Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Salloi ri le’ba’na anjo Nasaremi Batara anjo umma’ Israel kaamangngang; tenamo nanisusai ke’nanga ri pa’garatta’na musua. Anjo wattua toa sikalimi Yosua.
2 Jari nakio’mi sikontu anjo umma’ Israel, sikamma tau toa-toaya, sikontu hakinga, sikamma pamimpinga, siagang sikamma perwira tantaraya nampa nakana mae ri ke’nanga, "Kamma-kamma anne toama’.
3 Le’ba’mi kucini’ ngaseng sikontu apa Nagaukanga Karaeng Allata’alanu mae ri sikontu bansa niaka anrinni lanri untu’ ikau ngaseng. KalenNa Karaeng Allata’alanu barjuang untu’ ikau.
4 Buttana bansa-bansaya niaka ija ammantang, kammayatompa buttana sikontu bansa le’bakamo kubeta, iamintu butta takka’ranga battu iraya ri Binanga Yordan tulusu’ kalau’ sa’genna ri Tamparang Tangngaya, le’ba’ kabusu’mi kubage-bage mae ri kau untu’ a’jari pisakanu.
5 Karaeng Allata’alanu lampamono’ bokoi anjo bansa-bansaya, siagang lari battu ri dallekannu punna a’lampako mange ambunduki ke’nanga. Lanupisakai pa’rasanganna ke’nanga, sangkamma le’baka Napa’janjiang Karaeng Allata’alanu mae ri kau.
6 Lanri kammana anjo, tutuko sollanna nuturuki siagang nugaukang sikontu apa niaka tattulisi’ lalang ri Kitta’ Hukkunna Musa. Teako dakkai bonena anjo kittaka manna pole sirupa.
7 Lanri kammana anjo tenamo nulasileo’ siagang bansa-bansa niaka ija ammantang ri alla’nu. Tena nalanutappu arenna rewata-rewatana ke’nanga yareka assumpa lalang arenna anjo arenga. Kammayatompa tena todong nalanugaukang ibadaya yareka anynyomba mae ri anjo rewata-rewataya.
8 Ba’lalo musti tuli tamamminrayai pa’mai’nu mae ri Batara, sangkamma le’bakamo nugaukang sa’genna kamma-kamma anne.
9 Le’ba’mi Nabongka Batara bansa-bansa lompoa siagang kassaka untu’ ikau ngaseng; tena manna sitau battu ri ke’nanga akkulle attahang angngewako.
10 Tunggala’ taua battu ri kau akkullei nabeta tau assa’bua, nasaba’ KalenNa Karaeng Allata’alanu a’bundu’ untu’ ikau, sangkamma le’baka Napa’janjiang.
11 Lanri kammana anjo, angngu’rangiko untu’ mangngamaseang mae ri Karaeng Allata’alanu.
12 Punna tena namajarre’ pa’mai’nu siagang punna assileokko siagang bansa-bansa niaka ija ammantang ri alla’nu, kammayatompa punna a’buntingko siagang ke’nanga,
13 u’rangi, angkanaya mattantu tenamo nalaNabongkai Karaeng Allata’alanu anjo bansa-bansaya untu’ ikau ngaseng. Kabalekanna, la’jari bahaya lompoi anjo ke’nanga mae ri kau, nasaba’ anjo ke’nanga la’jari sanrapang sikko’ yareka tado’ tattannanga untu’ ikau. Nampa lanapa’jari sessa tongko ke’nanga; nasaba’ anjo ke’nanga la’jari sanrapang paccambo’ mae ri dongko’nu yareka sanrapang katinting lalang ri matannu. Tulusu’ lasessako sa’genna manna sitau battu ri kau tania’ lammantang tassesa ri anne pa’rasangang baji’ Napassareanga Karaeng Allata’alanu mae ri kau.
14 Kamma-kamma anne narapi’mi wattungku lamate. Ikau ngaseng, massing baji’ ngaseng nuassenna angkanaya Batara Allata’alanu le’ba’ assareko sikontu apa baji’ Napa’janjianga. Sikontu janjinNa le’ba’ ngasemmi Narupai, tena manna se’re taNarupai.
15 Mingka sangkamma NarupainNa ngaseng janjinNa mae ri kau, kamma tomminjo mattantuna laNagaukang ngaseng tongi panggaratta’Na mae ri kau.
16 Punna nudakkai parjanjiang le’baka Naparentakang Karaeng Allata’alanu mae ri kau sollanna nuturuki, siagang a’lampako anggaukangi ibadaya kammayatompa anynyomba mae ri rewata-rewataya, tena talarroNa Batara, siagang tena taNahukkunnu ngaseng. Lalang wattu sinampe’ duduji naNapa’lanynya’ ngasengko battu anrinni ri pa’rasangang bajika anne, Napassareanga Batara mae ri kau."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA