Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kudeng ineh teh muyuh decur luk inan awan, do' mebeneh ratnan deléi muyuh sebuleng mo', idi kudeng inan luk sikal metueh ratnan bala ineh, miak ideh uen ngelaya' ngaceku ratnan ulun decurdeh dengan na ria'-ria'.
2 Ngaceku ideh miak nier ulun muyuh luk meligan idi mepiteb.
3 Idi aleg muyuh ngayung luun burur muyuh, dengan abpuk luk inayung, idi makai amas idi ayung luk meraga.
4 Iamo' do' ayung muyuh mangun ku ayung luk bang niat, ieh ineh ayung luk na miak merapuk, ieh ineh niat luk mulai idi mebeneh, luk meraga pa kiung Allah.
5 Ngaceku kudeng ineh teh bang kareb luk atun decur-decur luk manu idi merapet inan Allah nengayung bururdeh teh, idi mebeneh ratnan deléideh sebuleng,
6 mepad kudeng Sara pana' kudeng ineh teh. Ieh nemaya' ukum Ibrahim dengan neten neneh tuan. Idi muyuh ini pangeh nangun ku anak-anakneh kudeng muyuh nganau' luk do' dengan na megagap ratnan anun-anun luk miak ngatot nemuyuh.
7 Kudeng ineh teh, muyuh deléi luk inan awan, do' muyuh kali' nedeh meluun laya'. Do' muyuh ngedita' nedeh, ngaceku ideh pana' ngalap baré Allah, ieh ineh ulun luk pad-pad dengan muyuh. Nganau' kudeng ini pad sembayang muyuh na uen ngesabeng.
8 Kekipedneh, do' amung-amung muyuh sebuleng niat, idi méi' seburur dengan luk baken, idi mawa kuan amung-amung kinanak, dengan mulai niat idi mebeneh niat.
9 Aleg muyuh ngua' dat dengan luk dat idi ngua' ngedat dengan ngedat, iamo' mutuh peruan, ngaceku ratnan luk kudeng ineh muyuh pangeh tinawar, pad muyuh galap peruan ku babpat muyuh.
10 Ngaceku pangeh inayud, "Lemulun luk pian ngalap ulun, idi ngalap kareb luk do', do' ieh ngimet dila'neh ratnan pebala luk dat, idi do' ieh ugka' mebalih.
11 Do' ieh umai ratnan luk dat idi nganau' luk do', do' ieh nakap pedo', idi nakap neneh do'-do'.
12 Ngaceku Tuhan megéi' nier lemulun luk matu, idi Ieh megéi' ninger sembayangdeh; iamo' Ieh teketed ratnan lemulun luk nganau' luk dat."
13 Idéké miak ngedereh nemuyuh, kudeng muyuh mekél nganau' luk do'?
14 Iamo' kudeng muyuh ngalap dereh ngaceku ratnan luk matu, samal kuan muyuh. Aleg matot ku lemulun, idi aleg muyuh merapang.
15 Iamo' do' ngerayeh Keristus mangun ku Tuhan bang niat muyuh, idi do' muyuh megéi' temina' maré or kuan anid-anid lemulun luk ngitun nemuyuh ratnan rapet luk pangeh ilap muyuh,
16 iamo' dengan mebeneh niat idi maré ubur idi dengan teruayen niat luk do', pad kareb muyuh uen lemulun ngedat ngaceku ulun muyuh luk do' bang Keristus, lemulun ineh miak uen ngigu'.
17 Ngaceku meluun do' muyuh ngalap dereh ngaceku nganau' luk do', kudeng ini luk petulu dengan pian Allah, ratnan muyuh ngalap dereh ngaceku nganau' luk dat.
18 Ngaceku Keristus pana' pangeh nengalap dereh maté ngaceku sala' lemulun, ieh ineh Lemulun luk Matu ngaceku lemulun luk na matu, pad Ieh nguit netau amé' matun Allah; sagan pana' bururNeh pinaté, iamo' mulun bang roh;
19 idi bang roh ineh Ieh iné' mada' amung-amung roh luk bang tutup,
20 ieh ineh roh luk atun ngelaba ukum kareb Allah nganét dengan mekadang niat bang kareb Noh, laba' Noh nganau' alud rayeh ineh temina'. Idi bang alud ineh inan sesuut lemulun, ieh ineh ualuh burur lemulun pangeh inulun ratnan abpa' ineh.
21 Idi abpa' ineh pinginud rereb luk nekini ngulun nemuyuh, idi ilungneh baken nala' luk melutak ratnan burur, iamo' mutuh teruayen niat luk do' pa kiung Allah, ngaceku ratnan tui Yésus Keristus,
22 luk pangeh numak iné' surga, idi tudo pa tinueh Allah, idi amung-amung melaikat idi lalud idi luk ngimet pana' inau' mebeneh rat Neneh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA