Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali tempo etu re’e samba’a to Yahudi to aliran Parisi sanganya i Nikodemus. Ia samba’a tau tu’a nto Yahudi seja.
2 Wali re’e sangkani tempo ri raya mburi i Nikodemus etu ia yau mangampago i Yesu, panewa manganto’oka Ia, “Pa’a Guru, kami kunsani Komi semo guru to ma’i napokau i mPue Allah. Apa tare tau to maya mangika palaong to taa rapobiasa to nuika ngKomi ane tare i Pue Allah resi ia.”
3 Wali i Yesu manganto’oka ia, “Aku manganto’oka korom, monso pu’u tare tau to maya mawali tau to i Pue Allah Makolenya ane ia tawa rapoanaka wo’u kadua ngkaninya.”
4 Pei i Nikodemus mampondayaka batuanginya gombo i Yesu etu mangkonong pangampoana to biasa, see naka ia ipu rayanya, ia manganto’o, “Gete, wimba danaika ntau to tu’amo darapoanaka wo’u kadua ngkaninya? Ia taa nakurang masua wo’u ri raya ngkompo nu indonya see darapoanaka wo’u!”
5 Wali i Yesu mangansono, Ia manganto’o, “Si’a pangampoana to etu to Aku manganto’o. Pei Aku manganto’oka korom, monso pu’u tare tau to maya mawali tau to i Pue Allah Makolenya ane ia taa rapoanaka yako ue pasi yako i Nosa Mapasing.
6 Apa anu to napoanaka nto lino, ojo to lino seja. Pei anu to rapoanaka saba yako kuasa i Nosa Mapasing, etu semo tau to bou to i Pue Allah puenya.
7 Wali ne’e ipu rayamu tempo Aku manganto’oka korom taa maya taa darapoanaka wo’u kadua ngkaninya damawali tau to bou.
8 Apa nempo masuli ransani palaong to etu, si’a batuanginya taa mawali. Pobuuka ngoyu, apa ane ngoyu, tondo imbanjo ia rani damantawuis, njo’u ria semo napantawuis. Korom re’e mangandonge loonya pei korom taa mangkita yako imbare kama’i nu ngoyu etu bara imbanjo nakanjo’u. Wali ewa seja palaong i Nosa Mapasing tempo Ia mangika tau mawali tau to bou. Apa tau taa maya mangkita i Nosa Mapasing tempo Ia mangika palaong to etu.”
9 Wali i Nikodemus tiroowa bata-bata rayanya mangkonong rapoanaka wo’u kadua ngkaninya, see naka ia mampotanaka wo’u, to’onya, “Ewa wimba palaong to etu maya mawali?”
10 Pei i Yesu manganto’o, “Gete! Korom semo samba’a tau tu’a nto Israel to mampotunde sira, pei wimba naka pei korom taa mangansani i Pue Allah Ia re’e kuasa mangika palaong to etu?”
11 Roo see i Yesu manganto’oka wo’u i Nikodemus, to’oNya, “Aku manganto’oka korom, monso pu’u Aku pasi joangKu magombo mangkonong anu to kami mangansani. Pasi kami mangansaritaka tau mangkonong anu to kami re’e mangkita. Pei komi to tau tu’a nto Israel, komi taa mangaya anu to nato’o mami etu.
12 Aku roomo manganto’oka komi mangkonong palaong to mawali ri lino si’i, pei komi taa mangaya gombongKu etu. Wali ane ewa see taa manto’o ane Aku manganto’oka komi mangkonong palaong to mawali ndate saruga!
13 Pei Aku maya kojo manganto’oka komi mangkonong palaong to mawali ndate saruga apa Aku yako ndate ria semo kama’ingKu. Taware pasi samba’a tau to nayau nto’u saruga panewa ma’i muni damampakarebaka yununya mangkonong anu to ndate ria. Ojo Aku, Wiyaa nto Lino, Aku semo to nama’i yako ndate saruga, wali see naka Aku maya mampakarebaka tau mangkonong palaong to mawali ndate ria.
14 Wali palaong to damawali resi Aku ewa palaong to mawali resi ule tambaga to naika i Musa nja’u pada bone tempo owi. Ule tambaga etu naposaka i Musa ri sampole kaju panewa inokotakanya ri tango ntau boros see tau to mangalo’aka maya rapalaes. Wali ewa wetu seja damawali resi Aku, Wiyaa nto Lino. Apa Aku taa maya taa darapaku ri kaju pei raokotaka seja ri tango ntau boros.
15 Naka pei Aku daraokotaka etu see samparia tau to mangaya Aku taa darapakaja’aka yau, pei maya mangarata katuwu to singkasaenya.
16 Apa bae kojo pamporayang i mPue Allah resi to lino, see naka Ia mangawai Aku, AnaNya to samba’aja, see i sema tau to mangaya Aku, tau etu taa darapakaja’aka yau, pei damangarata katuwu to singkasaenya.
17 Apa kamonsonya i Pue Allah mampokau Aku, AnaNya, ma’i ri lino si’i, si’a ma’i damangahuku to lino, pei yako palaong to Aku mangika see naka to lino darapalaes.
18 Wali tau to mangaya Aku, tau etu taa darahuku. Pei ane tau to taa mangaya Aku, tau etu roomo rapakatantu ia darahuku saba ia taa mangaya kuasa to si Aku, Ana i mPue Allah to samba’aja.
19 Naka pei tau to taa mangaya Aku etu rahuku, apa sira taa mangaya kareba to Aku ma’i mampakarebaka sira. Kareba etu kareba to monso to yako resi i Pue Allah pasi kareba etu raporapaka ewa reme. Pei to lino taa rani reme etu. Sira maja’a lengkonya, pasi lengkonya to maja’a etu, to raporapaka ewa kawuri, etu semo to naporani nsira.
20 Wali samparia tau to mangika palaong to maja’a, tau etu maja’a nakita reme. Pasi sira bo’onya mangampago reme apa reme etu damampakanasaka sira mangkonong lengkonya to maja’a etu.
21 Pei ane tau to lengkonya singkonong pei anu to monso, tau etu masanang mangampago reme apa kareba yako resi i Pue Allah to raporapaka ewa reme etu, kareba etu mampakanasaka sira palaong to inikanya etu singkonong pei pamporani i mPue Allah.” Wali etu semo gombo i Yesu resi i Nikodemus.
22 Wali yako etu i Yesu pasi kami to anaguruNya mayoko yako ri Yerusalem pei yau ri lipu to yusa to re’e seja nja’u propinsi Yudea. Rata nja’u ria kami maroo-roo pei mangabaptis tau.
23 Pasi tempo etu i Yohanes to Pombaptis tawa ratarungku, wali ia re’e seja mangabaptis tau nja’u lipu to rato’oka Ainon to mosu ri kota Salim, apa re’e ue to bae nja’u ria. Wali sangkani re’e tau to rata resi ia, wali ia mangabaptis sira.
24 (3:23)
25 Yako etu re’e seore anaguru i Yohanes masibanta pei samba’a yunu nsira to Yahudi. Sira mampasibantaka batuanginya mangabaptis tau. Apa yunu nsira etu ia taa manasa mangabaptis tau etu bara mangalulu ada nu agama nsira mangkonong ewa wimba raika see mawali mayongo koronya.
26 Wali anaguru i Yohanes etu sira yau resi i Yohanes pei mampotanaka resi ia, sira manganto’o, “Pa’a Guru, tau to nurata ngkomi seore nja’u sambote koro Yordan, to nuto’oka ngkomi kami Ia semo Ana i mPue Allah, tau etu re’e seja mangabaptis tau si’i-si’i. Pasi samparia tau mampiyaika yau komi pei yau mangampago Ia.”
27 Wali i Yohanes manganto’oka sira, ia manganto’o, “Tau tare mangarata kuasa ane taa nawaika i mPue Allah.
28 Pasi komi semo matamanasangku seore tempo aku manganto’o, ‘Aku si’a i Kerisitu, Makole parajanji i mPue Allah, pei aku rapokau damampatiruyu pei Ia.’ Etu semo gombongku seore. Wali masipato tau boros mangalulu Ia apa Ia semo to bae-bae kuasaNya pei aku.
29 “Palaong to mawali etu raporapaka ewa tau to marongo. Apa to langkai ia semo to rapasiwaka pei to we’a, wali to we’a etu ia puenya. Pei galung nto langkai etu, ia masanang ojo mangalo’aka pasi mampodongeka palaong to mawali ri tempo mpaparongo etu. Pasi ia ndende kojo rayanya tempo ia mangandonge gombo ngkai to rapaporongo etu. Wali i Yesu Ia ewa to langkai to rapaporongo etu pasi tau to mangalulu Ia, sira ewa to we’a to naoko nto langkai etu, wali sira Ia puenya. Pasi aku ewa galungiNya, see naka aku ndende kojo rayangku mangandonge Ia mampogomboka tau boros ri tempo si’i.
30 Wali masipato Ia kanjo’u-njo’u kabae-bae anggaNya ri pangkita ntau boros. Pei aku taa maya taa kanjo’u-njo’u kakodi-kodi anggangku.” Etu semo to nato’oka i Yohanes to Pombaptis resi anagurunya.
31 Wali yako etu i Yohanes to Pombaptis mampakapolas gombonya resi anagurunya, ia manganto’o, “I Yesu to ma’i yako ndate saruga, Ia semo to bae-bae wo’u anggaNya pei samparia to lino. Apa ane to lino, kita mangika lengko nto lino pasi magombo ojo mangkonong lino semo. Pei Ia to ma’i yako ndate saruga, Ia semo to bae-bae wo’u anggaNya pei samparia to lino.
32 Ia mampaponsanika tau mangkonong anu to Ia roomo mangkita pasi to Ia roomo mangandonge ndate saruga, pei tempo Ia manganto’o gombo etu taa kojo malagi tau to mangaya gomboNya etu.
33 Pei ane tau re’e mangaya gomboNya etu, tau etu mampatimonso anu to nato’o i mPue Allah.
34 Apa Ia to ma’i napokau i mPue Allah, Ia mangamporata gombo i mPue Allah, apa i Pue Allah re’e mangawaika Ia i Nosa Mapasing damangansawang Ia. Pasi si’a ojo tempo-temponya Ia nasawang i Nosa Mapasing, tare pandoonya Ia rasawang.
35 I Pue Allah, Pa’a, Ia mamporayang AnaNya pasi Ia roomo mangawaika AnaNya mangkuasang samparia.
36 Wali i sema tau to mangaya AnaNya etu, tau etu re’e katuwu to singkasaenya. Pei i sema tau to taa mangaya AnaNya etu, tau etu taa damangarata katuwu to etu. Kasimbalinya yako etu, tau etu danahuku i mPue Allah rataka ri singkasaenya.” Wali etu semo gombo i Yohanes resi anagurunya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA