Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Utat mita, tana'a makow aku'oi bui moponorop ko'i monimu in Habar Mopia inta nongkon i Allah inta aim pinota'auku kolipod bo sinarimadon monimu, sahingga in nopirisayadon totok ko'i Kristus im mo'ikow.
2 Aka mo'ikow bo tantuí kumadai kon onu inta aim pinota'auku ko'i monimu, yo Habar Mopia tatua im mokosaḷamatbií ko'i monimu; kolikudbií i mo'ikow mopirisaya ta'e diaí momangale kon onu inta pinirisaya monimu tua.
3 Onu inta aim pinota'auku kon i utatku mita, yo tuabií doman in sinarimaku. Inta paling moponting, naí inta pinais kom bonu im Buk Mosuci, aku'oi ain nopota'au ko'i monimu kong ki Kristus aim minatoi lantaran dosa mita naton:
4 Sia ain iḷobong, ta'e onda intua biniag bui kon singgai intoḷunya. Natua doman im pinais kom bonu im Buk Mosuci.
5 Bo pinogumanku domandon ko'i monimu kong ki Kristus inta biniag bui tatua nokipogontong ko'i Petrus, onda intua nokipogontong doman kon rasul mopuḷuh bodoyowaí.
6 No'iduduimai kon tua, Sia minayak doman nokipogontong kon intau mita inta nopirisaya ko'i-Nia, degaí limamai nogatut ing kobayong monia. Bo nobayongpabií ing kon sigad monia tua in nobiagpa nodapot im masai na'a. Tongaí oyuíon domandon in minatoi kon sigad monia tua.
7 Sia nokipogontong doman ko'i Yakobus bo kom bayongan rasul-Nya.
8 Pangabisan totok Sia nokipogontong doman ko'inakoí, naonda bo adií inta no'ilahir de'emanpa wakutunya.
9 Sin aku'oibií na'a in rasul inta paling mohina kon sigad im bayongan rasul, sin aku'oi in nomogutuí kom bayongan jama'at i Allah.
10 Tongaí sinotabipabií i Allah, daí oyuíonpa komangoi in tana'a. Bo totabi i Allah ko'inakoí diaíbií inta diaí im mangalenya. Sin aku'oibií im paling morajing kon sigad in rasul mita ibanea. Ta'e sabanarnya in de'emanbií tongaí uḷatku tontanií; ta'e nongkon i Allahbií inta ain nonotabi ko'inakoí bo siabií doman inta ain nogaid noyotakinku.
11 Daí tuamai nongkon i inekabií im pinotarima'an monimu kon Habar Mopia tatua, nongkon inakoí ande nongkon rasul mita ibanea, diaíbií mobalií soaáḷ. Yang ponting pinota'audon nami in Habar Mopia tatua ko'i monimu bo nopirisayadon im mo'ikow.
12 Aka kami ain nopota'au ko'i monimu kong ki Kristus aim biniag nongkon sigad intau minatoi, yo nongonu sin oyuíonpabií doman ing kon sigad monimu im moguman kon diaíbií ing kobiagan bui kon sigad in intau minatoi.
13 Aka totu'u kon diaíbií ing kobiagan intau inta aim minatoi, yo ki Kristus in diaíbií biniag bui.
14 Bo aka kuma ki Kristus diaíbií biniag bui nongkon kinopatoian-Nya, daí diaíbií im baraguna onu inta aim pinota'au nami bo diaíbií doman baraguna im pirisaya monimu.
15 Bo aka natua, yo mangalenya kon tua uboḷbií inta aim pinoguman nami ko'i monimu soaáḷ ki Allah, sin Siabií ing kai nami nomiag ko'i Kristus, padahaḷ bo Sia in diaíbií nomiag bui ko'i Kristus.
16 Sin aka totu'u kon intau minatoi diaí biagon bui, daí ki Kristus in diaíbií biniag bui.
17 Bo aka ki Kristus diaí biniag bui, daí pirisaya monimu in tongaíbií naonda bo togo'indop bo mo'ikow in umuranpabií nobiag kom bonu ing ka'ada'an binaradosa bo beresi diaí koharapan.
18 Tua im mangalenya kon intau mita ing Keresten inta aim minatoi diaí doman koharapan.
19 Aka harapan naton ko'i Kristus tongaí komangoi in nobiagpa kon dunia na'a, daí kitabií na'a in intau mita inta paling mosoe kon sigad im bayongan intau inta kon dunia na'a!
