Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jadi Raja Salomo ma manggomgom haganup Israel.

² Anjaha on ma juakjuak bolonni: Si Asarya, anak ni si Sadok, malim;

³ si Elihorep pakon si Ahia, anak ni si Sisa, juru tulisni; si Josafat, anak ni si Ahilud, panuturuni;

⁴ si Benaya, anak ni si Joyada, pambobai ni bala; si Sadok pakon si Abyatar, malim;

⁵ si Asarya, anak ni si Natan, kopala ni gamot-gamot; si Sabud, anak ni si Natan, malim anjaha huan-huan ni raja ai;

⁶ si Ahisar, pangintuai ni rumah bolon; si Adoniram, anak ni si Abda, kopala ni panrodi.

⁷ Ambahni ai ipabangkit si Salomo do sapuluh dua halak juakjuakni na mangatur ganup halak Israel, laho pasirsirhon sipanganon hu bani raja ai pakon hu bani pangisi ni rumahni; ganup sidea marhorin pasirsirhon haporluan sabulan ibagas satahun.

⁸ On ma goran-goran ni sidea: Anak ni si Hur i Dolog Efraim;

⁹ anak ni si Deker, i Makas, i Saalbim, i Betsemes, i Elon pakon i Bethanan;

¹⁰ anak ni si Hesed i Arubod, masuk hu bani do homa Soko pakon ganup tanoh Heper;

¹¹ anak ni si Aminadab, bani ganup tanoh buntu Dor, si Tapat, boru ni si salomo do parinangonni;

¹² si Baana, anak ni si Ahilud i Taanak, Megiddo pakon ganup Betsean, ai ma dohorhon Sartan i kehen ni Jesreel, hun Betsean, das hu Abelmehola, das hu dipar ni Jokmeam;

¹³ anak ni si Geber, i Ramot na i Gilead; masuk hu bani do huta ni si Jair, anak ni si Manasse na i Gilead; masuk hu bani do homa nagori Argob, na i Basan, onom puluh huta, martembok anjaha manransang-ransang tombaga;

¹⁴ si Ahinadab, anak ni si Iddo i Mahanaim;

¹⁵ si Ahimaas, i Naftali; ibuat do si Basmat boru ni si Salomo bahen parinangonni;

¹⁶ si Baana, anak ni si Husni, i Asser pakon i Bealot;

¹⁷ si Josafat, anak ni si Parua, i Isasar;

¹⁸ si Simei anak ni si Ela, i Benjamin;

¹⁹ si Geber, anak ni si Uri i Gilead, tanoh ni si Sihon, raja ni halak Amori pakon si Og, raja ni Basan; sahalak do na mamarentah tanoh ai.

²⁰ Buei tumang do halak Juda pakon Israel, songon horsik na i topi ni laut hinabueini; mangan minum anjaha marmalas ni uhur do sidea.

²¹ (5-1) Si Salomo do na manggomgom ganup harajaon singgan ni Bah Eufrat das hu tanoh ni halak Palistim, das hu parbalogan ni tanoh Mesir; iboan sidea do sohei anjaha pambalosi do sidea bani si Salomo sadokah goluhni.

²² (5-2) Bohal na porlu bani si Salomo ibagas sadari, ai ma tolu puluh kor nitak na lumat pakon onom puluh kor nitak na somal,

²³ (5-3) sapuluh lombu na pinamombur, dua puluh lombu na hun sampalan, saratus biri-biri, legan ni ursa, bedar, balua pakon pinahan marbagei-bagei na pinamombur.

²⁴ (5-4) Ai igomgomi do ganup tanoh na hampit dipar ni Bah Eufrat, singgan ni Tipsa das hu Gasa, igomgomi do haganup raja na hampit dipar ni bah ai; mardamei do ia ampa na inggotsi ganup.

²⁵ (5-5) Jadi marhasonangan ma Juda pakon Israel marianan, ganup i toruh ni hayu anggurni bei pakon i toruh ni hayu arani, singgan ni Dan das hu Berseba, sadokah manggoluh Raja Salomo.

²⁶ (5-6) Ambah ni ai adong do ompat puluh ribu huda sitarik gareta pakon sapuluh dua ribu bala parhuda.

²⁷ (5-7) Anjaha juakjuakni sipangatur ondi pasirsirhon bohal bani Raja Salomo pakon bani haganup halak na roh mangan ampa raja Salomo, ganup sabulan bei, seng dong na hurang.

²⁸ (5-8) Sonai homa gandum pakon gagaton bani huda sitarik gareta pakon huda ajakan, iboan sidea do bani ianan na mangkaporluhon ai, ganup romban hu bani na dob pinarentahkon bani.

²⁹ (5-9) Anjaha ilayak-layakkon Naibata do hu bani si Salomo hapentaran pakon pangarusion na bagas tumang pakon buei pambotoh, usih songon horsik na i topi ni laut bueini,

³⁰ (5-10) gabe i atasi hapentaran ni si Salomo ma hapentaran ni sagala halak parhapoltakan pakon hapentaran ni halak Masir.

³¹ (5-11) Pentaran ia tene hun bani ganup jolma, pentaran hun bani si Etan halak Esrahi, pakon si Heman, si Kalkol ampa si Darda anak ni si Mahol, gabe tarmurmur ma ia bani ganup bangsa sipajuh begu-begu inggot.

³² (5-12) Adong do tolu ribu umpamani, anjaha saribu lima do buei ni dodingni.

³³ (5-13) Ibotoh do mansahapkon pasal hayu, hun bani hayu ares na i Libanon das hu bani isop na dong tubuh bani tembok; ibotoh do homa mansahapkon pasal pinahan-pinahan, manuk-manuk, gilok-gilok pakon dengke.

³⁴ (5-14) Jadi marrohan ma halak hun bani ganup bangsa sihol mambogei hapentaran ni si Salomo, hun bani ganup raja na i tanoh on, na mambogei barita ni hapentaranni ai.

1 Raja-raja

Video 1 Raja-raja 4

Ikuti Kami:

KONTAK | PARTISIPASI | DONASI