Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bursik ma huta sipanlawan, na butak ampa siunsagahkon gogoh!
2 Seng itangihon be hata sipasingat anjaha seng ijalo pangajaran. Seng tenger uhurni bani Jahowa anjaha seng ipadohor dirini bani Naibatani.
3 Songon singa na maraum do pambobaini i tongah-tongahni; songon sorigala borngin do panguhum ni sidea, na so mansarihon ari patar.
4 Parladung do nabi ni sidea, halak sipangoto-otoi; ipabutak malim ni sidea do na mapansing ai, uhur-uhur ni sidea do ibahen bani titah ai.
5 Pintor do Jahowa i tongah-tongah ni sidea, seng dong ibahen na salah; ganup sogod ipatuduhkon do aturan-Ni, seng ongga holang haliharonni; tapi seng ibotoh pargeduk na maila.
6 “Domma siap Hubahen bangsa sipajuh begu-begu; domma mareong manara ni sidea; domma Huparseda dalan-dalan ni sidea, gabe sahalak pe lang boi be mardalan hunjai; domma mareong huta ni sidea, seng dong jolma be ijai, seng dong be pangisini.
7 Ningku, tontu mabiar ma ia Bangku, tangihononni ma pangajaran; gabe seng siapkononkon rumah ni sidea domu bani haganup na dob Hulumbahon ai bani sidea. Tapi lambin hinsahni do sidea pasambor-sambor pambahenan ni sidea.
8 Halani ai managam ma hanima,” nini Jahowa, “Bani ari parjongjong-Ku gabe saksi. Ai domma Huputuskon patumpuhon bangsa-bangsa, patumpuhon harajaon, laho manguseihon ringis-Hu bani sidea, ganup pargajag ni gilang-Ku; ai maningon boiskononkon do ganup tanoh on, marhitei apuy ni parsimburuon-Ku.”
9 Tapi berehonon-Ku ma hubani bangsa-bangsa bibir na legan anjaha na pitah, ase ganup sidea boi mandilo goran ni Jahowa, anjaha sauhur sidea mambalosi-Si.
10 Hun dipar ni bah Etiopia das hu utara parujung boanon ni sidea ma Bangku galangan sipanganon.
11 Bani ari ai seng be bador ho halani haganup pambahenanmu, na hinorjahonmu manlawan Ahu; ai padaohon-Ku ma hun tongah-tongahmin hatoalon ni pangenjengmu, anjaha seng be pagijang-gijang diri ho i atas dolog-Ku na pansing in.
12 Ai tebahonon-Ku do i tongah-tongahmin sada bangsa na toruh maruhur anjaha na masombuh, na marhatengeran bani goran ni Jahowa.
13 Ia simasima ni Israel, seng be horjahononni hagedukon barang hatahononni ladung; seng jumpah be bani pamangan ni sidea dilah sipaoto-oto, tapi sonang ma sidea manampal ampa manggompang, seng dong halak na manonggoti.
14 Marolob-olob ma ho, ale boru Sion, marsurak ma, ale Israel! Marmalas ni uhur ma ho anjaha marmegah-megah humbani gokni uhurmu, ale boru Jerusalem!
15 Domma ipadaoh Jahowa uhum-Ni dompak ho, domma isiapkon munsuhmu. Raja ni Israel, ai ma Jahowa, Ia do i tongah-tongahmu, seng be habiaranmu hamagouan.
16 Bani ari ai hatahonon ni halak ma bani Jerusalem, ʻUlang ho mabiar, ale Sion! Ulang palopas tanganmu lambin galek!
17 Jahowa, Naibatamu do i tongah-tongahmu, puanglima, sibere hamonangan. Marpangulaki do uhur-Ni marholong ni uhur bam.ʼ Malas tumang do uhur-Ni mangidah ho anjaha marolob-olob,
18 songon bani ari parjumpahan. Padaohon-Ku do hun bam parmaraan anjaha paholangon-Ku do habadoron na mandondoni ho.
19 Tonggor ma, bani panorang ai marlulu ma Ahu bani na mangodoh-odoh ho. Tapi paluahon-Ku ma na mengkat-engkat, anjaha patumpuon-Ku ma na merap anjaha paubahon-Ku ma habadoron ni sidea gabe puji-pujian ampa hasangapon i sab tanoh on.
20 Bani panorang ai boanon-Ku ma hanima mulak hu tanohnima, bani panorang ai patumpu-tumpuon-Ku ma hanima. Ai bahenon-Ku ma hanima tarbarita anjaha marsangap i tongah-tongah ni sagala bangsa na i tanoh on, sanggah Hupasuang haadongonnima i lobei ni panonggornima,” nini Jahowa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA