Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ta’ abit saellana jareya PANGERAN adhabu ka Samuwel, "Sampe’ bila ba’na terrosa sossa mekkere Saul? Sengko’ la ta’ ngakone Saul jareya menangka rato Isra’il. Sateya, kassa’ ba’na ngala’ mennya’ jaitun pas entar ka Betlehem, sare oreng se nyamana Isay, sabab sala settong dhari ana’na bi’ Sengko’ la epele epadaddiya rato."

² "Kadi ponapa caraepon abdidalem ajalannagiya dhabuepon junandalem ka’dhinto?" atorra Samuwel. "Manabi Saul meyarsa tanto abdidalem epate’e!" Dhabuna PANGERAN, "Ba’na ngeba sape se gi’ ngodha settong, ka ra’yat kabala ja’ ba’na entar dha’ essa’ parlo ngatorragiya kurban ka PANGERAN.

³ Isay onjang soro dhateng ka opacara kurban jareya. Dhaggi’ bi’ Sengko’ ba’na ebala’ana apa se kodu elakone ba’na. Oreng se bi’ Sengko’ eduduwagi ka ba’na, jareya lanti’ padaddi rato."

⁴ Samuwel ajalannagi apa se edhabuwagi PANGERAN jareya, pas meyos ka Betlehem. Sanapa’na ka Betlehem jareya, para pamimpinna kottha jareya takerjat, pas nyander ka seddi’anna laju atanya, "Ponapa rabuna panjennengngan ka ka’dhinto abakta salamet?"

⁵ "Iya, bendher," saodda Samuwel, "sengko’ dha’ enna’ ngatorragiya kurban ka PANGERAN. Daddi mara ba’na padha nyocce’e aba’na bang-sebang, me’ olle bisa noro’ opacara pangurbanan jareya." Isay ban na’-ana’na epakon nyocce’e aba’na keya, sarta eonjang ka opacara jareya.

⁶ E bakto kabbi la padha akompol, Samuwel ngoladi ana’na Isay se anyama Eliyab, ca’na panggaliyanna, "Tanto reya se epele PANGERAN."

⁷ Tape PANGERAN adhabu, "Ba’na ja’ kapencot ka robana se bagus ban badanna se tenggi. Banne jareya se epele Sengko’, sabab Sengko’ ngargai oreng ta’ akantha manossa. Manossa reya ngabas roba, tape Sengko’ ngabas atena."

⁸ Isay pas ngolok ana’na se anyama Abinadab, esoro ngadhep ka Samuwel. Tape Samuwel adhabu, "Se reya banne se epele PANGERAN keya."

⁹ Syama pas esoro maju bi’ Isay, tape Samuwel adhabu, "Se reya banne se epele PANGERAN keya."

¹⁰ Sampe’ ana’na se kapetto bi’ Isay padha esoro alir-gilir ngadhep ka Samuwel, tape Samuwel adhabu, "Kabbi jareya banne se epele PANGERAN."

¹¹ Samuwel pas atanya ka Isay, "Apa ana’na ba’na tadha’ pole?" Saodda Isay, "Gi’ badha, kare settong se bungso, namong gi’ ngowan dumba." Dhabuna Samuwel, "Kassa’ soro olok, kurban reya gi’ ta’ ekakana mon kana’ jareya gi’ ta’ dhateng."

¹² Daddi Isay nyoro ngolok kana’ jareya. Nyatana kana’ jareya bagus robana ban sehat badanna, matana bagus. Dhabuna PANGERAN ka Samuwel, "Jareya se epele Sengko’; mara lanti’!"

¹³ Samuwel pas duliyan mondhut mennya’ jaitun terros alanti’ Daud ngangguy opacara parmennya’an e adha’anna ka’-kaka’na. E bakto jareya keya Daud ekobasae Errohna Allah. Molae dhari jareya Daud terros etoro’e Errohna Allah. Saellana jareya Samuwel gubar ka Rama.

¹⁴ Saul la eonduri bi’ Errohna PANGERAN, sateya eseksa bi’ erroh jahat se eotos bi’ PANGERAN.

¹⁵ Para abdina mator kantha reya ka Saul, "Abdidalem sadaja oneng ja’ junandalem eseksa sareng erroh jahat se eotos sareng Pangeran.

¹⁶ Manabi junandalem kasokan, abdidalem sadaja sanggup nyareyagiya oreng se penter amaen calempong. Manabi junandalem eseksa sareng erroh jahat, oreng gapaneka bisa amaen calempong, junandalem tanto pas sae pole."

¹⁷ Daddi Saul makon reng-oreng jareya, "Kassa’ sengko’ nyareyagi oreng se penter amaen mosik, pas giba oreng jareya dha’ enna’."

¹⁸ E bakto ngedhing papakon jareya, sala settonga abdina mator, "Isay oreng Betlehem gadhuwan ana’ lalake’ se penter amaen mosik. Orengngepon bangalan, robana gantheng, parjurit se sae sareng penter acaca. Sarengngan pole oreng gapaneka esarengnge PANGERAN terros."

¹⁹ Daddi Saul ngerem otosan ka Isay sambi apessennan kantha reya, "Ana’na ba’na se anyama Daud, se daddi tokang ngowanna dumba ba’na rowa, soro ngadhep ka sengko’."

²⁰ Isay pas nyadhiya’agi hemar settong, ebuwadi budhu’na embi’ settong, roti ban kanthong se aesse anggur sampe’ possa’. Jareya kabbi ebagi ka Daud esoro atorragi ka Saul.

²¹ Daddi Daud entar ka Saul, pas daddi pangladinna. Saul ce’ leburra ka Daud, ban Daud jareya pas epadaddi tokang ngebana sanjatana.

²² Saellana jareya Saul apessennan ka Isay, "Sengko’ lebur ka Daud. Dina Daud me’ neng bi’ sengko’, olle aladine sengko’."

²³ Molae dhari jareya, mon Saul eentare erroh jahat rowa, Daud ngala’ calempongnga, pas epamonye Saul pas arassa taremtem ban nyaman pole, sabab erroh jahat jareya pas ondur.

1 Samuel

Video 1 Samuel 16

Ikuti Kami:

KONTAK | PARTISIPASI | DONASI