Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lapatao lobisala odito, ti Isa yilumanggela mola wawu lodua odiye, ”Wu Allahuta'ala ti Papa, wakutuliyo ma ledungga. Popomasahuruwa lomayi Walai Papa botiya, alihu Walai Papa botiya ma mopomasahuru oli Papa.

² Ti Papa ma longohi mayi haku wawu kawasa ode Walai Papa momarenta umati lo manusiya nga'amila, alihu Walai Papa botiya mongohi mao tutumula kakali ode timi-timi'idu manusiya ta ma yiludu mayi li Papa ode o-Liyo.

³ Utiye tutumula kakali boyito, deuwitoyito timongoliyo motota li Papa Allahuta'ala ta bo tuwa-tuwawulo wawu ta banari, wawu motota Latiya ti Isa Almasih ta ilahula mayi li Papa.

⁴ Wolo u ma lopo'olapatao karaja u yilohi mayi li Papa ode o-Latiya, Watiya ma lopomasahuru oli Papa to duniya boti.

⁵ Masatiya muli popomasahuruwa lomayi Watiya, debo odelo masahuru Latiya woli Papa tou duniya boti dipo lowali.

⁶ Watiya ma lopotota mao tangguli Papa ode tawu-tawuwala ta yiludu mayi li Papa ode o-Latiya to wolota lo tawu-tawuwala ta hepotoloduniyawa. Timongoliyo boyito haku li Papa wawu ti Papa ma lohudu mayi olimongoliyo ode o-Latiya wawu timongoliyo ma loturuti mao Pirimani li Papa.

⁷ Masatiya ma otawa limongoliyo deu nga'amila uhetuwa-tuwawuwa u ma yilohi li Papa o-Latiya lonto oli Papa.

⁸ Pirimani u ma piloposambewo mayi li Papa ode o-Latiya ma piloposambewo mao Latiya ode olimongoliyo wawu timongoliyo olo ma lololimo Pirimani boyito. Ma otawa limongoliyo deu Watiya otutu lonto oli Papa. Timongoliyo olo paracaya deu ti Papa ta lopoahu o-Latiya.

⁹ Watiya hemoloduawa olimongoliyo ta ma yiludu mayi li Papa ode o-Latiya sababu timongoliyo haku Papa. Watiya dila hemodua olimongoliyo ta hepotoloduniyawa.

¹⁰ Nga'amila haku Latiya haku li Papa wawu nga'amila haku li Papa haku Latiya. Moli olimongoliyo Watiya ma popomasahuruwo lo tawu.

¹¹ Botiya Watiya ma nao-nao mayi ode oli Papa. Watiya ma diduluwo to delomo duniya, bo timongoliyo tatapu donggo woluwo to delomo duniya. Wu Papa ta suci, dahayi mao timongoliyo to delomo kawasa lo tangguli Papa u ma yilohi li Papa ode o-Latiya, alihu timongoliyo mowali tuwawu odelo Ito.

¹² Ngohilayao Watiya pe'epe'enta wolimongoliyo, Watiya ma helomalihara olimongoliyo to delomo kawasa lo tangguli Papa u ma yilohi li Papa ode o-Latiya. Ma hedilaha mao Latiya timongoliyo. Diyalu ngota mao to wolota limongoliyo ta mowali binasa, ngopohiya ta ma letantu mayi mowali binasa alihu ganapu wolo u tula-tulade to delomo kitabi.

¹³ Watiya ma nao-nao mayi ode li Papa. Wawu tou Watiya donggo to delomo duniya, Watiya hemopolele mayi lo pasa-pasaliyala boti, alihu wengahu Latiya mopolu to delomo hila limongoliyo.

¹⁴ Pirimani lo Allahuta'ala ti Papa ma piloposambewo mao Latiya ode olimongoliyo, bo duniya moyingo limongoliyo, sababu timongoliyo dila lonto duniya, tutuwawuwa wo-Latiya dila lonto duniya.

¹⁵ Watiya dila lohile alihu Allahuta'ala ti Papa mohama mayi olimongoliyo monto duniya, bo pohile Latiya Allahuta'ala ti Papa modaha mao olimongoliyo alihu dila gangguwo lo Ibilisi.

¹⁶ Timongoliyo dila lonto duniya, odelo Watiya olo dila lonto duniya.

¹⁷ Popowaliya mao timongoliyo mowali umati ta mohinta Allahuta'ala ti Papa to delomo obobanari. Pirimani lo Allahuta'ala ti Papa boyito yito obobanari.

¹⁸ Odelo Allahuta'ala ti Papa lopoahu o-Latiya ode duniya, odito olo Watiya mopoahu olimongoliyo ode duniya.

¹⁹ Watiya mohudu mayi batanga mohinta Allahuta'ala ti Papa, alihu timongoliyo mowali umati ta mohinta Allahuta'ala ti Papa to delomo obobanari.

²⁰ Dila bo wambao timongoliyo ta hedua Latiya, bo tawu-tawuwala ta paracaya ode o-Latiya moli pongajari limongoliyo hedua Latiya olo.

²¹ Hepohileya Latiya dua timongoliyo mowali tuwawu, odelo Allahuta'ala ti Papa tuwawu wo-Latiya wawu Watiya tuwawu wolo Allahuta'ala ti Papa, tunggulo timongoliyo boti mowali tuwawu Wolanto. Wolo uodito, tawu-tawuwala to duniya mowali paracaya deu Allahuta'ala ti Papa ta lopoahu o-Latiya.

²² Watiya olo longohi mao olimongoliyo umasahuru u ma yilohi lo Allahuta'ala ti Papa ode o-Latiya, alihu timongoliyo mowali tuwawu odelo Ito.

²³ Watiya tuwawu wolimongoliyo wawu Allahuta'ala ti Papa tuwawu wo-Latiya, alihu timongoliyo otutu mowali tuwawu. Wolo uodito, ma otawa lo duniya deu Allahuta'ala ti Papa ta lopoahu o-Latiya wawu Allahuta'ala ti Papa motoliangi mongoliyo, odelo Allahuta'ala ti Papa motoliango Latiya.

²⁴ Wu Allahuta'ala ti Papa, otohila Latiya alihu timongoliyo ta ma yilohi mayi lo Allahuta'ala ti Papa ode o-Latiya pe'epe'enta wo-Latiya to tambati ilowoluwowa Latiya. Wolo uodito, timongoliyo mowali mo'onto omasahuru Latiya, deuwitoyito umasahuru u ma yilohi lo Allahuta'ala ti Papa ode o-Latiya sababu Allahuta'ala ti Papa ma lotoliango Latiya tou duniya boti dipo yilowali.

²⁵ Wu Allahuta'ala ti Papa ta banari, memangi Allahuta'ala ti Papa dila otawa lo duniya boti, bo Watiya motota lo Allahuta'ala ti Papa wawu timongoliyo motota deu Allahuta'ala ti Papa ta lopoahu o-Latiya.

²⁶ Ma pilopotota mao Latiya ode olimongoliyo tanggulo Allahuta'ala ti Papa wawu u odiye boti turusi hepohutuwo Latiya, alihu tolianga u ma yilohi mayi lo Allahuta'ala ti Papa o-Latiya woluwo to delomo hila limongoliyo wawu Watiya tuwawu wolimongoliyo.”

Yohanes

Video Yohanes 17

Ikuti Kami:

KONTAK | PARTISIPASI | DONASI