Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tole pe, o senina-senina, arus kuakap kupersingeti man bandu kerna Berita Si Mehuli si nggo kuberitaken nai man bandu. Nggo nai ialokenndu, janah kinitekenndu si genduari enda pe erpalasken si e nge.

² Arah Berita Si Mehuli eme kam iselamatken adi tetap icikepndu isi Berita Si Mehuli si nggo kuberitaken man bandu e, pala asum kam tek nai la kin mbages iukurindu.

³ Si pentingna kal nggo kupeseh man bandu, eme kai si nggo kualoken: maka Kristus nggo mate erkite-kiteken dosanta, bagi si tersurat i bas Pustaka Si Badia.

⁴ Maka Ia nggo ikuburken, jenari i bas wari si peteluken ipekeke Dibata Ia i bas si mate nari, sue ras kesaksin Pustaka Si Badia.

⁵ Maka Ia nggo encidahken DiriNa man Petrus, jenari man rasul si sepulu dua kalak.

⁶ Kenca si e IcidahkenNa DiriNa man ajar-AjarNa, teremna lebih lima ratus kalak si sangana radu pulung kerinana. Ajar-ajar e teremen denga nggeluh seh asa genduari, janah piga-piga kalak denga ngenca si nggo mate.

⁷ Jenari IcidahkenNa DiriNa man Jakup, bage pe man kerina rasul-rasul.

⁸ Si perpudina kal, IcidahkenNa DiriNa man bangku pe -- aku si desken sekalak anak si pertubuhna la bagi kalak.

⁹ Aku me rasul si meterukna -- si tuhuna la metunggung pe aku igelari rasul -- sabap nggo kusiksa perpulungen Dibata.

¹⁰ Tapi erdandanken lias ate Dibata aku lit bagi si genduari enda. Janah lias ate si IberekenNa man bangku e labo sia-sia. Jingkaten aku erdahin asa kerina rasul-rasul si deban, aminna pe si e labo gegehku jine, tapi lias ate Dibata nge si erdahin ras aku.

¹¹ Jadi si penting labo ise kalakna si erberita e -- aku tah rasul si deban -- gendekna, enda ndai me si iberitaken kami kerina, janah e ka me si nggo itekindu.

¹² Dage adi iberitaken kami maka Kristus nggo ipekeke Dibata i bas si mate nari, uga banci maka piga-piga i bas kam ngatakenca maka labo lit kekeken i bas si mate nari?

¹³ Adi tuhu kin la lit kekeken, Kristus pe labo ipekeke i bas si mate nari.

¹⁴ Janah adi Kristus la ipekeke Dibata i bas si mate nari, sia-sia me berita si isehken kami, janah sia-sia pe kinitekenndu.

¹⁵ Lebih asa si e, kami nggo ketunduken maka bual kap kesaksin kami kerna Dibata, sabap nggo isaksiken kami maka nggo IpekekeNa Kristus i bas si mate nari -- tapi la kepe IpekekeNa -- adi tuhu kin la lit kekeken i bas si mate nari.

¹⁶ Sabap adi tuhu kin la lit kekeken i bas si mate nari, Kristus pe labo ipekeke Dibata i bas si mate nari.

¹⁷ Janah adi la kin ipekeke Dibata e Kristus i bas si mate nari, sia-sia me kinitekenndu e janah kam tetap denga i bas dosandu.

¹⁸ Bage pe kalak si nggo mate, si nai nggo tek man Kristus, bene me.

¹⁹ Adi pengarapenta nandangi Kristus terjeng kegeluhen i bas doni enda ngenca, maka kita me si liahna i bas kerina manusia.

²⁰ Tapi si tuhuna Kristus nggo ipekeke Dibata i bas si mate nari, janah enda me jaminen maka kalak si nggo mate nggeluh ka mulihi.

²¹ Sabap bagi kematen reh arah sekalak manusia, bage me pe kekeken i bas si mate nari reh arah sekalak Manusia.

²² Sabap bali ras kerina manusia mate erdandanken persadanna ras Adam, bage me pe kerina manusia ipegeluh mulihi erdandanken persadanna ras Kristus.

²³ Sekalak-sekalak pagi ipekeke Dibata rikutken gilirenna: perlebe Kristus; jenari i bas paksa kerehen Kristus eme giliren kalak sikerajangen Kristus.

²⁴ Kenca bage seh kedungenna; i bas paksa si e, kenca ikernepken Kristus kerina raja, pemerentah, ras kuasa-kuasa, emaka IendeskenNa me KinirajanNa man Dibata Bapa.

²⁵ Sabap nggo itetapken maka Kristus jadi raja seh ItamakenNa kerina musuh-MusuhNa i teruh tapak-tapak NaheNa.

²⁶ Musuh si perpudina kal IkernepkenNa eme kematen.

²⁷ Sabap i bas Pustaka Si Badia lit tersurat, "Kerinana nggo itamaken Dibata ku teruh tapak-tapak NaheNa." Aminna pe ikataken "kerinana," tentu labo ikut Dibata, eme si namaken kerinana ku teruh tapak-tapak nahe Kristus e.

²⁸ Tapi kenca kerinana itamaken i teruh kuasa Kristus, maka Kristus jine selaku Anak, naluken DiriNa man Dibata si nggo namaken kerinana i teruh KuasaNa. Alu bage, Dibata tuhu-tuhu me Dibata i bas kerinana.

²⁹ Kuga dage kerna kalak si nggo iperidiken guna kalak si nggo mate? Ngkai maka si e ilakokenna? Adi tuhu kin la lit kekeken i bas si mate nari, ngkai dage maka kalak iperidiken guna kalak si nggo mate?