20 Ta'e totu'-totu'ubií kong ki Kristus aindon biniag bui nongkon sigad in intau mita minatoi. Bo Siata inta nopobalií dodoyonan pirisaya naton kon intau mita inta aim minatoi im biagonbií bui.
21 Sin naonda im popatoi inta sinumu'ot kon dunia na'a lantaran dinia in intau tobatuí, natua doman ing kobiagan bui in intau mita inta aim minatoi oyuíon sin dinia in tobatuí intau.
22 Sin naí doman bayongan intau minatoi sin notobatuídon takin i Adam, daí natua doman bayongan intau biagon bui sin ain notobatuí takin i Kristus.
23 Ta'e pomuḷoi intau biagon poduduibií ing gilirannya: muna-munamai totok ing ki Kristus, bo naonda in Sia mamangoi bui bain tua bo moíidudumaidon intau mita inta ain nobalií kapunya'an i Kristus.
24 Onda intua mokiamatdon. Kowakutu intua potungkudon i Kristus im bayongan inta nomarentah, bayongan kakuasa'an, bo bayongan kakuatan; bodongka Sia moposarahkan kakuasa'an-Nya saḷaku Raja, ko'i Allah, ki Amaí naton.
25 Ki Kristus im mustibií umuran momarentah modapot bayongan saturu i Kristus potungkudon i Allah kon tayowon i Kristus.
26 Saturu pangabisan inta potungkudon i Allah im popatoi.
27 Sing kom bonu im Buk Mosuci, "Bayongan yagi-yagi inaidandon i Allah no'itungkud kon tayowon-Nya." Daí notarangbií kon imakusud in singog "bayongan yagi-yagi" tua in diaíbií no'itakin ing ki Allah, sin Siabií in nopomia kom bayongan yagi-yagi tua tumungkud kon tayowon i Kristus.
28 Ta'e naonda im bayongan yagi-yagi pinotungkudon kon limonag ing kakuasa'an i Kristus, daí Sia tontanií inta ki Adií i Allah in tumungkudbií ko'i Allah inta ain nopotungkud kom bayongan yagi-yagi ko'i-Nia. Bo ki Allahdon tontanií im momarentah kon tua komintan.
29 Aka intau minatoi bo diaí biagon bui, yo nongonu sin oyuíonbií intau binaptis untuk intau minatoi? Aka totu'u kon intau minatoi beresibií diaí biagon bui, onubií im makusud pinomia'an monia kon soaáḷ tatua?
30 Bo onu doman im mangale kami moibog tumayow kon inta mokobodito pomuḷoi makow?
31 Utat mita! Pomuḷoi in singgai aku'oi monahang kon roriga lantaran mopia ing ginaku kong kobobiag monimu sim mo'ikow ain nopirisaya ko'i Kristus Yesus, Tuhan naton. Totu'ubií onu im pinogumanku tana'a.
32 Aka tongaí pongin raian intau, onubií ing ka'untungan ko'inakoí im moberjuang totok naonda bo monayow kom mahaḷuk mita inta mongoromuí kon kotaí in Epesus tana'a. Aka totu'u kon intau minatoi diaí biagon bui, yo manikah dumudui ing kita kon naí kain singog in intau nana'a: "Koligai monga'an bo monginum poḷat mobarasanang ing kita sin ikoḷom in tatap matoibií doman."
33 Dona'aibií koaíkaḷan! Porgaulan inta diaí mopia mokogoguya'at kon tabiat inta mopia.
34 Mokoposadardon in tana'a, bo dona'aidon mogaid kon inta diaí mopia. Sabanarnya im baí mustibií mo'oyak im mo'ikow sing kon sigad monimu oyuíonpa in diaí nonota'au ko'i Allah.
35 Degaí oyuíon im moliboí nana'a, "Naíonda degaí aka intau matoi biagondon bui? Awak degaí naíonda in ogoi ko'i monia?"
36 Hoi intau bodok! Aka ikow bo mopomuḷa im batoḷ kom bonu im butaí, yo batoḷ tatua in diaíbií mobiag aka diaí matoi muna.
37 Bo batoḷ inta pinomuḷamu tua kom bonu im butaí -- batoḷ ing gandum ande batoḷ ibanea -- in tongabií batoḷ im bibit tatua, de'emanbií komintan inta pinomuḷa im mobiag kon singgai mo'iduduimai.
38 Ki Allahbií tontanií mobogoi im pangkoi kom batoḷ tatua podudui onu ing ko'ibog-Nya. Pomuḷoi im batoḷ, ki Allahbií doman im mobogoi podudui batangannya tonta-tontanií.
39 Awak im bayongan mahaḷuk inta nobiag diaíbií komintan notongkai. Awak intau diaíbií notongkai awak im mahaḷuk, bo noyoposibií doman awak in ḷagapan bo awak in toyak.
40 Oyuíon awak in soroga, bo oyuíon doman awak in dunia, ta'e kogagah in awak doyowa tua in noyoposibií.
41 Naí doman tua, kogagah mata in singgai noposibií doman kogagah im buḷan. Tundi mita noyoposibií doman ing kokagagahnya mita. Kogagah in tundi tobatuí noyoposibií doman kogagah in tundi ibanea makow.
42 Natuata doman ka'ada'an intau minatoi inta biagondon bui. Awak inta iḷobong tua in awakbií inta moyoya-yoyang, ta'e awak inta biagon bui in awakbií inta diaí moyoya-yoyang.
43 Awak inta iḷobong tua in awakbií inta diaí mopia bo moyangkoí; ta'e naonda im biagondon bui, sia ogoiandon in awak inta mogagah bo moropot.
44 Awak inta iḷobong tua in awakbií inta nongkon dunia, ta'e naonda im biagondon bui, tua in awak bidon inta inogoi in Roho i Allah. Aka oyuíon in awak inta nongkon dunia, daí oyuíonbií doman in awak nongkon i Allah.
45 Kom bonu im Buk Mosuci oyuíon pinais nana'a, "Intau inta muna-munamai ki Adam, sia nobalií mahaḷuk inta nobiag," ta'e ki Adam inta tumi in Rohobií inta nobogoi ing kobiagan.
46 Inta muna mamangoi in ilo-ilowpabií, de'emanbií inta diaí mato-matoi. Bain no'iduduimai kon tua bo namangoi inta diaí mato-matoi.
47 Ki Adam inta muna pinomia nongkon ḷobud im butaí, ta'e ki Adam inta induanya in nongkon sorogabií.
48 Intau mita kon dunia na'a naonda bo ki Adam inta muna, inta pinomia nongkon ḷobud im butaí, ta'e intau mita in soroga naonda bo Sia inta namangoi nongkon soroga.
49 Noonda bo kita masai na'a in naondabií bo ki Adam inta pinomia nongkon ḷobud im butaí, daí bain no'iduduimai bo kita im mobalií naí Sia inta namangoi nongkon soroga tua.
50 Nana'a im makusudku utat mita: awak inta pinomia nongkon duguí bo tapuí diaíbií mota'au tumu'ot kon Dunia Mobagu i Allah; bo awak inta mato-matoipa na'a in diaíbií mobalií mononoi.
51 Tarukira in rahasia tana'a: Kita in diaíbií matoi komintan, ta'e kita in daitonbií baḷuian.
52 Soaáḷ mita tatua in dali-daliíbií mobalií, tongaíbií tokokiap monag kowakutu in terompet irupondon kom pangabisan totok. Sing kowakutu in kodongogandon singog in terompet tatua, yo intau mita minatoi in tokobiagondon bui bo popopakeíandon in awak inta mononoi, bo kita komintan in toko baḷuian.
53 Awak naton inta mato-matoi na'a baḷuiandon in awak inta diaí mato-matoi, bo awak inta nongkon dunia musti baḷuian in awak inta nongkon soroga.
54 Aka awak inta mato-matoi na'a binaḷuiandon in awak inta diaí mato-matoi, bo awak inta nongkon dunia na'a baḷuiandon in awak inta nongkon soroga, daí kowakutu in tatuatadon bo mobalií onu inta pinais kom bonu im Buk Mosuci nana'a, "Popatoi ain sinaḷow, ka'untungan no'uliídon!"
55 "Hoi popatoi, kon onda ing kino'untunganmu? Hoi popatoi, kon onda im bisamu?"
56 Bisa im popatoi tuata in dosa, bo dosa nopobayak im poranannya mongin hukum agama.
57 Ta'e sukur makow ko'i Allah: Sia nobogoi ko'i naton ing ka'untungan pinongin i Yesus Kristus ki Tuhan naton!
58 Tuamai ule utatku mita inta kinotabiku, mokoporopot bo kotorindog. Umuran totu-totu'u pobantung ko'i Tuhan, sing kinota'aunbií monimu kom bayongan inta inaidan monimu ko'i Tuhan, komintanbií baraguna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA