¹ Farisikam de gubirida gwen wenya ki zep anakan esak, “Yesus hon angkam beyakam biti gwe-gweꞌan, hen zebon beyakam baptis ta gwibin hip sek gwe-gweꞌan. Yohanis hon angkam man dan-en gweꞌan.”
² Hwena Yesus Zena hom baptis ta gwibirki. Diki zere hon de ang ta gwen wenya eye baptis la gwibik.
³ Anakan kim salka, “Farisikam de zini mes kirekam emsa tawa neblak,” Zen dekam zep Yerusalem mo lang nakon asa etan Galilea mo lang san dep golesek gweka.
⁴ Orana in desane sek gwek langna Samaria mo ngirin kles san.
⁵ Ki zep Samaria mo ena Sikark asa goleyaing gweka. Dekon golek– ngana mensa Auyan Yakob Bak orep tangan tane zem Yusup hup zerblakaye.
⁶ Ëna Sikark iwe hen ki, Yakob Bak Swe mo aili hona. Yesus man oranak sin gwe zaka, zep kim hata zaka, hendep dekam zep aili ho alpnak nikin ane zaka. Yaklana dekam bolak mes zauku.
⁷ Ëe zere hon de ang ta gwen wenya mese ena iwe yaing gwesek– tembanesa de ze lop tan hap. Ki zep hwena Sikar wenya blome naban hataꞌanzak– hona insa dikim zausul han hap. Yesus ki zep gubirki, “Abe hap nonol zausulblu ine.”
⁸ (4:7)
⁹ Wenya in ki zep ding gulbluk, “Em in Yahudi wal syake, hen ee an langna Samaria kore we. Zep em ba habe asa kirekam abe gulu?” Zen mae hap ki ding gulbluk: Sap Yahudi zini bejen Samaria zi niban tahana goleseran-seran gwen.
¹⁰ Ki zep ding gulbirki, “Alap mensa angkam golzimꞌira, em home tame guꞌura. Hen em home Asa tame tala. Ki emaka Asa abe tala– hendep de ngaya gwen hap de hosa de ebe hap golbin hip. Hen Ëe amaka ebe hap golbiꞌin.”
¹¹ Ki zep ding gulbluk, “Bian, eno blomena hom, hen aili hona an logok gwe henna. Em banakan molye zausulku– ngaya gwen hap de hona in saye.
¹² Auyan Yakob Bak tinkim aili hona ansa nebe mae hap hli tazimki, hen zena, walas zem hen zaho zem, zen dekore hosa notde gwibik. Em san ema enaka kil tiꞌara? – ‘Ëe an Yakob Bak onakon ama teipsiꞌin.’”
¹³ Ki zep ding gulbirki, “Zi de aili hona ansa otde gwibinkim, zen sa etan eho-hole gwe-gwer.
¹⁴ Hwena mensae gol gwizimꞌin, zi de desa gul irinkim, dekam bejen etan eho-hole gwen. Hwena hona in zeno mae mo enho nakon sa ana gwese gwer, hendep zep sa hendep denaban engaya gwer.”
¹⁵ Wenya in ki zep ding gulbluk, “Bian, abe hap hona insa golbir– ee akakim etan ho-hole gwe srem gwek. Hen dekam ee molye awe hata gwezak– hona ansa de zausul gwen hapye.”
¹⁶ Ki zep etan ding gulbirki, “Ki zi omka em kwang ta lahan.”
¹⁷ Hwena ki zep ding gulbluk, “Ano zini hom.” Etan ki zep ding gulbirki, “Em eiwakame ding guluda,
¹⁸ sap em mese aha-ere taha-tapkam zini zersik gweka. Hen mensa angkam zergweꞌara, home eiwakam zeꞌara. Eno ding gunnu in eiwana.”
¹⁹ Ki zep ding gulbluk, “Bian, angkam mese emsa tame tanan: Em Alap mo olsa de ayang gul gwen hap de zi.
²⁰ Ano mae mo auyan-azana awe de kwatapnak yakla yawalak etagal gwe-gwek– dekon de Alap hap boklesa kom ta gweblan hap. Hwena Yahudi zini, em ema anakan tawa la gwibirin, ‘Yerusalemk de Alap mo gol ennak em yakla yawalkam etagal gwe-gwen– dekon de Alap hap boklesa kom ta gweblan hapye.’”
²¹ Ki zep hwena ding gulbirki, “Ano ola an desa em taiblibin: Yaklanak sa hatal, dekam kwatapna an en kon hen Yerusalemk en kon molya Alap hap boklena kom da gweblak.
²² Em Samariak de wenya, men zebe hap boklena kom la gweblanan, home tame la gweꞌan. Hwena ee, Yahudi zini, mese tame lak– men zebe habe boklena kom la gweblananye. Sap dekam de zisi ngaya tabin hip dena, zen Yahudi hon sa ki lwal.
²³ Sap zeno yaklanak sa hatal hen angkam man lwaꞌan, dekam zini sa tingare enho naban hen Alap mo Enho de bi gwibiridankam Bian hap boklena kom da gweblal. Sap Bian Alap kirekam de zisi hakalbirida gwenda– Zenaka de boklesa kom ta gweblan hapye, sap men-kore men-kore zi ausu.
²⁴ Alap Zen enho enna, zep zi de eiwakam boklesa kom ta gweblanna, zen diki tingare zere mo enho naban hen Alap mo Enho de sosonsa golblan naban.”
²⁵ Wenya in ki zep ding gulbluk, “Ëe tawana: Nesa de ngaya tabin hip de Zini sa hata zala, hen kim de hataꞌan zaka, Zen sa kitak srip gulsuk gwizimdi.”
²⁶ Ki zep ding gulbirki, “Ëe an Zen– an debane lonꞌaraye.”
²⁷ In kim ze lonꞌak, ee zere hon de ang ta gwen wenya dekam zebe lwanda halzak. Zao zebe Yesussu anakan lenggwanblaꞌanzak, “Zen wenya ban am olsa lonꞌan.” Hwena wenya insa home anakan lakensibik, “Em basae Zebon dwam gwibiꞌira?” Hen Yesussu home lakensiblik, “Em ba habe wenya in han ola lon sara?”
²⁸ Hwena wenya in kim Yesussu kirekam salblak, blomena insa zao zep eititi gwe gubirhak, ki zep enak gubiridahak,
²⁹ “Haen! Zini wakinsa emki hla tan. Zen ano gwensa kitak tawa gwibiri. San ha Zen tangan mes yap– nesa de ngaya tabin hip de Zi niye?”
³⁰ Dekam zep ena iwe de zini du neblazak.
³¹ In kim ki ze kirekam lwak, ee zere hon de ang ta gwen wenya, ee ama sap ze titi la gweꞌak, “Guru Bak, emki tembane gwen.”
³² Hwena Zen man ap ding gulzimki, “Ano tembanena ki– mensa em tawa eibir srem gweꞌanye.”
³³ Ki zebe enaka enbiridak, “San ha man yap aha zi tembanena nolblazal yap?”
³⁴ Ki zep ap ding gulzimki, “Ano tembanena a zen moye: Bian mo dwam gwibinsi dikim syal gwibin hip, hen syala men zep Asa zer sonekake, desa dikim sul sonen hap. Zen ano tembanena zen.
³⁵ Zini kirekam nen gwibirin, ‘Eiyas tan nakon, etan benna dan-ner dan-ner, dekam sa taran hap denak zaul.’ Hwena Ëe ama emsa gubiridaꞌan: Nga yala ansa emki er tabla naseran. Gandumnu mes ngap-ngap gwera, zep taran hap denak mes zaul. Nen taran.
³⁶ Eiyas tan hap de zini, zen mes eteingir gwe guk. Hwena zini men zen angkam taran hap syal taꞌan, zen hendep de elwa gwen hap de gudangnak gandumnu insa kang da gwenan, hen zebe mae hap Alap hendep de elwa gwen hap de te-alasa gaji hap aitbir gwizimnira. Zep zini men zen eiyas tanna hen men zen de taranna apdekam sa lamkam eisrip-sri gwer.
