Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ta’ salamet ba’na Yerusalim, kottha bejjat se dujan aberonta’ ka PANGERAN ban se nyecce’ pandhudhu’na dibi’!

² Calaka’ kottha se ta’ endha’ narema parengeddanna PANGERAN, ta’ parduli mon esala’agi, kottha se ta’ endha’ massra’agi aba’na ka PANGERAN, ban ta’ endha’ nyo’on partolonganna!

³ Om-kaom oreng agungnga kottha jareya akantha macan se agaung. Kim-hakimma akantha te’-pate’ alas se lapar; ce’ dhakkana sampe’ lang-tolang epatadha’ kabbi, ta’ epakare settonga balakka’ kaangguy kalagguwanna.

⁴ Bi-nabbina ta’ andhi’ tanggung jawab ban ta’ ekenneng parcaja; para imam manajjis pa-apa se etantowagi kaator ka Pangeran malolo ban alik-balik kom-hokomma Allah kaangguy kaontonganna dibi’.

⁵ Tape PANGERAN gi’ badha e kottha jareya; Pangeran jareya ros-terrosan alampa’agi sabarang se bendher ban ta’ tao alampa’agi barang se sala. Sabban gi’ laggu masthe apareng kaadilan ka ommadda. Tape oreng se ta’ kennal ka kaadilan e kottha jareya teptep tadha’ malona alako jahat.

⁶ PANGERAN adhabu, "Sengko’ la mamosna bangsa sabannya’na; tha-kotthana bi’ Sengko’ epaancor, dhung-geddhungnga ban ra-manarana epadaddi jur-gujuran. Tha-kotthana seppe ta’ ekennengnge oreng ban rong-lorongnga seppe ta’ elebadi oreng.

⁷ Ca’na Tang pekker, ‘Sateya tanto Tang ommat ahormadi Sengko’ ban agateyagi Tang parengeddan. Tang ommat tanto ngenga’e pangajaran se eajarragi Sengko’.’ Tape nyatana, reng-oreng jareya sajan bajeng alako jahat etembang bi’ sabellunna.

⁸ Tape senga’! Nante’ baktona Sengko’ jaga agugada ba’na. Sabab Sengko’ la motossagi makompola sa-bangsa ban karaja’an-karaja’an bi’ Sengko’ eamoga polana Tang ate ce’ peggella. Saanterona bume bakal obusa ekello’ apoyya peggella Tang ate.

⁹ Tape saellana jareya Sengko’ ngoba’a atena sa-bangsa jareya, sampe’ kabbi padha adu’a ka Sengko’ malolo, banne ka lah-illah laenna. Sa-bangsa jareya kabbi bakal ta’ada ka Sengko’.

¹⁰ La’-mala’ dhari Sudan se jau, Tang ommat se asalebbudan jareya bakal dhatengnga ban ngatorragiya kurban ka Sengko’.

¹¹ E bakto jareya, he, Tang ommat, ba’na ta’ osa arassa malo pole polana se la aberonta’ ka Sengko’. Sengko’ ngojuga saneyap oreng se sombong ban angko, ban ba’na ta’ kera aberonta’ pole ka Sengko’ e Tang gumo’ se socce.

¹² E jadhiya bi’ Sengko’ epakennengngana terros ka settong bangsa se andhap asor, se nyagerragi Tang partolongan. Bangsa jareya olle neng e jadhiya.

¹³ Re-karena oreng Isra’il ta’ kera alako jahat pole ka sapa’a bai, ta’ kera lecegan pole ban ta’ kera nepowan pole. Reng-oreng jareya bakal ma’mora ban bakal nyamana odhi’na, ban ta’ tako’ ka sapa’a bai."

¹⁴ He, Isra’il, mara asorak ban anyanye! He, Yerusalim, mara anga-bunga pagu-onggu!

¹⁵ Sabab PANGERAN la ambu ta’ ngokom ba’na pole; so-mosona ba’na la eojuk kabbi. Ba’na eaobi ratona Isra’il, PANGERANna ba’na dibi’. Sateya ba’na ta’ osa tako’ pole.

¹⁶ E settong bakto reng-oreng bakal ngoca’a, "He Yerusalim, ba’na ta’ osa kene’ ate, ja’ sampe’ ba’na arassa ketter.

¹⁷ Ba’na eaobi GUSTE Allahna se parjuga. Ba’na mennang polana kobasana. PANGERAN gumbira ban perak polana ba’na, e dhalem taresnana ba’na eparenge odhi’ se anyar.

¹⁸ Lantaran ba’na, Salerana anyanye kaperagan, akantha oreng se teppa’na apesta." Dhabuna PANGERAN, "Balai se teba’a ka ba’na bi’ Sengko’ epanyengla, kanespa’anna ba’na bi’ Sengko’ epaelang.

¹⁹ E settong bakto se nyecce’ ba’na bi’ Sengko’ epaancora, se dippang bi’ Sengko’ epasalamedda; oreng buwangan etontona epamoleya ka bengkona. Kanespa’anna bi’ Sengko’ eoba’a epadaddiya kahormadan; e man-dhimman e bume reya, reng-oreng jareya bakal emolja’agiya.

²⁰ E settong bakto pandhudhu’na ba’na se abalessadan bi’ Sengko’ etontona epamoleya ka bengkona. Bi’ Sengko’ ba’na epakasohora e attas bume, ban ba’na epama’mora pole." PANGERAN la adhabu.

Zefanya

Video Zefanya 3

Ikuti Kami:

KONTAK | PARTISIPASI | DONASI