Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Koge'enali mita ngini 'o weka-wekata salingou niaki'isene 'ania rokatika la nako naga munuka koyongakuwa 'o habari ma Jo'oungu ma Dutuno, de to ngini 'ania gokoie de nia gogeruku ge'ena 'ona 'idadi yongaku; de ngaro koniongosewau 'o kianikia 'onaka,

² sababu 'ona yamake 'ania 'ahu 'itiai de 'itebini.

³ 'Ania sure 'uwa duga ka ma dudunino, kogee nia utu niakadiai, nia gudere de nia 'ali-'ali niosidumutu, bolo nimasinoa 'o pakeangi 'ihali-hali.

⁴ La 'ena 'ania sure ge'ena salingou 'ibaoro nia singinano, nia singina 'ima'ai de nioriidi; ge'enau 'o sure kaisi'ado-'adonika gee posironga 'ibaragunaka ma Jo'oungu ma Dutu wi bionoka.

⁵ Koge'enau ma sira 'o nge-ngeweka gee yosingou-ngounu de yomasingano-nganono ma Jo'oungu ma Dutuka. 'Ona yaki'isene manga rokatika de ge'enau 'ona yomasi'ofi.

⁶ 'O ngo Sara mita koge'ena, muna mo'isene 'o Abrahamuka de mosironga 'ami tuangi. Ngini ne'ena ge'ena matero ka ngo Sara mi ngowa-ngowaka, nako ngini niodiai 'okia sonaa yaowa-owa de ko 'okiawa niodomodongo.

⁷ De ngini 'o roka-rokata mita, ngini salingou nia'ahu ma sigoronaka niakisahe nia wekata, de nianako 'ato 'ona ge'ena koyokuatuwa. Niakidiai yaowa-owa 'onaka, sababu 'ona de de ngini 'asa niamake 'o co-catu ge'ena la 'o 'ahu ma dutu ma Jo'oungu ma Dutuno. Koge'ena niadiai la nia lahidoa ma Jo'oungu ma Dutu wadawongo.

⁸ Ma do-dogumuku ge'ena, salingou ngini 'Esa moi ka 'o di-dibangi moi, ka 'o singina moi, nimakadora moi de moi 'isoka 'o 'esa moi ma dutu. De salingou nimakakalesangi de nia singina 'itipokoku.

⁹ 'O dorou 'uwa niosikilioro de 'o dorou, 'o doana 'uwa niosikilioro de 'o doana; ma 'ena salingou niakidaga'asoko 'o co-catu ma Jo'oungu ma Dutuka. Sababu ge'enau so ma Jo'oungu ma Dutu wini'asoko ge'ena ma ngale niadawongo 'o co-catu 'unano.

¹⁰ Sababu 'o Buku 'Itebi-tebinoka 'isilefoku konee, "'O nyawa gee yomau manga 'ahu 'isanangi, de yomau yamao 'o 'orasi 'isa-sanangi, salingou manga 'uru yojaga la 'uwa yosibi-bicara 'o dorou de 'o ngeluku.

¹¹ Salingou yomasikurutu 'o dorouka, de yadiai yaowa-owa; salingou yomariwo yosigou-goungu la yamake 'o 'ahu 'isa-sanangi.

¹² Sababu ma Jou kaitaurika wakikalesangi 'o nyawa gee 'awi mau yamote-moteke, de ma Jou kaitaurika wosigisene manga lahidoa; duga ma Jou wakiitomo 'o nyawa gee 'o dorou yodi-diai."

¹³ Nago'ona yomau yodiai 'o dorou nginika, nako ngini nioduaka niodiai yaowa-owa?

¹⁴ Ma ngaro ngini niosangisara sababu niadiai 'okia sonaa yaowa-owa, ma ngini niosanangioka! So 'uwa niakidomodongo de niakidodato nago'onaka bato,

¹⁵ ma 'ania singina ma dodaka, salingou winihoromati ma Kristus, sababu 'una ge'ena ma Jou. De ngini salingou nimadudu-duanga ma ngale niosango 'o nyawaka gee yodasano to ngini nia singina nganono.

¹⁶ Ma ge'ena salingou niadiai de nia singina 'ima-ma'ai de nimasidi-diai. De salingou 'ania singina 'itebini, la nako nisigurubungu sababu nia 'ahu yaowa ngano ngini ma Kristus wi do-domoteke, ge'ena yosigu-gurubungu go'ona 'asa yakimaeke matero ka 'o cuka yo'okere.

¹⁷ 'Ifoloi yaowa niosangisara sababu niodiai yaowa-owa, nako la ge'ena ma Jo'oungu ma Dutu wi mau. Ma 'uwa sigado niosangisara sababu niodiai 'ito-torou.

¹⁸ Sababu ma Kristus ma sirete wosongene ka ma moi duga ma ngale watuusu to ngone nanga so-sowono 'iodumu. 'Una gee 'awi sowono koi'iwa, wosongene ma ngale wariwo 'o nyawa 'isowo-sowono. Ma Kristus koge'ena wodiai la 'idadi winisi'asa ma Jo'oungu ma Dutuka. 'Una ka wi roese yato'oma, ma wisimomikokali de 'o Ngomasa 'Itebi-tebini ma kuasa.

¹⁹ So de 'o Ngomasa 'Itebi-tebini ma kuasa, 'una wotagi wositotara 'o habari ma Jo'oungu ma Dutuno 'o nyawa yosonge-songenokau manga guruminika gee yakilomuno yoda-damaa yakihakimi,

²⁰ ge'ena la 'o nyawa gee kowisingou-ngounuwa ma Jo'oungu ma Dutuka ma 'orasi 'o Nuh wo'ahuosi. Ma 'orasi ge'ena ma Jo'oungu ma Dutu wosabari womau la tanu yomangali, sigado 'o Nuh 'o kapali wodiai waduanga. Ka gee 'o kapalioka yatuangere duga koyakido'oawa 'o ngu'uisi ma amokoka.

²¹ Aa, gee yakisilaha-laha 'o ngu'uisi ma amokoka ge'ena kaimatero de ngone 'ina'osiki ma ngale powimoteke ma Kristus so pamake 'o laha. 'O go-gosiki ne'ena ko nanga roesuwa ma mediri 'isitebini, ma 'ena pomaga'asoko ma Jo'oungu ma Dutuka la wonakula 'o singina 'itebi-tebini. 'O go-gosiki ge'ena nisilaha sababu ma Yesus Kristus womomikokau 'o songenoka,

²² de wodoakau 'o sorogaade. Ma 'orasi ne'ena 'una de ma Jo'oungu ma Dutu yopareta, de wapareta 'o mala'ekati 'iodumu, de 'o koana 'iodumu, de 'o guata 'iodumu.

1 Petrus

Video 1 Petrus 3

Ikuti Kami:

KONTAK | PARTISIPASI | DONASI