Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nitunrai Yerusalem, kota ja’dalaka nangaia angngewa ri Batara siagang anjallakkangi pandudu’na pa’rasangang kalenna!
2 Cilakai kota tenaya naero’ antarimai pappakainga’Na Batara, siagang tenaya todong naero’ anjampangi pangngajara’Na, tenaya naero’ ampappirannuangi sarenna mae ri Batara, siagang tenaya nappala’ tulung mae ri Ia!
3 Sikamma tumalompona anjo kotaya rapangi singa ammarrung-marrunga sa’ranna. Sikamma hakinga rapangi serigala-serigala cipuruka; sanna’ angngoana ke’nanga, sa’genna manna sipappaka buku tenamo nasesa untu’ ammuko.
4 Na’bi-na’bina tena tanggong jawa’na siagang takkulleai nipatappa’; sikamma imanga narantassi apa le’baka nisa’la’ untu’ Batara siagang naputara’ baleki hukkung-hukkunNa Allata’ala untu’ kaparalluang kalenna ke’nanga.
5 Mingka nia’ iji Batara ri anjo kotaya; tuli Nagaukangi apa annabaya siagang tale’bakai sala. Tunggala’ bari’basa’ mattantu Nasarei kaadelang umma’Na. Mingka, tau tenaya naassengi kaadelanga ri anjo kotaya, tuli tenana siri’na a’gau’ ja’dala’.
6 Nakana Batara, "Jaimi bansa le’ba’ Kupa’lanynya’; Kuancuruki kota-kotana ke’nanga, siagang tembo’-tembo’na kammayatompa menara-menarana ke’nanga Kupa’jari loro-loroi. Kota-kotana ke’nanga a’jari sinoi tena bonena siagang agang-aganga sino kabusuki.
7 Kupikkiriki angkanaya, ‘Kamma-kamma anne tantu napakalompoMa’ ummakKu siagang naparhatikammi sikamma pappakaingakKu. Tantu nau’rangi ke’nanga pangngajarang le’baka Kupassareang mae ri ke’nanga.’ Mingka a’nyatami angkanaya la’bi katambammi panggaukang ja’dala’na ke’nanga na rioloangannaya.
8 Mingka tutuko! Tayammi allonna naKuammenteng nai’ untu’ antuntukko. Nasaba’ le’ba’mi Kupattantu untu’ ampa’rappungi bansa-bansaya siagang kakaraengang-kakaraenganga untu’ ampabattui pangngalarroingKu mae ri ke’nanga. Sikontu buttaya lala’busuki nakanre pepe’ pangngalarroingKu.
9 Mingka sallang laKupinrai atinna anjo bansa-bansaya, sa’genna appala’ doang ke’nanga mae ri Nakke bawang, siagang tena nappala’ doang mae ri rewata-rewata maraenga. Sikontu anjo bansa-bansaya lamannuruki mae ri Nakke.
10 Ba’lalo battu ri pa’rasangang Sudan bellaya, anjo ummakKu tassia’-siaraka laniaki battu siagang assare koro’bang mae ri Nakke.
11 Anjo wattua, he ummakKu, tenamo nuparallu pole siri’-siri’ lanri le’ba’nu angngewa mae ri Nakke. LaKubongkai sikamma tau tampoa siagang borroa, siagang tenamo nulangngewa mae ri Nakke irate ti bulu’ matangkasakKu.
12 Anjoreng laKuboliki ammantang tuli se’reang bansa tuna pa’mai’, ampattoangai pannulungKu. Akkullei ke’nanga ammantang anjoreng.
13 Tu Israel niaka ammantang tassesa, tenamo nala’gau’ ja’dala’ pole manna ri nai; tenamo nala’balle-balle ke’nanga siagang tena tommo nalannipu. Lakalumanynyangi na salewangang tallasa’na ke’nanga, siagang tenamo nalamalla’ manna pole ri nai."
14 He Israel, rannu mako nukkelong! He Yerusalem, pakarannumi sikontu atinnu!
15 Nasaba’ ammarimi Batara anghukkungko; le’ba’mi Nabongka ngaseng musunnu. Nila’langngiko ri Karaeng Israel, iamintu KalenNa Batara. Kamma-kamma anne tenamo nuparallu malla’.
16 Lanarapiki wattunna nalakkana sallang taua, "He Yerusalem, teako mallakki siagang teako la’bai pa’mai’nu.
17 Nala’langiko Karaeng Allata’alanu porea. Ammetako lanri kakoasanNa. Rannui pa’mai’Na siagang sannangi nyawaNa Batara lanri ikau, lanri pangngamaseanNa na Nasareko katallassang beru.
18 Lanri ikau Nakkelong rannu rapang tau assua’-suaraka." Nakana Batara, "Bala eroka battu antujuko Kupattaenai. Kupattaenami katunaannu.
19 Kuancuruki wattu labattuna tau eroka anjallakkangko, siagang tau akkeppanga Kupasalamaki; sikontu tunipelaka Kururungangi ammotere’. Katunaanna ke’nanga Kupinrai a’jari kalompoang; manna kemae, ba’lalo ri sikontu buttaya, lanipakala’biriki na nipuji ke’nanga.
20 Labattui wattunna, pandudu’nu tassiaraka Kururungangi ammotere’. Kupa’jari masahorokko ri sikontu linoa, siagang laKupoterangi kakalumanynyangngannu." Le’ba’mi akkana Batara.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA