Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Reno juga keti, inggom-inggom, harus tunduk jama kajong in kik di hantara tian wat sai mak percaya jama kabar jak Allah, kelakuanmu dapok nyani tian jadi percaya. Rik mak perlu keti ngucakko api-api jama tian,

² mani tian ngeliak kelakuanmu sai murni rik saleh.

³ Dangdo kecantikanmu angkah kecantikan jak luah, injuk misalni ngehias buok atau makai perhiasan, atau makai kawai sai mahal-mahal.

⁴ Sebalikni, hagani kecantikanmu timbul jak delom hati, budi pekerti sai lemoh lembut rik tenang; senodo kecantikan abadi sai berega nihan nutuk pandangan-Ni Allah.

⁵ Jama cara injido pada zaman tumbai bebai-bebai beragama sai beharap jama Allah mempercantik diri tunduk jama kajong tian.

⁶ Sara pun reno juga, ia taat jama Abraham rik nyebut ia majikanni. Puari tano iado anak-anak Sara, kik keti ngelakuko hal-hal sai betik rik mak merabai jama api pun.

⁷ Rik keti juga, kajong-kajong, hagani hurik penuh pengertian tehadap inggommu rik jama kesadaran bahwa tian anodo kaum sai lemoh. Perlakukodo hormat jama tian, mani tian jejama jama keti, haga nerima anugerah hurik sai sejati jak Allah. Lakukodo inji, in mak ngedok sai ngehalangi duamu.

⁸ Kesimpulan iado: hagani Puari-puari seia sekata rik seperasaan. Hagani keti saling sayang-menyayangi injuk jelma-jelma sai muari. Rik hagani keti saling ngerasa kesian rik besikap rendah hati.

⁹ Dang ngebalos kejahatan jama kejahatan, atau caci maki jama caci maki; sebalikni balosdo jama ngilu nihan berkat jak Allah. Mani Allah ngurau keti justru in keti nerima berkat jak Ia.

¹⁰ Di delom Alkitab tetulis injuk reji, "Jelma sai haga ngerasako hurik rik haga ngalami rani-rani sai helau, harus ngejaga bangukni in mak ngicikko hal-hal sai jahat rik mak ngucakko hal-hal sai buhung.

¹¹ Ia harus ngejaohi sai jahat rik ngelakuko sai betik; hagani ia bejuang temon-temon untuk ngedapokko perdamaian.

¹² Mani Tuhan selalu ngeperhatiko jelma-jelma sai nutuk kehaga-Ni, rik Tuhan selalu ngedengi dua-dua tian; kidang Tuhan ngelawan jelma-jelma sai ngelakuko kejahatan."

¹³ Sapa sai haga ngelakuko sai jahat jama niku, kik keti senang bebuat betik?

¹⁴ Kidang sekalipun keti harus menderita mani ngelakuko hal-hal sai betik, keti beruntung! Dang rabai jama sapa pun rik dang khuater.

¹⁵ Kidang di delom hatimu, hagani keti ngeniko jama Almasih penghormatan sai khusus sai nutuk kedudukan-Ni sebagai Tuhan. Rik hagani keti selalu siap untuk ngeni jawaban jama unggal jelma sai betanya tentang harapan sai keti kedau.

¹⁶ Kidang lakukodo ano jama lemoh lembut rik hormat. Rik hagani hatimu murni, in kik keti difitnah mani keti hurik betik sebagai jelma sai nutuk Almasih, maka jelma sai ngefitnah udi haga jadi meliom tenggalan.

¹⁷ Lebih helau menderita mani ngelakuko sai betik -- kik ano kehaga-Ni Allah -- jak menderita mani ngelakuko sai jahat.

¹⁸ Mani Almasih tenggalan mati mani angkah sekali gaoh, untuk selama-lamani mani dusa manusia -- sai jelma mak besalah, mati untuk jelma sai besalah. Almasih ngelakuko ano in Ia dapok ngebimbing keti jama Allah. Ia dibunuh secara jasmani, kidang dihurikko luot secara rohani.

¹⁹ Delom keadaan ruh Ia mik ngabarko kabar jak Allah jama ruh-ruh sai dikurukko di bui:

²⁰ yakdo ruh jelma-jelma sai mak taat jama Allah pada zaman Nuh. Waktu ano Allah sabar nunggu selama Nuh nyani kapalni. Angkah jelma-jelma sai wat di kapal gaoh -- sunyinni walu jelma -- sai diselamatko liwat banjer balak udi.

²¹ Nah, kejadian udi ngerupako kiasan jak baptisan sai tano inji nyelamatko keti. Baptisan udi lain hak suatu upacara ngecahko badan jak sunyin sai kamak-kamak, melainko ngerupako janjimu jama Allah jak hati sai betik. Baptisan udi nyelamatko keti mani Isa Almasih radu hurik luot jak kematian,

²² rik radu cakak mik surga. Tano Ia bekuasa jejama jama Allah rik memerintah sunyin malaikat, sunyin jelma sai bekuasa rik sunyin kekuatan.

1 Petrus

Video 1 Petrus 3

Ikuti Kami:

KONTAK | PARTISIPASI | DONASI