video 1 Samuel 16

Ikuti Kami:

KONTAK | PARTISIPASI | DONASI