Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Reya’ dhabuna PANGERAN ka Yowël, pottrana Petuwel.
2 Mara edhingngagi, he reng-oreng se la wa-towa; mara tetene, sakabbinna oreng e Yehuda. Ba’ taowa badha kadaddiyan cara reya e jamanna ba’na, otaba e jamanna para bangatowana ba’na?
3 Careta’agi kadaddiyan jareya ka na’-ana’na ba’na; sopaja na’-ana’na ba’na jareya nyareta’agiya careta jareya ka na’-ana’na. Toronan se bakal dhateng kodu ngedhing keya, sarta nerrossagi ka toronanna saterrossa.
4 Balang se bal-ambalan se ta’ kabitong bannya’na, nengga’ e gal-teggal sarta ngakan hasella. Se gi’ ta’ takakan bi’ se saambalan, epatadha’ bi’ se dhateng jang budhiyanna.
5 He, reng-oreng se dujan mabu’, mara jaga! He, reng-oreng se dujan ngenom, mara nanges sateya! Sabab anggur se anyar la erampas dhari colo’na ba’na.
6 Pasukan balang nyerrang nagarana sengko’ ban ba’na; pasukan jareya kowat tor ta’ kabilang bannya’na, gigina padha ban seyongnga macan bine’ tajemma.
7 Bungkana anggurra sengko’ ban ba’na epatadha’ bi’ balang jareya, ban bungkana arana pera’ epakare bungkella. Ka-bungkana ekolet kabbi, sampe’ rang-carangnga daddi pote.
8 Mara nanges, he ommat, papadha ban paraban se sossa se nangese matena bakalla se kataresnan.
9 Gandum ban anggur la elang dhari Padalemman Socce. Daddi para imam se esto aladine PANGERAN padha noduwagi sossana atena.
10 Gal-teggal padha ancor; tana padha katon sossa; sabab gandum la mosna, la kerreng buwana anggur, la tadha’ karena mennya’ jaitun.
11 He, oreng tane, mara nanges pakaja! He, tokang kebbun anggur, pakalowar aeng matana! Sabab gandum, jangle ban sakabbinna hasella tana padha mosna tadha’ karena.
12 Bungkana wa’-buwa’an e teggal padha kerreng tadha’ dhaunna; bungkana anggur, appel, ara, korma ban dalima. Daddi ra’yat ta’ gumbira pole atena.
13 He, para imam se aladine e mezba, mara akalambi kaen karong, pas padha nanges. Mara maso’ ka Padalemman Socce, nanges e jadhiya samalem benteng, sabab ba’na ta’ andhi’ anggur ban gandum pole se ekagabaya kurban ka Allahna ba’na.
14 Parenta’agi sopaja ommadda ba’na apowasa, badha’agi kompolan raja! Onjang para pamimpin ban para seppona bariya keya sakabbinna oreng Yehuda, sopaja padha’a entar ka Padalemman Socce, kaangguy aserro nyo’on partolonganna Allah.
15 Are PANGERAN la para’, are jareya are se nako’e parana; baktona Se Mahakobasa maancor sakabbinna.
16 Sengko’ ban ba’na padha nangale’e rosak kabbi hasella bume. E Padalemman Socce tadha’ oreng asorak gumbira pole.
17 Ne-bine mate e tana se kajal. Tadha’ gandum se ekennenga sempen, daddi bung-lombung kosong tadha’ essena sarta aoba daddi jur-gujuran.
18 Ebin padha amonye ngalengsang; tadha’ talon se egabaya kennengnganna ngamba. Ba-dumba se bal-ambalan padha nyangsara keya odhi’na.
19 Abdidalem nyo’ona tolong ka Junandalem, GUSTE, sabab rebbana lon-talon ampon padha kerreng, kadi ka’dhinto jugan sadajana ka’-bungka’an, akadi se ekello’ apoy se bang-garabangan.
20 La’-mala’ run-burun alas se kesset sadajana padha aserro ka Junandalem nyo’on bantowan. Run-burun alas gapaneka ta’ manggi aeng se eenoma, sabab ngay-songay padha kerreng sadajana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA