Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ee, kamu' to baine kebalimo! Susi todami, la mengkaturu' lako kamu' balimmi. Na ia ke denni balimmi to te'dapa nakatappa'i kadan-Na Puang Allataala, ia to sipa' melomi la nakita, namenjaji matappa'. Te'damo miparallu mpauanni apa,

² nasaba' iamo nakita to sipa' melomi, maruruh sola macanning atimmi nturu'i.

³ Danggi' na ia bang mialan wattu to mpemaloloi kalemi, susinna mpemellongngi beluakkami, mpake pakean bulawan iarika pakean masuli'.

⁴ Apa sibalikanna, la miangahri to kamaloloan to napapajan sipa' melomi, susinna te'da mikassara' apa massikalino kamu'. Ia to kamaloloan susi joo nakabudai Puang Allataala.

⁵ Susimi joo napugauk mpemaloloi kalena to baine matappa' tonna anu', to rrannuan Puang Allataala, na mengkaturu' lako balinna.

⁶ Moi Sara susi todai joo, nturu' bang parentana Nabi Ibrahim napekapuangngii. Na moi kamu' tee too, susi toomo kamu' Sara, ke mipugaukki to kameloan, na te'da apa mikalaja'.

⁷ Ee, kamu' to muane kebainemo! Susi todami, la sikalino kamu' balimmi. La mitulungngi, sanga miissen kumua ia to kamawatanganna te'da napada kamawatanganna muane. La mitaratte'i, sanga miissen kumua pada la ntarima kamu' barakka' to naben kamu' Puang Allataala, iamo to katuoan melo te'da cappa'na. La mipugauk susi tee, na te'da apa hhalangngii to passambajangmi lako Puang Allataala.

⁸ Ee, tomala'bihku'! Katampakanna, la mesa' kada sola mesa' penawa kamu'. La sipakamoja' kamu' padammi tomatappa', la sikamasean too kamu', nadanggi' mimatampo.

⁹ Ia ke denni tau mpugauk kagajatan lako kamu', danggi' mipabalahhii. Na ia ke denni tau ngkada-kadai kamu', danggi' too mipabalahhii. La'bi melo ke mipassambajanganni lako Puang Allataala nabarakka'ii joo tompugauk kagajatan. Napilei kamu' Puang Allataala menjaji umma'-Na ammipeta'danni barakka' to padammi rupa tau. Ia ke mipugaukmi susi joo, la nabarakka'i toda kamu' Puang Allataala.

¹⁰ Den diuki' lan Sura' Allataala kumua, "Ia to tongkabudai katuoan melo te'da cappa'na la najagai to timunna, nadanggi' napaui to apa gaja'. Na ia to madoang masannang, danggi' namangnguraga.

¹¹ La natorroi mpugauk kagajatan, napugaukki to kameloan. La napengkulle-kullei sikalino padanna rupa tau,

¹² nasaba' tuli nakita Puang to tonturu' pakkaeloran-Na, na tuli ntarimai to passambajangna. Apa naewai Puang to tompugauk kagajatan."

¹³ Te'da tau la mpugauk kagajatan lako kamu' ke masannang bang kamu' mpugauk kameloan.

¹⁴ Moi ammiperasai kamaparrisan sanga nturu' kamu' pakkaeloran-Na Puang Allataala, apa sitonganna masannang kamu'! Danggi' mikalaja'i to tompakario-rio kamu', danggi' too mipuselangngi.

¹⁵ Apa la miingaran, kumua Almaseh mandara to Puang mikasiri' misompai, mituli sadia too mpebalii to tau ke nakutanai kamu' kumua, "Inda tonganra mirannuan?"

¹⁶ Apa mebali melo bang kamu', danggi' mimatampo. La tuli manggauk melo kamu', anna ia to tompau gaja' kamu' la masiri', nasaba' melo bang to sipa'mi situru' pakkaeloran-Na Almaseh.

¹⁷ La'biran ke maparri' kamu' sanga mpugauk kamu' kameloan ke iamo napueloh Puang, na ia ke maparri' kamu' sanga mpugauk kagajatan.

¹⁸ Nasaba' pissenra mate to Almaseh la ndampangan tolino. Ia to Almaseh, to te'da namadosa, namate ssulle tomadosa, dikua misikalino pole' Puang Allataala. Batang kale-Na nabuno tau, apa napatuo pole'i Roh Allataala.

¹⁹ Na ia to roh-Na male mpangpeissenan kapataloan-Na lako bombo to ditarungku ntajan wattu la dinii rra'tah kara-karana.

²⁰ Ditarungkui sanga cia'i matappa' lako Puang Allataala tonna tuo unapa Nabi Nuh tonna anu'. Sabbara'i Puang Allataala ntajanni to kamengkatobaranna, samangkanna Nabi Nuh nggaraga kappala'. Ia mandara napasalama' Puang Allataala to tau karua lan joo kappala' tonna wai saba' tonggo.

²¹ Na ia joo kajajian dipasangrapangngi pangjioran to mipusalama' tee too. Ia joo pangjioran tangngia mesa' cara mbasei batang kale danggi' nacarepa, apa ia to pangjioran mesa' peta'da lako Puang Allataala na la'paran kamu' jio mai kasalan. Napasalama' kamu', sanga mangkami tuo pole' Puang Isa Almaseh jio mai kamatean.

²² Na endekmi de' suruga, nacumadokko jio sa'de kanan-Na Puang Allataala namangparenta sola, mparenta sininna malaeka', sininna tomakuasa na tomangparenta to wa'ding ngkuasai tolino.

1 Petrus

Video 1 Petrus 3

Ikuti Kami:

KONTAK | PARTISIPASI | DONASI