Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iaminne pasanNa Batara mae ri Yoël, ana’na Petuel.
2 Pilangngeri, he sikamma tutoa-toaya; parhatikangi, sikontu tau niaka ri Yehuda. Le’bakika kajariang anne kammaya ri jammannu, yareka ri jammanna sikamma boe-boenu?
3 Caritai anjo kajarianga mae ri ana’-ana’nu; sollanna nacarita ke’nanga anjo caritaya mae ri ana’-ana’na. Ana’na ri bokoa musti nalangngere’ tongi, nampa napannarrusu’ todong mae ri ana’na sallang.
4 Katimbang sannaka jaina takkullea nibilang, a’dangka’ ri kokoa ampaccappuki wassele’na. Apa nasesaya anne katimbanga, nipaccappuki ri katimbang maraengannaya.
5 He sikamma tau nasa’ringa, ambangungko nai’! He sikamma painunga, angngarru’ mako! Nasaba’ anggoro’ berunu nialleang mako battu ri bawanu.
6 Battui pasukang katimbanga ambakkai pa’rasanganta; kassaki ke’nanga natakkullea nibilang jaina, giginna kammai taranna gigi singa ganaya.
7 Naputtai ke’nanga anggorotta, na poko’ arata tonasa’na mami tassesa. Sikamma batanna nabi’bi’mi ke’nanga, sa’genna kebo’mo tangke-tangkenna.
8 Angngarru’ mako, he ummaka, rapang tulolo susaya nyawana angkarruki kamateanna bayuanna sannaka nangaina.
9 Tenami gandunga siagang anggoroka lalang ri Balla’Na Batara. Nasusa rapang tukamateammo sikamma imanga tamamminraya allayani Batara.
10 Ancuru’mi kamma-kamma anne sikamma kokoa. Susami buttaya; nasaba’ puttami sikontu gandunga, kalotoro’mi rapponna anggoroka, na cappu’mo minynya’ zaitunga.
11 He pamarria, appiraung mako! He pakoko anggoroka, angngarru’ mako! Nasaba’ gandung, jelai siagang sikontu wasseleka putta kabusu’mi.
12 Poko’ rappo-rappoa ri paranga a’jari kalotoro’ ngasemmi; poko’ anggoro’, appele’, ara, koro’ma siagang delima. Na tarannuamo pa’mai’na ra’yaka.
13 He sikamma imang allayania ri tampa’ pakkoro’bangnganga, ammakeko kaeng karung, siagang angngarru’ mako. Antamakko ri Balla’Na Batara appiraung sipattang kabusu’, nasaba’ tenana koro’bang anggoro’ siagang gandung untu’ Allata’alanu.
14 Parentakangi umma’nu untu’ appuasa, pappiassengangi passibuntulang lompoa! Kioki sikamma pamimpinga siagang tutoa-toaya, kammayatompa sikontu pandudu’na Yehuda, sollanna battu mae ri Balla’Na Allata’ala, untu’ akkio’ appala’ tulung mae ri Ia.
15 A’reppese’mi AllonNa Batara, iamintu allo appakamalla’-mallaka; wattu appabattuna kaancurang Kaminang Makoasaya.
16 Panra’mi kanre-kanreanga ri dallekanta ngaseng ri Balla’Na Allata’alata tenamo sa’ra lompo lanri rannu.
17 Matei binea ri butta kalotoroka. Tenamo gandung untu’ niboli’, na runtummo sikamma pammolikang tenaya bonena a’jari rumbangngang.
18 Angngoe’mi olo’-oloka na lussa’; tenamo parang pangnganreanna. Sikamma gimbalaka ta’ronang tommi.
19 Appala’ tulunga’ ri Katte, o Batara lanri sikamma parang rukuka ammutung ngasemmi na kalotoro’ poko’-pokoka kalotoro’ tommi na mate kontui nakanrea pepe’.
20 Ba’lalo manna olo’-olo’ liaraka ri romanga ammarrang todong mae ri Katte appala’ bantuang. Takkulleai ke’nanga naballei turerena, nasaba’ sikamma binangaya kalotoro’ kabusu’mi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA