¹ Yesus in kim kirekam Alapsa gu soneblasiki, ki zep zere hon de ang ta gwen wenya asa golesek gweka– weya tanena Kidron mo men eihya san dep. Zao zaitun trana ki. Zao zep asa golebiti gweka.
² Hwena Yudas Bak in zen zerguku, zen mes zaitun trana insa tawa gweblaka, sap Yesus etan-etankam zao asa goletagal gwe-gweka.
³ Ki zep ze Yudas jana nabare zini goleyaing gwe zaka. Ahakon Roma mo jana nabare zi, hen ahakon Alap mo golsa de kara gul gwen jana nabare zi– mensa Farisikam de zi niban Alap mo golak de syal tan zi mo mam-mam naban lup nul sonekke. Zen jana, nebok, hen te tek maesa deirenk, hen ahakon seipsi deirenk hen lampusa.
⁴ Hwena Yesus mes kitak anakan tame gulku, “Asa kirekam sa neblal,” zep ala ta gubiridaka, ki zep ze takensibiridaka, “Em narasae leblaꞌan?”
⁵ Ki zep ding nulblik, “Nazaret walya Yesussu.” Ki zep ding gulzimki, “Ëe an Zen.” Yudas in zen zer guku, zen ze golezauꞌunka.
⁶ Yesus kim kirekam ding gulzimki, “Ëe an Zen,” dekam zep jana nabare zini in tingan lure san eesek gwehak, ki zep mumuk ennak owas hap boklena kom dablak. Hwena zena hom tame nuk– Alap insa kim kirekam gweibiridakaye.
⁷ Dekam zep etan takensibiridaka, “Em narasae leblaꞌan?” Ki zep etan ding nulblik, “Nazaret walya Yesussu.”
⁸ Dekam zep ding gulzimki, “Ëe mes-am emsa anakan gubiridanan, ‘Ëe an Zenke.’ Asa en de teblanna, dikire ahakore wenya an sek gwek.”
⁹ Zen mae hap kirekam gubiridaka: Zere mo ner hom de Biansa de gu soneblanna insa dikim sul sonen hap. Sap Zen anakan gu soneblaka, “Ëe ama dawemkam golezauk sone gwek, zep aha-en mae home syauk sun dep de ora san de gwe hannak kara ta sonek.”
¹⁰ Simon, aha bosena Petrus, ki zep nebok zemka mol ineka, dekam zep Alap mo golak de teipsin zi nik de babu gwe-gwen zini Malkussu sap zip soka. Hwena dam san de ing ala en naka zep blansibli kinika.
¹¹ Hwena Yesus ze gubluka, “Nebokna insa em etan lil sonen. Em san ema anakan Asa jalse gweblaꞌara? – ‘Mensa Bian syal dohon-honna ebe hap wei yul soneblaka, dikire lwak.’”
¹² Ki zep Roma mo jana nabare zi mo mamna walas zeban hen Yahudi kore jana nabare zi niban zibalk taka, hen tahana zitatak soblaka.
¹³ Zen nonol Hanas Bak osan dep nerhak, men zen nonola Alap mo golak de syal tan zi nikon teipsikike– Kayafas Bak men zeno wenamsa golkake. Hwena Kayafas in, zen tahunna inkam Alap mo golak de syal tan zi nikon teipsiki.
¹⁴ Kayafas, zen in zen menkam Yahudi zi mo mam-mamna tame gun sremkam anakan gubiridaka, “Diki dawemna nebe mae hap aha-ere zi de tinni airis– dekakim tingare Yahudi zi juwe srem gwek.”
¹⁵ Simon, aha bosena Petrus, hen aha zini men zen Yesussu ang gwe-gweblaka lun kon zep ertro kinika. Hwena aha zini in zen ang gwe-gweblaka, zen Hanas Bak mo dokot ahana. Zep kim Yesussu Hanas Bak mo gol homannak de kol sonna iwe nertiꞌinzak, zen en zep dekam hen til zika.
¹⁶ Hwena Petrus enakon zep zauꞌun onka– lilikin golek denakon. Aha ang gwe-gweblan zini in dekam zep etan wet soka, ki zep lilikinsi de kara so gwen hap de babu gwen wenya ban goltonꞌanka, ki zep hwena Petrus hun lil zika.
¹⁷ Lilikin kara so gwen hap de wenya in dekam zep Petrussu takensiblik, “Em san hen ahana? – zini in hon de ang gwe-gwenna.” Ki zep ding gulbirki, “Ëe an zen hom.”
¹⁸ Langna dekam man bot-bot gweꞌak, zep zewe de babu gwen zi niban jana nabare zi niban mes syauknu bla dasik, hen zewe tuwirin hip ezauꞌuk. Petrus dekam zep hen golek de tabir zika, zao zep hen tuwirin hip zauꞌun zaka.
¹⁹ Alap mo golak de epba teipsin zini in dekam zep Yesussu mae hap denaka taken-taken gweblaka– Zebon de ang ta gwen zi hip dena hen zeno tawa tabin hip denaka.
²⁰ Dekam zep ding gulbluka, “Ëe ama damkam tingare zi nwenak tawa ta gwibik. Ano tawa tabinni kitak Alap mo golak hen but srem gol-golak– men zewe en Yahudi zini etagal gwe-gwenanke. Ëe home aningkim ba ol maena tawa tabik.
²¹ Zep ba hap de kire hap Asa takensiblin hap? Diki men zen Asa sane da gwekke, desa emaka takensibiridaꞌara, sap zen tawana– mensae tawa ta gwibikye.”
²² Kirekam kim ding gulbluka, jana nabare zini ahanik zep tahakam mipna lwa soblaka, deban gubluka, “Alap mo golak de teipsin zini san ki kirekam ding nul gweblanan?”
²³ Hwena Yesus ki zep ding gulbluka, “Ëye botonkam ding gulunam, dekam hwena emaka gubiridala, ‘Zen kirekam man boton gweꞌara.’ Hwena eiwakam insa ding gul, em ba habe Asa lek tyanda?”
²⁴ Hanas dekam zep gubiridaka– Alap mo golak de teipsin zini Kayafas Bak osan dep de zersong gwen hap. Yesus mo tahana dekam nama tatak soblanna.
²⁵ Petrus nama syauk alpna iwe zauꞌunka. Ki zep ze ahakore nik etan dakensiblik, “Em san ha zebon de ang gwe-gwen naka hom?” Ki zep ding gulzimki, “Ëe zebon de ang gwe-gwen naka hom.”
²⁶ Hanas Bak hon de babu gwen zini ahana man hen zao gweꞌanka. Zen Petrus insa ing alana blansibli kinika, zeno iye. Zen zep etan gubluka, “Ëe Yesus hun apdenake emsa zaitun tranak aker.”
²⁷ Desa hen man ding gulbluka, “Asya, aban home.” Hendep dekam zep ayangna guku.
²⁸ Kak tangannak, zep Kayafas mo gola kon Yesussu nersong gwek– gubernor Pilatus mo gol san dep. Zen zen dekam Roma mo bosekam gubernor gweka. Yahudi mo mam-mamna in hom dekam gola iwe biti gwek, sap Yahudi mo auyan-azana mes anakan jalse neibiridak, “Yahudi srem zi mo golak bahem tin. Ki esa ekun gwer.” Zep hom Pilatus mo golak biti gwek, sap zen man yaklana inkam Paskanak de tembane yawalak dep ehohle gweꞌak.
²⁹ Ki zep Pilatus Bak wet sobiridaka, ki zep ze takensibiridaka, “Zini an banakan karek gweka?”
³⁰ Ki zep ding nulblik, “Zen de karek gwe srem gwenanam, ee molye erhalan zanam.”
³¹ Ki zep Pilatus ding gulzimki, “Ki amki ere mae mo titi tabin ola kon klis uk hen karek lak.” Hwena ki zep ding nulblik, “Ëe amaka, hwena Roma mo irik ginni em mese asa anakan jalse eibirida gwek, ‘Yahudi zini em e-en bejen em zisi tok hap karek tan. Hwena diki nonol Roma mo mam-mamna kip em zerguzimdin– zen de zeno kareksa hlaulblunkam dekakim dak.’”
³² An mae hap ki jowek: Sap Yesus mes hamal hap anakan tawa ta gwibirki, “Ëe kirekam de tinsi asa hlaul.” Zep zere mo ola insa de sul sonen hap, kirekam zep ki hendep lwak.
³³ Pilatus ki zep etan gol mwa san dep til halka, ki zep jana nabare wenyaka gubiridaka– Yesussu de zertilzin hap. Zao zep takensiblika, “Em san ha eiwa Yahudi zi mo teipsinni?”
³⁴ Ki zep ding gulbluka, “San ha ere en mo enlalakame ki kirekam Asa takensibliꞌara? San ha aha zi man emsa nenblal– kirekam de Asa takensiblin hapye?”
³⁵ Ki zep ding gulbluka, “Ëe san Yahudi wal! In dwan Yahudi bose uk am Alap mo golak de mam-mam wenya ban abe hap emsa nergublunanzal. Em banakane karek gweka?”
³⁶ Ki zep ding gulbluka, “Ano irik ginni zen auhu-kamanak awe dep hom. Ëe de okamanak irik ginkim, dekam ano irik gin wenya maka eeijaꞌan– Asa de Yahudi mo mam-mam mo tahanak zerguzimdin srem hap. Hwena ano irik ginni okamanak awe dep hom.”
³⁷ Dekam zep Pilatus etan takensiblika, “Zep ki san ha em teipsinni?” Ki zep ding gulbluka, “In kirekame gunda, zen kirekamke. Ëe mae habe okamanak hatazak: Eiwa denaka de tawa ta gwibin hip. Eiwa de enlala nabare zini, zen man Asa i-san i-san ne gweblanan.”
³⁸ Dekam zep hwena ding gulbluka, “Eiwa dena bejen em tawa tabin, sap eiwa dena toton nara dep? – klis gunnu.” Kim kirekam guku, ki zep etan Yahudi mo mam-mam osan dep wet soka, ki zep ze kitak zi trana in han gubiridaka, “Ëe home zini an mo karekna hlaulblunan.
³⁹ Hwena eno mae mo gubernor-gubernora, ee dwan yakla yala Paskanak am-am egwe gwenan– bwinak de zini men desa tan hap kalang neibirida gwenan, ahanaka de tingare zi mo gublun san wet son hap zeser sonezimdin. Zep ee ama emsa takensibiridaꞌan: Ëe narasa asa namen ebe mae hap hil ti sonezim? San ha zini an zen zenaka tim tiꞌara, ‘Ëe an Yahudi mo teipsinni,’ san ha desa asa ebe mae hap zeser sonezim?”
⁴⁰ Ki zep ol mamkam egu ane gweꞌak, “Zini insa bejen! Barabassa ap hil ti sonezim.” Barabas in, zen asaskam de te-alasa alal ta gwizimdin hip de zi.