³⁰ Janah kami jine, man kade kami nggeluh i bas bahaya tep-tep jam?

³¹ O senina-senina, tep-tep wari aku menam mate. Perbahan megahna kuakap kerna kam i bas persadan ras Kristus Jesus Tuhanta, aku i jemba ngataken si enda man bandu.

³² Bicara erbebe aku ras rubia-rubia si merawa i jenda, i Epesus, erpalasken pertimbangen manusia saja, kai kin untungna man bangku? Janah adi labo lit kekeken i bas si mate nari, "Man minem sajalah kita, sabap pagi mate me kita."

³³ Ula kal kam papak! "Pergaulen si la mehuli, ncedaken biak si mehuli."

³⁴ Pejorelah ukurndu ku si benar, janah ulanai bahan dosa. Piga-piga i bas kam lit denga si la nandai Dibata. Si enda kukataken gelah mela iakapndu.

³⁵ Tapi lit kalak si njabap bagenda, "Kuga ka dalanna kalak mate banci keke mulihi? Janah kuga nge pagi tempas kulana?"

³⁶ Motu kal tuhu kam! Adi isuanndu benih i bas taneh, labo banci turah adi la kin mate lebe benih e.

³⁷ Adi nuan-nuan kam, si isuankenndu labo sinuan-sinuan si nggo mbelin, tapi benihna saja nge ngenca, umpamana page, tah si debanna.

³⁸ Dibata nge si mereken tempas batang man benih e rikutken si nggo isura-SurakenNa. Tep-tep benih IberekenNa tempas batang si sue rikutken bangsana.

³⁹ Labo bali kerina daging: lain daging manusia, lain daging asuh-asuhen, lain daging perik-perik, janah lain daging nurung.

⁴⁰ Bage me pe lit tempas kula si sue man mahluk si nggeluh i bas ingan si meganjang, lit tempas kula si sue man mahluk si nggeluh i doni enda. Tapi lain kiniulin si lit i bas ingan si meganjang, lain kiniulin si lit i doni.

⁴¹ Lain kiniulin matawari, lain kiniulin bulan, lain kiniulin rubia-rubia; janah rubia-rubia pe lain kiniulinna sada nandangi si debanna.

⁴² Bage me pagi kerna kekeken kalak si nggo mate. Kula si ikuburken biakna ermasap-masap; si ipekeke pagi biakna la ermasap-masap.

⁴³ Asum itanemken, kula e ciga ate; asum ipekeke dem alu kiniulin. Asum itanemken lanai ergegeh; asum ipekeke kula e nggo megegeh tuhu-tuhu.

⁴⁴ Asum itanemken tempas kula e sue guna kegeluhen doni enda; tapi asum ipekeke tempasna sue guna kegeluhen pertendin. Dage lit kula si sue guna kegeluhen doni, janah lit kula si sue guna kegeluhen pertendin.

⁴⁵ Sue ras pengajaren Pustaka Si Badia, "Adam, manusia si tangtangna, ijadiken jadi mahluk si nggeluh"; tapi Adam si perpudi jadi Kesah si mereken Kegeluhen.

⁴⁶ Si pemena tempasna labo biak Kesah, tapi tempasna sue guna kegeluhen doni enda; janah kenca bage maka reh si tempasna sue guna kegeluhen pertendin.

⁴⁷ Manusia si pemena e asalna i bas abu taneh nari; tapi Manusia sipeduaken e AsalNa i Surga nari.

⁴⁸ Manusia-manusia bangsa doni enda contohna ibuat i bas manusia si asalna i bas abu nari e; janah manusia-manusia bangsa Surga contohna ibuat i bas Manusia si AsalNa i Surga nari e.

⁴⁹ Bagi genduari kita make gambar manusia si asalna i bas taneh nari e, bage ka me pagi kita make gambar Manusia si AsalNa i Surga nari e.

⁵⁰ O senina-senina, si kumaksud eme: kula si genduari enda, si jadi i bas daging ras dareh nari, labo pagi banci dat bagin i bas Kinirajan Dibata, janah si biakna ermasap-masap labo pagi banci dat bagin i bas si biakna la ermasap-masap.

⁵¹ Perdiatekenlah, kuturiken sada rahasia man bandu: labo pagi kerina kita mate, tapi kerina pagi kita iobah.

⁵² I bas sada detik, i bas singkemirep mata, asum terbegi sora terompet si perpudina. Sabap asum ersora terompet e, kalak si nggo mate ipekeke i bas tempas si la ermasap-masap, janah i bas paksa si e iobah me kita.

⁵³ Sabap si ermasap-masap janah si banci mate arus makeken si la ermasap-masap ras si la banci mate.

⁵⁴ Dage kenca si ermasap-masap dingen si banci mate e nggo makeken si la banci ermasap-masap dingen si la banci mate, maka seh me si tersurat i bas Pustaka Si Badia, "Kematen nggo itelen, kemenangen nggo seh."

⁵⁵ "O kematen, i ja kemenangenndu? O kematen, i ja bisandu?"

⁵⁶ Bisa kematen eme dosa, janah dosa ergegeh erdandanken Undang-undang.

⁵⁷ Tapi bujur ninta man Dibata si mereken kemenangen man banta arah Tuhanta Jesus Kristus.

⁵⁸ Erdandanken si e, o senina-senina si kukelengi, tetaplah ukurndu, ula mbewat-mbewat. Mejingkatlah kam rusur i bas ndahiken dahin Tuhan, sabap ietehndu maka labo percuma dahin si idahikenndu i bas Tuhan.

1 Korintus

Video 1 Korintus 15

Ikuti Kami:

KONTAK | PARTISIPASI | DONASI