Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yesus kim kirekam gubiridaka, Zëna ki zep nglï san kara gwe seka, ki zep Biansa gu soneblaka, “Bian, angkam yaklana mewe mes zaunun. Angkam dekam ere mo Tanena ano bosena tïngare zi mo nwenak ap teip gulsublu– Ëe akakim hen ere mo bosesa zëno mae mo ngïrïnnïk teip gulsuk gwek.
2 Sap Em mese tïngare zi aususa de bi gwibiridan hap dena abe hap golblaka. Hen zen de ëngaya gwen hap dena mensa Ena abe hap lup gulbluka, Ëe asa zëbe mae en hap hëndep de lowehen hap denaka gol gwizim.”
3 Ëe, Yohanis, in zebë hen Alapsa anakan gu soneblaꞌan, “Bian, an diki zen– hëndep de lowehe gwen hap denaye: Eiwa de Zini Alap Emsa de tame tanna, hen ere mo zer sonen Zini Kristus Yesussu de tame tanna. Zen ëe dekonë ëngaya gweꞌan.” Yesus dekon anakan ayang gulku,
4 “Bian, Ëe mesë eno bosena okamanak de zi mo nwenak teip gulsublunda gwek, sap Ëe zëno mae mo nwenak mesë syala sul sonek– mensa Ena abe hap wei yul soneblakaye.
5 Zep Bian, angkam Emki etan abe hap golblan– Ëe dikim eno alp nakon teipsïnkïm nikirin hip, nonol men kirekame okamana ansa de yang gulsun srëmnak teipsïnkïm inikin gwekake.
6 “Em mese okamana an kon abe hap zini hlïlblinki, hwëna zen bina ere tangan mo dena. Bian, Ëe mesë ebe hap dena zëbe mae hap goltrei gwizimk, hen zen angkam mes ere mo ol san ang tal.
7 Zen mes angkam anakan tame nul: Ano syala hen ola, zen kïtak Ebon onakorena– mensa Ena abe hap golblakake.
8 Sap ola mensa Ena abe hap golblaka, Ëe mesë desa ayang gulzimk, hen zen mes desa dokwak nuk, hen mes tame nuk. Zen mes Asa anakan daïblïblak, ‘Zen eiwa Alap onakon hata zaka, hen Zen zer soneka.’
9 “Ëe tïngare okamanak de zi hip homë Emsa abe taꞌan. Hwëna men desa en Ena abe hap lup gulblukake, zëbe mae en habë Emsa abe taꞌan, sap zen zen– ere mo denaye.
10 Ano bi gwibiridan wenya, zen hen kïtak ere mo dena. Hen ere mo bi gwibiridan wenya, desa hen kïtak apdekame bi eibiridaꞌara. Zen zep sa hen ano sosonna aha zi hip noltrei gwizim, hëndep zen hen sa ano bosena teip nulsublunda gwer.
11 Angkam Ëe ama Ebon osan dep lwa haꞌanzal. Ëe homë etan okamanak awe deban mae golëlowe heꞌan, hwëna nëno nik mo bi eibiridan wenya nama sa zao lowehe gwer. Zep Lalak Zini, Bian, nëno nik mo hlïl irin zini insa emki tatetekam de Ebon en ëzauk gwen hap denaka gol gwizimdin. Zen dekam sa ëaha-en gwe-gwer– Nëna men kirekame hen aha-en ëkake.
12 Ëe kimë nama golëlowehe gwek, Ëe ama Ebon dikim tatem ëzauk gwen hap dena kim tatete ta gwibik. Hen Ëe ama dawemkam golëzauk sone gwek, zep aha-en mae homë syauk sun dep de ora san de gwë hannak kara ta sonek. Hwëna aha-en tangan syal heka. Hwëna zen insa kirekam gwëka, zen ere mo olsa dikim sul sonen hap ki lwak.
