Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sesampun bemanik maraq nike, Deside Isa bedo'e andang langit, "Bapa, mangkin sampun dateng waktune. Mulieang Bije Deside adẽq Bije Deside ẽndah mulieang Deside.

² Deside sampun ngicanin tipaq Bije Deside kuase tipaq selapuq umat manusie, adẽq Ie ngicanin idup sejati dait kekel tipaq selapuq dengan saq Deside icanin tipaq Ie.

³ Niki idup sejati dait kekel; bahwe dengan kenal kance Deside, jari sopoq-sopoqne Allah saq kenaq, dait kenal kance Deside Isa Almasih saq sampun Deside utus.

⁴ Tiang sampun mulieang Deside lẽq gumi siq care nyelesẽang karye saq Deside serahang tipaq Tiang jari Tiang laksaneang.

⁵ Keranaq nike, Bapa, mangkin mulieang Tiang bareng-bareng kance Deside siq kemuliean saq sampun jari dowẽn Tiang dait dowẽn Deside sendẽqman dunie niki tecipteang.

⁶ Tiang sampun nyatayang pesẽngan Deside tipaq dengan-dengan lẽq dunie saq sampun Deside icanin tipaq Tiang. Ie pade nike jari dowẽn Deside, dait Deside sampun ngicanin ie pade tipaq Tiang dait ie pade sampun turut manik Deside.

⁷ Mangkin ie pade nenaoq bahwe selapuq saq Deside icanin tipaq Tiang asalne lẽman Deside.

⁸ Sampun Tiang sampẽang tipaq ie pade manik saq Deside icanin tipaq Tiang; dait ie pade sampun nerimaq manik nike. Ie pade nenaoq bahwe Tiang tetu-tetu dateng lẽman Deside dait ie pade percaye bahwe Deside saq ngutus Tiang.

⁹ Tiang do'eang ie pade. Tiang nẽnten do'eang dunie laguq jari dengan-dengan saq sampun Deside icanin tipaq Tiang, sẽngaq ie pade dowẽn Deside.

¹⁰ Selapuq saq jari dowẽn Tiang, jari dowẽn Deside ẽndah. Dait selapuq dowẽn Deside jari dowẽn Tiang ẽndah. Tiang temulieang lẽq antare ie pade.

¹¹ Mangkin Tiang parek ojok Deside. Tiang nẽnten ndot malik lẽq dunie; laguq ie pade araq lẽq dunie. Bapa, saq suci! Jagaq ie pade siq kekuasean pesẽngan Deside, nike pesẽngan saq sampun Deside icanin tipaq Tiang -- adẽq ie pade jari sopoq, pade maraq Deside kance Tiang ẽndah sopoq.

¹² Lẽq waktu Tiang masih bareng kance ie pade, Tiang sampun jagaq ie pade siq kuase pesẽngan Deside -- pesẽngan saq Deside icanin tipaq Tiang. Tiang sampun jagaq ie pade, dait nẽnten araq sopoq juaq lẽman ie pade saq binase; kecuali ie saq mule sampun tetentuang binase. Adẽq siq care nike telaksane napi saq tetulis lẽq Kitab Suci.

¹³ Mangkin Tiang parek ojok Deside. Selapuqne niki Tiang sampẽang semasih Tiang araq lẽq dunie; adẽqne penoq sukecite Tiang lẽq dalem ie pade.

¹⁴ Tiang sampun sampẽang lẽq ie pade selapuq manik Deside, dait dunie meriq lẽq ie pade, sẽngaq ie pade nẽnten dowẽn dunie, pade maraq Tiang ẽndah nẽnten dowẽn dunie.

¹⁵ Tiang nẽnten tunas adẽq Deside bait ie pade lẽman dunie niki, laguq Tiang tunas adẽq Deside jagaq ie pade lẽman saq jahat.

¹⁶ Pade maraq Tiang ndẽqne lẽman dunie, ie pade ẽndah ndẽqne lẽman dunie.

¹⁷ Suciang ie pade dalem kebenaran; manik Deside nike kebenaran.

¹⁸ Maraq Deside sampun ngutus Tiang ojok dunie, maraq nike ẽndah Tiang ngutus ie pade ojok dunie;

¹⁹ dait Tiang suciang diriq Tiang umaq ie pade, adẽq ie pade ẽndah tesuciang dalem kebenaran.

²⁰ Nẽnten ie pade doang saq Tiang do'eang, laguq Tiang ẽndah do'eang dengan-dengan saq percaye lẽq Tiang siq kesaksian ie pade niki;

²¹ adẽq ie pade selapuq jari sopoq, pade maraq Deside lẽq dalem Tiang, dait Tiang lẽq dalem Deside, adẽq ie pade ẽndah lẽq dalem Ite, adẽq dunie percaye, bahwe Deside saq sampun ngutus Tiang.

²² Tiang sampun ngicanin ie pade kemuliean saq Deside icanin lẽq Tiang, adẽq ie pade jari sopoq, pade maraq Ite ẽndah sopoq;

²³ Tiang lẽq dalem ie pade, dait Deside lẽq dalem Tiang; adẽq ie pade sempurne jari sopoq, adẽq dunie nenaoq bahwe Deside saq sampun ngutus Tiang, dait Deside ngasihin ie pade, pade maraq Deside ngasihin Tiang.

²⁴ Bapa, Tiang melẽt adẽq lẽq mbẽ juaq Tiang araq, ie pade ẽndah araq bareng kance Tiang, ie pade saq sampun Deside icanin tipaq Tiang, adẽq ie pade serioq kemuliean Tiang saq sampun Deside icanin tipaq Tiang, sẽngaq Deside sampun ngasihin Tiang sendẽqman dunie tecipteang.

²⁵ Bapa saq adil! Mule dunie nẽnten kenal kance Deside, laguq Tiang kenal kance Deside; dait ie pade niki nenaoq, bahwe Deside saq sampun ngutus Tiang,

²⁶ dait Tiang sampun nyatayang pesẽngan Deside tipaq ie pade; dait Tiang gen laksaneang hal nike, adẽq kasih Deside lẽq Tiang tetep lẽq dalem atẽ ie pade dait Tiang lẽq dalem ie pade."

Yohanes

Video Yohanes 17

Ikuti Kami:

KONTAK | PARTISIPASI | DONASI