³⁷ Zep man dakastilin– men kirekam anakan nen gwibirinye, ‘Ahakorena eiyas tan hap de wenya. Ahakorena zen taran hap de wenya.’
³⁸ Hwena Ëe mese emsa dam tasibik– em de hwena aha zi mo eiyas tanna insa tan gwen hap. Zep em zeno mae mo irse gwen nakone dawemsa hla kul gweꞌan.”
³⁹ In zen du neblazak, zao zep abe da gweꞌak– deban mae de zewe golegweisin hip. Hendep zewe yaklana dan zep gweisiki. Langna Samaria mo ena Sikark de zini dekam beya nik zep Yesussu daibliblak, sap wenya in anakan gubirida gweꞌak, “Zen ano gwensa kitak tawa gwibiri.”
⁴⁰ (4:39)
⁴¹ Hwena Zenaka de sane tan tangankam, zep etan beya tangan nik daibliblak.
⁴² Hyanak zep wenya insa nen gwibik, “Menkam eno ol en nakone laibliblaꞌak, hwena angkam aena hen mese sane lak, zep mese dam lasil, ‘Eiwa, Zen okamanak de zisi de ngaya tabin hip de Zi.’”
⁴³ Samaria mo ena iwe kim yaklana dan asa golegweisiki, ki zep kon etan zere mo langna Galilea san dep asa golesek gweka.
⁴⁴ Yesus dekam hamal hap mes asa gubiridaka, “Zini hom zere kore wal de Alap mo olsa ayang gul gwizimdin hip de zini nasal gweblanan, zep Asa hen Galileak molya daibliblak.”
⁴⁵ Hwena kim asa goleyaing gweka, Galileak de zini man ki sap neirink. Zen hen mes Yerusalemk yakla yala Paskanak ang tak, hen dekam zeno owas syal gwibinni kitak kara nul gwek, zep ki neirink.
⁴⁶ Yesus ki zep asa golelwanda halka– Galilea mo ena Kana san dep, men zewe Zena nonol ho tanganna anggur ho hap li yul sonekake. Langna Galileak de aha ena Kapernaumk zao hen ki zini gweꞌanka– teipsin zini Herodes mo taha tri so gweblan nik. Hwena zeno tanena sang-sang nik gweꞌanka.
⁴⁷ Zen kim salka, “Yesus Yerusalem mo lang nakon mes hata zala,” dekam zep song gwebla zaka, zao zep abe ta zaka, “Em wehe asa mas gweblaꞌanka? Kapernaum sun nen ingnen– ano tane tolsa eka dawem ta. Zen tin hip tol alp gwesiꞌira.”
⁴⁸ Ki zep hwena ding gulbluka, “Em awe de zini, karek tanganna. Em owas-owassa de syal gwibir-zimdin sremkam bejen em etaiblin.”
⁴⁹ Hwena man gubluka, “Haen, Bian! Em de hla tan sremkam ano tanena sa tol tili!”
⁵⁰ Ki zep hwena ding gulbluka, “Emki song gwen. Eno tanena sa ngaya gwera.” Zini in man Yesus mo ola insa taiblibirki, ki zep hendep gwe halka.
⁵¹ Ora san kim nama tineꞌanka, dekam zep zere hon de babu gwen zi niban goletoweka. Zao zep nenblazak, “Eno tanena mes dawem gweka!”
⁵² Ki zep takensibiridaka, “Bawalkam dawem gweka?” Ki zep ding nulblik, “Ir, yakla nwena aha-en, dekam ewenna tap gweblak.”
⁵³ Bi zem dekam zep enlala gweka, “O hare yakla nwena dekam am Yesus asa gubluka, ‘Eno tanena sa ngaya gwera.’” Zena hendep zere mo golak dena kitak dekam zep Yesussu daibliblak.
⁵⁴ Zep in kim kirekam tane tola insa dawem taka, Zen dekam zep Yerusalem mo lang nakon de Galileak hata gwe zankam de owas syal gwibir-zimdinni dan neblak.