13 “Bian, Ëe angkam ama Ebon osan dep lwa haꞌanzal, an zebë nama de okamanak gwën nakon zëno mae mo inik emsa gu soneblaꞌan– ano isrip-srisa dekakim zëre mae mo enhonak sowe henkam neis gwibik.
14 Ola mensa Ena abe hap golblaka mesë ayang gulzimk. Hwëna auhu-kama enlala zini man Abon de ang ta gwen wenya ansa husus neibirida gwenan, sap zen okamana awe dep denaka hom. Zen ngatan zi mo lang san dep dena. Ënaka hen kirekam husus në gweblanan, sap Ëe hen awe dep denaka hom.
15 Bian, Ëe Abon de ang ta gwen zini ansa, okamana an kon de lup gul inehan hap homë Emsa abe taꞌan. Hwëna diki mae habë Emsa abe taꞌan: Dowal mo kïgï onakon Emki langa tasïk gwibin.
16 Men kirekam Aena okamana awe dep denaka hom, zen hen kirekam. Zen zep auhu-kama enlala zi niban enlala siri tankam lowehe srëm gwe-gwenan.
17 Bian, eno ola zen eiwa de enna. Ere mo eiwa de ola inkam emki Abon de ang ta gwen wenya ansa lalak tasibin– lalak nik dekakim ere en hon lowehe gwek.
18 Men kirekame Asa okamana an san dep zer soneka, Ëe hen kirekamë desa tïngare lang san dep lup gul soneꞌan.
19 Zen in zebë ëre mo timni ebe hap sosok gulbluꞌan– desa dikim mas gwibiridan hap, zen dekakim tangan ere en hon ëtal gwesïk.
20 “Angkam an zen lowe heꞌan, zëbe mae en hap homë Emsa abe taꞌan. Hwëna men zen de zëno mae mo ola kon Asa daïblïblaꞌak, zëbe mae habë hen Emsa abe taꞌan.
21 Dikire zen kïtak ëaha-en gwek. Dikire zen Nësa niaha-en gwek– Nëna men kirekame enho aha-erekam ë gwendake. Zen de kirekam ëaha-en gwenkam, zen dekam tangan sa okamanak de zini Asa anakan daïblïblal, ‘Zen eiwa Eme Asa zer soneka.’
22 Ëe mesë ëre mo ngatan zi mo lang nakore sosonna zëbe mae hap golzimk– men desa Ena abe hap golblakaye. Zen zep sa hen ëaha-en gwer– Nëna men kirekame hen aha-en ëkaye.
23 Asa Eme enho nakon zergwë gwenda, hwëna Ëe asa desa enho nakon golëlowehe gwer. Zen zep sa tangan ëaha-en gwer. Zen dekon zep sa hen okamanak de zini anakan tame nul gwer, ‘Zen eiwa, Eme Asa zer soneka.’ Zen zep sa hen anakan tame nul gwer, ‘Em eiwa ema Abon de ang ta gwen wenya ansa kwasang gwibirida gwenda– men kirekame hen Ena Asa kwasang gwe-gweblandake.’
24 “Bian, zini men desa Ena abe hap lup gubluka, Ëe ama zen de Abon onak lowehe gwen hap dwam gweꞌan– men zaoë Aena gwë gweꞌakke. Zen dekam sa ano ngatan zi mo langnak de sosonna hla nul gwer– men desa Ena abe hap de kwasang hap okamana ansa de yang gulsun srëmnak golblakaye.
25 Bian, Em dam-dam enkam de klis gul gwen hap de Zini. Okamanak de zini hom Emsa tame daꞌan, hwëna Ëe mesë Emsa tame tak. Hen Abon de ang ta gwen wenya an mes hen anakan tame nuk, ‘Eme Asa zer soneka.’
26 Ëe mesë ebe hap dena zëbe mae hap goltreizimk, hen nama asa kirekam goltrei gwizim. Zen zep sa Asa enna nola gweblal– men kirekam Ena hen Asa enna lwa gweblandaye. Ëe dekam asa deban mae apdekam golëaha-en gwer.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA