Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ivesia muni komiu totua-totua mombine kana mekou nte bereimiu langgai. Apa ane bereimiu ledo nomparasaya tesa nu Alatala, pekoumiu haitu mamala mompakeni ia momparasaya. Ledo paraluu raulimiu nuapa-nuapa ka ia,

² sabana ane rakitana komiu nekou nte Alatala bo nokainggu nagasa, ia muni madota momparasaya.

³ Nee sampe kagayamiu aga ri savalikuna, evamo nompegaya buluamiu bara nompake ramba-ramba bulava bara pakea nasuli-suli.

⁴ Tapi kagayamiu kana mopuna lako riara ntaimiu, haitumo lako ri inggumiu nalusu bo natinonto. Haitumo kagayana anu ledo ntoto malipo bo noali mpuu ri panggita nu Alatala.

⁵ Mombine-mombine nagasa anu nanjarumaka Alatala tempo nggaulu, nekou nte bereira langgai. Ivesiamo nipakagayara karora.

⁶ Jonjona, i Sara nanturusi anu niuli i Abraham ka ia bo nanggasangai i Abraham "i tua". Bo komiu masimbayu nte i Sara ane komiu batena mokainggu mabelo bo ledo maeka ka nuapa-nuapa.

⁷ Ivesia muni komiu totua-totua langgai. Komiu kana matuvu mosanggani-nggani ante bereimiu ante pokainggu nanoto. Toramo, mombine ledo nasimbayu karosona ante langgai. Bilamo ira sabana ira muni nidekei nu Alatala ka katuvua nabelo sampe ri kasae-saena nasimbayu mpo komiu langgai. Bilamo ira ala ledo maria nuapa-nuapa mombalava posambayamiu.

⁸ Jadi sampesuvu-sampesuvu, kupapolamo tesaku. Komiu pura-pura kana mosangu pekiri bo mosangu rara. Posimpotovemo mpo tona nosampesuvu. Komiu kana mosipoasi mata bo nee malanga rara.

⁹ Ane maria tona movia anu nadaa nte komiu, nee rabalasi ira ante anu nadaa. Ane tona nombasalai komiu nee rapesava. Agina komiu merapi Alatala mombadekei belo ka ira. Apa komiu nipokio nu Alatala manggeni belo ka tona ntanina, ala komiu manggava belo lako nte Ia.

¹⁰ Riara Buku Gasa nitulisi ivei: "Isema-sema madota matuvu madamba bo mombarasai katuvua mabelo, ia kana mombajagai dilana ala nee motesa anu nadaa bo nee modava.

¹¹ Ia kana mombakabasaka pokaingguna nadaa bo movia anu nabelo. Ia kana mangelo posinggabelo bo mompasimbuku matuvu mosinggabelo ante tona ntanina.

¹² Apa Tupu batena nompariara tona nanoa anu nangoseaka dotaNa, bo nasaro niepeNa posambayara. Tapi nievaNa tona nokainggu nadaa."

¹³ Ane komiu masaro mokainggu nabelo, isema movia anu nadaa ka komiu?

¹⁴ Tapi nau komiu mombarasai kasusa sabana pokainggumiu nabelo, mauntu mpuumo komiu! Nee maeka ka tona, bo nee makini raramiu.

¹⁵ Tapi bilamo i Kristus riara ntaimiu bo pakaoge Ia sabana Ia Tupumiu nagasa. Bo ane rapekutana ntona komiu, nuapa sabana komiu nanjarumaka i Pue, komiu kana masadia mesana ka ira. Bo pesanamiu haitu kana rapovia ante ede rara bo ante tesa-tesa nalusu.

¹⁶ Bo komiu kana matuvu ante rara ntai nagasa, mbelaka maria tona manjalai pokainggu nabelo nipoviamiu sabana pangoseakamiu i Kristus, ira kana maeya mboto.

¹⁷ Aginapa kita mombarasai kasusa sabana pokaingguta nabelo, ane ivesia mami dota nu Alatala, pade mombarasai kasusa sabana pokaingguta nadaa.

¹⁸ Apa i Kristus muni nombarasai kasusa nau ledo novia anu nadaa. Ia sanggani namate nombasompo dosa manusia nagana sampe ri kasae-saena. Ia ledo nasala, tapi Ia namate nanjambei kita anu nasala ala mompoposinggabelo kita ante Alatala. Ia nipatesi tapi nipakatuvu mpanjili ante kuasa Nosa Gasa nu Alatala.

¹⁹ Pade Ia nikeniaka nu Nosa Gasa hau nompatolele Tesa lako nte Alatala ka nyawa-nyawa ntomate anu nitarunggu ri *ponturo ntomate,

²⁰ haitumo nyawa ntona anu ledo natundu nte Alatala tempo Nabi Nuh nggaulu. Tempo Nabi Nuh da novia kapala, naoge mpuu posabara nu Alatala mompopea ira majea lako ri dosa-dosara. Tapi tempo uve nanggabuntu nompakalodo isi dunia, aga uvalu tona nesavi kapala haitu. Bo kapala haitu nombaliunaka uve oge sampe aga ira uvalu nipakasalama.

²¹ Uve oge haitu nirapaka ada pediu anu nompakasalama kita sii-sii. Ada pediu haitu ledo ada pompegasa tapa lako ri karota, tapi tandana kita topangoseaka i Yesus. Ada haitu nireke pojanjita nte Alatala ala kita mangoseaka Ia sabana niampungiNa dosata. Bo niampungiNa mpuu dosata sabana i Yesus natuvu mpanjili lako ri kamateNa.

²² Bo i Yesus neore hau ri suruga bo sii-sii nonturo ri ponturo nibila ri panggana nu Alatala bo nomparenta nosanggani-nggani nte Ia. Bo pura-pura *malaeka bo topoparenta bo tonakuasa ri laerava natundu nte Ia.

1 Petrus

Video 1 Petrus 3

Ikuti Kami:

KONTAK | PARTISIPASI | DONASI